Yesaya 5 - Chiyawo Bible

Nyimbo ja mgunda wa mpeleya

¹ Mumbikanile pingwimba nyimboji, nyimbo ja mjangu ni mgunda wakwe wa mpeleya: Mjangu jwakwete mgunda wa mpeleya wele uwaliji pa litumbi lya cajila.

² Ŵalimile cenene nipo ŵatyosisye tumaganga tosope, ŵapandile mbeju ja mpeleya jesagule cenene. Ŵataŵile sanja ja ulonda sikati ja mgundawo, ŵapanganyisye mwakupondela mpeleya mkati m'momo. Ŵajembecelaga kuti mgundawo tiwuciŵeleka yisogosi ya mpeleya yambone, nambo wasogwele yisogosi yakuŵaŵa.

³ Sambano mjangu akuti, “Jemanja umkusatama ku Yelusalemu, soni ŵandu ŵa ku Yuda, ngumŵenda kuti mlamule sikati ja une ni mgunda wangu wa mpeleya.

⁴ Ana pana cine soni cele cingatesile ni mgunda wangunewu, nambo nganinicitenda? Pele pinajembecelaga kuti tiwusogole mpeleya wambone, ligongo cici wasogwele yacabecabe?

⁵ “Sambano mjime kaje nimsalile yitinjitenda nawo mgunda wangu wa mpeleya. Tinjityosya lutenje lwakwe, nipo mgundawo tiwucijonasika. Tinjigumula lipupa lyakwe, nipo yinyama tiyicilya ni kuyiliŵataliŵata.

⁶ Tinjiwutenda kuŵa mgunda wangalimidwa, tiwuciŵa wangawukatila soni wangalimidwa, nipo miŵa tisicimela. Tinjigalamula mawunde kuti gakagwisya ula pa mgundapo.”

⁷ Mgunda wa mpeleya wa AMBUJE* Ŵamaciligosope uli ŵandu ŵa cilambo ca Isalaeli. Ŵandu ŵa cilambo ca Yuda ali mpeleya wakupandidwa ni AMBUJE. Ŵajembecelaga kuti ŵandu ŵeleŵa tatendeje yambone, nambo m'malo mwakwe ŵagambaga kuwulaga. Ŵajembecelaga cilungamo, nambo ŵagambile kupikana kulila kwa ŵandu ŵakulagasidwa.

Yakusakala yakusayitenda ŵandu

⁸ Likungu kwa jemanja ŵimkusagamba kusuma nyumba ŵele ŵakusagamba konjecesya migunda, mpaka kusumula malo gosope, kuti cilambo cosope ciŵe ca jemanjape.

⁹ Mbikene AMBUJE Ŵamaciligosope ali mkulumbila kuti: “Nditu, nyumba syejinji tisiciŵa masame; nyumba syekulungwa syakusalala tisiciŵa syangali ŵakutamamo.

¹⁰ Mgunda wa mpeleya wa ma ekala likumi, finyo jwakwe taciŵa malita makumi gaŵili ni gaŵili. Kumisa mbeju jakwana makilogalamu 220, yagowola yakwe tiyicigamba kuŵa makilogalamu makumi gaŵili ni gaŵili.”

¹¹ Likungu kwa ŵele ŵakusajimuka kundaŵindaŵipe ni kuwutucilaga ku yakumwa yakolelwesya, ŵele ŵakusamwaga mpaka cilo kuyicila ali akolelwe mnope.

¹² Akusajimba yida yakwimbila ya ngonji, ngoma, ni yitolilo, ni kumwaga finyo pa yindimba yawo. Nambo ŵangagasamala masengo ga AMBUJE, ŵangalola soni masengo gakugakamula ni makono gakwe.

¹³ Myoyo ŵandu ŵangune tacijigalidwa kuŵa acikapolo, ligongo lya ungapikanicisya. Acimlongola ŵawo ŵakucimbicikwa taciwa ni sala, nipo ŵandu ŵane ŵajinji taciwa ni njota.

¹⁴ Ni ligongo lyakwe ku malembe kwangajikuta, nipo kuwugwile kukamwa mnope kwembecela kumpocela jwalijose. Ŵandu ŵakumanyika cenene mu Yelusalemu yalumo ni ŵandu wamba ŵajinji, tacigwila m'malembe ali topitopi, ni kukolelwa kwawo.

