Yesaya 51 - Chiyawo Bible

Maloŵe ga kutulasya gakuja ku Yelusalemu

¹ AMBUJE* akuŵeceta kuti, “Mumbikanile jemanja ŵimkusosa kulupuka, jemanja ŵimkusosa kuti nimkamucisye. Mganicisye ya lwala luŵamsepile, ku liwunjili lya maganga kuŵamsosile.

² Mganicisye ya Abulahamu* baba ŵenu ni Sala juŵamŵelece jemanja. Pinaŵilangaga Abulahamu, ŵaliji ŵangali mwanace. Nambo napele upile, napele ŵanace, nipo nayiculwiye yisukulu yakwe.

³ Tinjiwulimbikasya mtima msinda wa Siyoni,* tinjalimbikasya mtima ŵandu ŵakutama malo gejonasice. Atamose kuti cilambo cakwe ciŵele cipululu, tinjicitendekasya kuŵa mpela mgunda wa Edeni. Atamose kuti cilambo cakwe cili litinji, tinjicitendekasya kuŵa mgunda wa AMBUJE. Kweleko ŵandu tacikondwa ni kusangalala, tacijimba nyimbo syakulumba ni kundogolela.

⁴ “Mumbikanile ŵandu ŵangu, mundejele lipikanilo, jemanja mtundu wangu. Malamusi tigacityocela kwa Une, soni cilungamo cangu ticicimulicila ŵandu wosope.

⁵ Tinjiyika mwakwanguya kukwakulupusya ŵandu ŵangu, ndaŵi jangu jakwakulupusya jili pakuŵandika. Une namsyene tinjijilamulila mitundu ja ŵandu wosope. Yilambo yakwakutalika yikunjembecela kuti mbite kweleko, akunjembeceya ni cikulupi kuti ngakulupusye.

⁶ Mlole kwiwunde, mlole cilambo capasi. Kwiwunde kucisimilila mpela lyosi, cilambo capasi ticicimala mpela cakuwala, nipo ŵandu ŵakwe wosope taciŵa mpela membe. Nambo cikulupusyo cangu ticiciŵa cangamala, nipo kukulupusya kwa une tikuciŵa kwa ndaŵi syosope.

⁷ “Mpikane jemanja ŵimkucimanyilila cilungamo, jemanja ŵimkugalondesya malamusi gangu m'mitima jenu. Mkatenda woga pa ndaŵi jele ŵandu akumjimucila mkajasa mtima pa ndaŵi jakumnyosya.

⁸ Ŵandu ŵamti myiyi tacimala mpela nguwo jelye yijosolo. Nambo cikulupusyo cangune ticiciŵa cangamala, kukulupusya kwangune tikuciŵa kwa ndaŵi syosope.”

⁹ Mjimuce, AMBUJE, mjimuce mtukamucisye! Kamucisyani ni macili genu kuti gatukulupusya, mtende mumwatendelaga kala. Ana ngaŵa ŵawoji uŵamkatile Lahabu cilombo ca m'nyasa cila ni kucisoma cijoka ca m'nyasa cila?

¹⁰ Ana ngaŵa wawoji uŵajumwise nyasa jekulungwa jila, mesi gapaŵinji mnope? Ana ngaŵa wawoji uŵapanganyisye litala pa mesi, kuti umwakulupwisye ajomboce pejumu?

¹¹ Utacakulupusya AMBUJE taciwujilila, nipo taciwujilila ku Siyoni alimkwimba nyimbo. Pangope syawo tipacigumbalidwa lukondwa lyangamala. Tacipata lukondwa ni kusengwa, canasa ni kuwuwula tiyicimala.

¹² AMBUJE akuŵeceta kuti, “Uneji ndili AMBUJE jungusinamtulasya mtima. Ana jemanja mli ŵani kuti mumjogopeje mundu jutaciwa, mwanace jwa mundu jwakusatama ni umi ndaŵi jamnono mpela manyasi?

¹³ Ana jemanja mli ŵani kuti mwaliŵalileje AMBUJE, juŵampanganyisye ni kupanganya soni kwiwunde, ni kuŵika yilimbilimbi ja cilambo capasi? Ana jemanja mli ŵani kuti ndaŵi syosope mjogopeje ukali wa ŵanganya ŵakumlagasya ŵakusosa kuti amjonanje? Ukali wa ŵandu ŵakusamlagasyawo sambano uli kwapi?

¹⁴ Wosope ŵali acikayidi tagopoledwe sampano. Ngasawa, ni kwasika mwilembe, nipo tacikola yakulya yosope yakuyisosa.

¹⁵ “Une ndili AMBUJE, Mlungu jwenu, jungusinajiwundula nyasa, Lina lyangu ndili AMBUJE Ŵamaciligosope.

¹⁶ Nagaŵisile maloŵe gangu mkamwa mwenu, nipo namteteye ni mkono wangu; nayitambalisye yakwiwunde, ni kutamilisya yilimbilimbi ya cilambo capasi. Nasalile ŵandu ku Siyoni kuti, ‘Jemanja mli ŵandu ŵangu.’ ”

Kumala kwa yisawusyo mu Yelusalemu

¹⁷ Mjimuce, mjimuce, m'mwe Yelusalemu. Ana mpikene ya mgawo wa cilango cele AMBUJE ŵampele pa ndaŵi jiŵatumbile. Mgawowo uli wakutesya lusyungusyungu, nambo m'mwejo mwawumwele mpaka senga syakwe.

¹⁸ Pangali jwine jwakumlongolela, sikati ja ŵanace ŵacalume wosope ŵimwaŵelece. Pangali atamose jumo jwakumkamula pamkono sikati ja ŵanace wosope ŵimwalelite.

¹⁹ Yisawusyo yiŵiliyi yigwile pa m'mwejo: cilambo cenu cijonasice ni ngondo, ŵandu ŵenu awile ni sala. Ana ŵani mpaka amtendele canasa? Ana ŵani mpaka amtulasye mtima?

²⁰ Ŵanace ŵenu akomwece, agonile m'matala gosope mpela ndandala syetanjile m'malwawu. Lutumbilo lwa AMBUJE lyagwilile, ni kwamuka kwakwe.

²¹ Ni ligongo lyakwe mpikane m'mwe ŵimkuyiwona yisawusyo, m'mweji ŵimkolelwe, nambo ngaŵa ni finyo.

²² AMBUJE, Mlungu jwenu, jwakusamtetela, akuŵeceta kuti, “Mlole nimsumwile myala mwenu mgawo wa cakumwa cakwatendekasya lusyungusyungu. Mgawo wele unampele ndili jwakutumbila, ngasimwa soni.

²³ Mgawowo tinjiwupeleka kwa ŵakumlagasya ŵiŵamsalilaga kuti, ‘Mgone pasi, kuti tupite pa mgongo penu.’ Mgongo wenu ŵawutesile kuŵa pasi pakuliŵata, ŵawutesile kuŵa litala lyakuti apiteje.”