Yesaya 54 - Chiyawo Bible

Cinonyelo ca AMBUJE pa Isalaeli

¹ M'mwe Yelusalemu mjimbe ni lukondwa, m'mwe ŵimli mpela ŵakongwe ŵangaŵeleka, m'mwe ŵimkanimŵeleka mwanace citandile, mjimbe mwakusangalala, m'mwe ŵimkinimyipikanepo yipwetesi ya ucembele. Pakuti sambano timcikola ŵanace ŵajinji timcapunda ŵakongwe ŵakwete ŵalume, AMBUJE* aŵecete myoyo.

² Mgakusye malo genu gimkutama mcitenti, cinguwo cakuwunicila mcitambalalisye. Ngonji syakwe msilewuye, nipo myilimbisye yicili yakwe.

³ Malile genu timcigakusya ku mbali syosope yisukulu yenu tiyicisumula cilambo ca mitundu jine nipo tiyicitama m'misinda jele mwangali ŵandu.

⁴ Mkajogopa, ligongo ngisamnyosya soni, ngajasa mtima pakutipo ngasamtendesya soni. Timciliŵalila yiyamtesyaga soni mu ndaŵi ja ucanda wenu ngasimkumbucila soni ya umasije wenu.

⁵ Juŵampanganyicisye m'mwejo ali mpela ŵamkwenu, lina lyawo lili AMBUJE Ŵamaciligosope. Ŵaswela ŵala ŵa Isalaeli ni mkulupusyo jwenu, lina lyakwe lili AMBUJE ŵa cilambo capasi.

⁶ M'mwe Isalaeli, AMBUJE amŵilasile soni. Mli mpela jwamkongwe jwamlesile, jwagumbalilwe ni canasa mu mtima mwakwe, mpela jwamkongwe juŵalombedwe ali mwali nambo ŵamlesile, akuŵeceta AMBUJE.

⁷ “Namlesile mu ndaŵi jamnono, nambo ni cinonyelo cekulungwa tinjimjigala soni.

⁸ Nimtumbilile kwa ndaŵi jamnono nganindola pa jemanja, nambo tinjimlosya cinonyelo cangu ndaŵi syangamala,” akuti myoyo AMBUJE, mkulupusyo jwenu.

⁹ “Kwa Une yeleyi yili mpela muyatendecele ndaŵi ja Nowa: munatendele cilanga* ndaŵi jelejo kuti ngasinjonanga soni cilambo capasi ni ula ja cikumba, myoyo sambano ngulumbila soni kuti ngasinimpila mtima jemanja, soni ngisinimjamuka.

¹⁰ Matumbi komboleka kutyoka nipo yikwesya komboleka kutenganyika, nambo cinonyelo cangu cangacenga ngasicityoka pa jemanja. Cilanga cangu ca mtendele ngasicimala, akuti myoyo AMBUJE ŵakusamtendela canasa.”

Yelusalemu jwamsogolo

¹¹ AMBUJE akuŵeceta kuti, “M'mwe Yelusalemu msinda wakulaga ŵakusoŵa cikamucisyo, soni nganimkola jwakumtulasya mtima, Tinjigasalalisya maganga genu tinjitaŵa soni yilimbilimbi jenu ni maganga ga mtengo wapenani.

¹² Tinjisitaŵa sanja syenu ni maganga gecejewu. Tinjiyitaŵa yipata yenu ni maganga gakunyesimila mpela moto. Tinjitaŵa soni lipupa lyakumsyungulila ni maganga ga mtengo wapenani.

¹³ Ŵandu ŵenu tinjajiganya jika, Une AMBUJE, ŵanace ŵenu tinjapa upile ni kwapa mtendele wekulungwa.

¹⁴ Timcitamilicika mcilungamo cisyesyene. Ngasimŵa soni jwakupanika ligongo pangali cakwajogoya. Yakogoya yosope tiyiciŵa patali ngasiyiyika soni pakuŵandika.

¹⁵ Naga jwine akwajimucila ni ngondo, nganimba Une junatendekasisye iyayi. Jwalijose jwakulimbana ni ŵawoji tacilepela pakutipo timcipunda.

¹⁶ “M'manyilile kuti mundu jwakusyana yisyano nampanganyisye ni Une, jwakusawupamba moto wa makala kuti ayipanganyicisye yida. Nampanganyisye msilikali, jwakusakamulisya masengo yidayo kuti awulaje.

¹⁷ Nambo pangali cida cepanganyidwe ni m'magongo ticicimpweteka m'mwejo. Timcasisya wosope ŵitacimŵecetela ya unami. Awu uli mtuka wa jwakutumicila jwa AMBUJE, soni kupunda kwawo kukutyocela mwa Une.” Akuti myoyo AMBUJE.