Yesaya 57 - Chiyawo Bible

Kulekasya milungu jine ja Isalaeli

¹ Ŵandu ŵa Mlungu ŵakulupilila akusawa, nipo pangali jwakusayisamala yeleyi. Ŵandu ŵakulupicika akusajigalilwa, nipo pangali jwakusapikanicisya ligongo lyakwe. Ŵandu ŵakulungama akusatyosyedwa, kuti akayiwona yisawusyo,

² nipo ŵandu ŵakutama mu ma umi gambone akusawa mwa mtendele.

³ Msejele akuno m'mwe ŵandu ŵakutenda yakusakala, pakuti mli mpela yisukulu yakupagwila mcikululu yakutyocela mlilama.

⁴ Ana jemanja mkung'anda ni ŵani? Ana mkuŵeceta ya ŵani? Ana mkwanyosya ŵani? Ana ŵakulemwa ngaŵaga jemanja? Jemanja mli ŵa unami?

⁵ Mkasijipopelela milungu jakupanganyidwa ni yala pasi pa yitela ya mtundu, pasi pa citela cilicose cesipuce. Mkusapeleka ŵanace ŵenu mpela mbopesi kumbanga sya maganga m'yiŵata.

⁶ Mkusimjigala maganga gakutililika ku yiŵatako, ni kujipopelelaga mpela milungu. Mkusimpeleka cakupeleka ca yakumwa kwa jelejo, ni kupeleka soni cakupeleka ca yakulya. Ana yeleyi komboleka kusangalasya Une?

⁷ Petumbi lyelewu ni lyakuwonecela kutali mkusimjawula kuja kupeleka mbopesi syenu, ni kutenda ya lilama kweleko.

⁸ Kusyeto kwa litanga soni felemu ja litanga mŵisileko mitembe jenu. Une mundesile, mwusile yakuwala yenu, mkwesile pa cindanda cenu cekulungwa ni maganja ŵenu ŵimwapele mbiya kuti mgone nawo.

⁹ Mwalipakesye mawuta ni yakununjila yejinji nipo mwapite kukumlambila mlungu jwakupanganyidwa ni yala jula jwa Moleki. Mwatesile kwatuma ŵandu kutali, mwatumile atamose ku malembe kwene.

¹⁰ Mwapesile nawo ulendo wakuwujenda, nambo nganimŵeceta kuti, “Cingambe kuleka!” Lisosa lyenu lyaliji lyekulungwa, mwakuti mwalipele macili gane jika, mwakuti nginimpela.

¹¹ “Ana milungu japi jimwajiweni ni kutenda najo woga, mwakuti mwalambwisye ni kundiŵalila mwakuti ngaganisya kose ya une? Ana mlesile kunjogopa ligongo lyakuti ndemi jii kwa ndaŵi jelewu?

¹² Ana mkuganisya kuti yimkusatenda yili yakulungama, nambo ndamo syenu tacisilosya pakulanguka, nipo milungu jakupanganyajo ngisijimkamusya.

¹³ Pimkugumila kuŵenda cikamucisyo, milungu jenu jakupanganyajo jimkulupusye! Mbungo tijicijanukula milungujo, soni mbungo tijicigulusya. Nambo ŵakusangulupilila Une, tacipocela cilambo cakuti atame, ni kulambilaga pa litumbi lyangu, lyeswela.”

Cilanga ca cikulupusyo ca Mlungu

¹⁴ Tipacipikanika maloŵe gakuti, “Akolosye, akolosye kulinganya litala. Mtyosye cilicose cakuŵalisya petala lyakupitila ŵandu ŵangu.”

¹⁵ Ŵalakwe ŵele ali Ŵakulungwa ni Ŵamaciligosope, ŵele ali ciŵela ndaŵi syosope, nipo lina lyawo ni Jwamswela jula, akuŵeceta kuti, “Ngusindama malo ga ucimbicimbi, gamaswela. Nambo soni ngusindama ni ŵandu ŵakulinondiya ni ŵakusangulupilila une, kuti ŵakulinondiyawo natyosye woga, ni kwalimbisya ŵakulupililawo.

¹⁶ Napele umi ŵandu ŵangu, myoyo ngambitilisya kangana nawo kapena kwatumbilila mpaka kalakala.

¹⁷ Natumbilile ligongo lya ulemwa* wawo ni kunonyela yipanje, myoyo napele cilango jemanjajo ni kwaleka. Nambope jemanjajo ŵaliji ŵakulepeleka nipo ŵapitilisyaga kutenda yiŵasakaga acimsyene.

¹⁸ “Nayiweni mwele muŵatendele, nambope tinjaposya. Tinjalongolela ni kwakamucisya soni kwatulasya mitima ŵandu ŵakulila.

¹⁹ Tinjapa mtendele ŵandu wosope, ŵakwakutalika ni ŵapakuŵandicila! Tinjaposya ŵandu ŵangu.

²⁰ Nambo ŵandu ŵakusakala ali mpela nyasa jangatama bata, jele matumbela gakwe gangalecesya kupuga, soni matumbelago gakusaponya matope ni konanga.

²¹ Pangali mtendele kwa ŵakulemwa,” ni yakuti Mlungu jwangu.