¹⁵ Mundu jwalijose tacitesyedwa soni ni wosope ŵakulikwesya tacanandiya soni.

¹⁶ Nambo AMBUJE Ŵamaciligosope, tacipocela ucimbicimbi ligongo lya cilungamo cawo, Mlungu Jwamswela tacilosya uswela wakwe, pakutenda yakulungama.

¹⁷ Sambano ŵanace ŵangondolo tacilya pelepo mpela pa mopo, nipo ŵanace ŵa mbusi tacilya ku masame.

¹⁸ Likungu kwa wosope ŵakusalijigalila ulemwa* wejinji pakuŵeceta ya unami, ŵele ŵakusalepela kuligopola ku ulemwa wawo.

¹⁹ Ŵele ŵakusaŵeceta kuti, “AMBUJE ajanguye, akamule masengo gakwe mwakwanguya, kuti tugalole masengo gakwe. Mlungu Jwamswela jwa Aisalaeli atende yakuyiganisya, yitendekwe kuti tuyimanye.”

²⁰ Likungu kwa ŵele yakusakala akusayiwona mpela yambone nipo yambone akusayiwona mpela yakusakala, ŵele cipi akusaciwona mpela lilanguka, nipo lilanguka akusaliwona mpela cipi, ŵele yakuŵaŵa akusayiwona mpela yakulyolyopela, nipo yakulyolyopela akusayiwona mpela yakuŵaŵa.

²¹ Likungu kwa ŵele ŵakusaganisya kuti ali ŵalunda, nipo akusapela kuti ali ŵakalamuka.

²² Likungu kwa acalume ŵamacili ŵakusakolelwa mnope, ŵele ŵakuŵika umi wawo wosope pa kuwanganya finyo.

²³ Akusiŵalungamisya ŵandu ŵakulemwa ligongo lya yipupu ni kugasakasya magambo ga mundu jwangalemwa.

²⁴ Myoyo mpela moto muwukusajonanjila ciputu, mpela soni mwele manyasi gejumu gakusapila pamoto, myoyo soni miciga jawo tijiciwola, nipo maluŵa gawo tigacijumula ni kuguluka mpela luwundu, ligongo ŵakanile Malamusi ga AMBUJE Ŵamaciligosope ni kuganyosya maloŵe ga Ŵaswela ŵala ŵa Aisalaeli.

²⁵ Ali ni ligongo lyakwe ukali wa AMBUJE wakolelele ŵandu ŵakwe. Jwalakwejo atambalalisye ligasa lyakwe pa ŵanduwo kuti ŵape cilango. Matumbi tigatenganyice, nipo mitembo ja ŵanduwo jigambile kuti mbwee mpela yiswani pasikati pa misewu. Nambo naga Mlungu atesile myoyo, lutumbilo lwawo nganilumala, ligasa lyakwe lili citambasukulile kuti ŵape cilango.

²⁶ AMBUJE tacipeleka cimanyisyo kwaŵilanga ŵandu ŵa mtundu ŵakutali. Tacaŵilanga ŵanduwo ni lulusi kuti ayice kutyocela ku mbesi kwa cilambo capasi. Kaneko jemanjajo taciyika mwakuwutuka mnope.

²⁷ Pangali atamose jumo jutacipela kapena kukuŵala, pangali jwagwesela kapena kugona, pangali lamba jwamciwunu jutacigopoka, pangali lukonji lwakutaŵila sapato syawo lutucikatika.

²⁸ Mipamba jawo jili jakutema, mawukunje gawo gosope gali gakuwuta, yiboda ya mahaci gawo yili yakulimba mpela liganga, yigeleta yawo yili yakuwutuka mnope mpela cimbunga.

²⁹ Kubangula kwawo kuli mpela kwa lisimba, akusabangula mpela ŵanace ŵa lisimba, ŵele gakusalaga pakujikamula nyama, ni kwawulaga nasyo pali pangali atamose ni jumo jose jwakuyikulupusya.

³⁰ Pa lisiku lyelelo tacikokoma, mpela mujikusakokomela nyasa jijikusajigala cilicose cacili mwitala mwakwe ni kukokoma kwa mesi gamacili. Naga jwine akucilola cilamboco, tacigamba kulola cipi ni yisawusyo. Lilanguka tiliciŵa cipi ligongo lya mawunde.