Yesaya 53 - Chiyawo Bible

¹ Ŵandu ŵajanjile kuti, “Ana, ŵani ŵakulupilile utenga utulalicile? Ana ŵani ŵagamanyilile macili ga AMBUJEGA?”

² Pakuti lyaliji lisosa lya AMBUJE* kuti jwakutumicila jwakwe akule mpela mbeju jajinandi, soni mpela mciga wakumela pa litaka lyangali mesi; Jwaliji jwangali ucimbicimbi kapena kusalala kuti uwe komboleka kumlolaga kapena kumnonyela.

³ Jwalakwe ŵandu ŵanyosisye nipo ŵamkanile, jwaliji mundu jwakulagasidwa, jwakuyisyoŵelela yipwetesi. Jwaliji mpela mundu jwele acimjakwe ŵaliji kuliwunicila kumeso pakumbona. Ŵandu ŵanyosisye, nipo uwe nganitumcimbicisya.

⁴ Nditu, jwalakwe jwapimilile yisawusyo yiyaliji yakwenela kutugwila uwe, nipo jwayiweni yakupweteka yiyaliji yakwenela kutugwila uwe. Nambo uweji twaliji mganisya kuti Mlungu ni jwakumpa jwalakwejo cilango, pakumlagasya ni kumlosya yipwetesi.

⁵ Nambo ŵamsomile ligongo lya ulemwa* wetu, ŵamcanyandile ligongo lya ulemwa wetu, Jwalakwe yamgwilile yisawusyo yiyatulungamisye, ni maŵanga gakwe twaposyedwe.

⁶ Wosope twasokonecele mpela ngondolo. Jwalijose jwagambaga kulijendela mwa lisosa lyakwe, nipo AMBUJE ŵampele jwalakwejo cilango, citukajenele uwe wosope.

⁷ “Ŵandu ŵamsaŵisye ni kumlagasya, nambo jwalakwe nganaŵeceta cilicose, mpela mwakusatendela mwanace jwangondolo jwakuja najo kukumwulaga, nambo soni mpela mujikusatendela ngondolo ungaŵeceta wakwe pakujisenga nombe najo jwagambile kutama jii.

⁸ Ŵamkamwile mwa ngalwe ni kumjimba magambo, nipo ŵajaŵile najo kukumwulaga. Ana ŵani mwa acimjakwe juŵayisamele kuti jwalakwe ŵatyosedwe mcilambo ca ŵandu ŵacijumi? Ana ŵani juŵayisamele kuti jwalakwe jula jwapocele cilango ligongo lya ulemwa wa ŵandu.

⁹ Nipo lilembe lyakwe ŵaliŵisile sikati ja malembe ga ŵandu ŵakulemwa, ŵamŵisile m'malembe sikati ja ŵandu ŵakusicila, atamose kuti jwalakwe nganatenda cilicose cakulemwa soni nganaŵeceta ya unami yiliyose.”

¹⁰ Nambope ali AMBUJE jika uŵasosile kuti amlagasye, nipo ŵamlagasisye nditu. Jwalakwe jwapelece umi wakwe kuŵa mbopesi jakukulucila najo ulemwa. Myoyo taciyiwona yisukulu yakwe, taciŵa cijumi ndaŵi jajilewu, nipo lisosa lya AMBUJE tilicitendekwa mwa jwalakwe.

¹¹ Patiyicimala yisawusyo yakweyo, taciwona cakupata cakwe, nipo tacijikutila. Mwa umanyilisi wakwe jwakutumicila jwangu jwakulungamajo tacipocela cilango ca ŵandu wosope kuti ŵajinji mwa jemanja akasasimanikwa soni ŵakulemwa.

¹² Myoyo Une tinjapa ucimbicimbi wakwenela acakulungwa. Tacigaŵana yitacisumula ku ngondo ni asilikali ŵamacili, pakuti jwapelece umi wakwe ku ciwa, nipo ŵamganicisyaga kuti ali jumo jwa ŵandu ŵakukasa Malamusi. Jwanyakwile yakulemwa ya ŵandu ŵajinji, nipo jwapopelele ŵakulemwa kuti akululucidwe.