Yesaya 48 - Chiyawo Bible

Mlungu ali AMBUJE ŵakusalamulila ya msogolo

¹ Mpikane ayi jemanja ŵa mwiŵasa lya Yakobo,* jemanja ŵakusamkolanga kuti Aisalaeli, jemanja yisukulu ya Yuda. Jemanja mkusimlumbila lina lya AMBUJE,* nipo mkusapopela kwa Mlungu jwa Isalaeli, citamileco yeleyo nganiyiŵa yakutyocela mu mtima wakuwona ni wakulungama.

² Nambope jemanja naga mkulilumba kuti mli alukosyo ŵa msinda weswela nipo kuti mkusakulupilila Mlungu jwa Isalaeli, jwele lina lyakwe lili AMBUJE Ŵamaciligosope.

³ AMBUJE akumsalila Isalaeli kuti, “Kalakala nayilocesye yele yiticitendecekwa, nayiŵecete pakamwa pangu, ni nayijenesye. Myoyo mwacisisimucisya nayitesile nipo ŵandu ŵayiweni nditu.

⁴ Namanyilile kuti ngasimkomboleka, lukosi lwenu luli mpela ayiloni soni wusyo jenu jili mpela bulonsi.

⁵ Namsalile kalakala yiticitendecekwa msogolo. Mkaniyitendecekwe nayilalicile cile kwa m'mwejo kuti mkaŵeceta kuti, Mlungu jwangu jwakupanganya ni yala ni juŵatesile yeleyi, mlungu jwangu jwakusepa ni jwagumba ni juŵalamwile kuti yeleyi yitendecekwe.

⁶ “Yosopeyi mwayipikene, sambano mlole yitendecekwe. Ana m'mweji ngaŵa mkuyijiticisya? Kutandila sambano mpaka msogolo muno tinjimsalila yindu yasambano, yindu yakusisika mkanimyimanyilila kose.

⁷ Yindu yeleyi yikupanganyidwa sambano jino, ngaŵa kuti yakalakala. Mwaliji mkanimyipikane yeleyi akaŵe lelo kogopela kuti timjileje kuti, yeleyi iyayi, nayimanyi kalakala.

⁸ Citamileco nganimyipikana atamose kuyimanyilila, kala kose mapikanilo genu nganigaŵa gewuguce. Ni ligongo lyakwe namanyilile kuti m'mwe mli jwaciswamba, nipo kuti citandilile ucanda wenu ŵamkolasile kuti jwa upandu.

⁹ “Kuti ŵandu alicimbicisye lina lyangu, ni kucelewasya lutumbilo lwangu. Kuti ŵandu alole lumbili lwangu nguwukamula mtima wangu kuti ngasinimjonanga.

¹⁰ Namswejesye nambo ngaŵa mpela silifa,* namlinjile mu ufuni wa yisawusyo.

¹¹ Yingusinayitenda, ngusinayitendela ligongo lya Une jika. Ana Une komboleka kwiticisya kuti lina lyangu alitendele mwano? Lumbili lwangu ngasinimpa jwine.”

Sailasi mlongola jwakusagulidwa ni AMBUJE

¹² AMBUJE akuŵeceta kuti, “Mumbikanile Une, jemanja yisukulu ya Yakobo ndili jwandanda soni ndili jwakumalisya.

¹³ Ni makono gangu nayitaŵile yilimbilimbi ya cilambo capasi, mkono wangu wamlyo ŵakutambasukwile kwiwunde. Pinguŵilanga cilambo capasi ni cilambo ca kwinani, yosopeyo yikusayika kwa Une pamo.

¹⁴ “Songanyani wosopemwe, nipo mpikanile. Ana nduni sikati ja milungu juŵaŵecete yeleyi mkaniyitendecekwe? Ana jwasasile kuti mundu jungumnonyela tacitenda yingusosa kuti ayitende pa msinda wa Babiloni,* ni mkono wakwe tiwucimenyana ni Akalideya?

¹⁵ Une ni junaŵecete ni kumŵilanga. Jwayice ni une nipo yosope tiyicimjendela cenene.

¹⁶ “Myice pakuŵandika sambano, kuti mpikane yele yitimbecete. Kutandila kundanda nganimbeceta mwakusisa, ndaŵi jiyatendekwaga yeleyo, Une napali.” (Sambano AMBUJE Mlungu ambele Msimu wawo nipo andumile).

Cakulinga ca Mlungu kwa ŵandu ŵakwe

¹⁷ AMBUJE mkulupusyo jwenu, Ŵaswela ŵala wa Isalaeli, akuŵeceta kuti, “Une ndili AMBUJE, Mlungu jwenu, jungusinamjiganya, kuti yindu yimjendele cenene. Ngusinamlongolela litala lyakwenela kulikuya.

¹⁸ “Mkambikanile malamusi gangu, Mtendele wenu ukamyicilile mpela mesi ga mu lusulo, cilungamo cikaliji kumwunicila ndaŵi syosope, mpela matumbela ga pa nyasa.

¹⁹ Ŵanace ŵenu akaŵele ŵajinji mpela mcenga, nipo yisukulu yenu mpela luwundu. Lina lyenu ngimkanilityosyedwa pameso pangu, atamose kusimasika.”

²⁰ Mkopoce mcilambo ca Babiloni, mtile mcilambo ca ukapolo. Mpelece utengawu ni liloŵe lya macili, mlalicile yeleyi mpaka ku mbesi kwa cilambo capasi. Msaleje kuti, “AMBUJE amkulupwisye Yakobo, jwakutumicila jwakwe!”

²¹ Piŵalongolelaga ŵandu ŵakwe myipululu, ŵanduwo nganapikana njota. Ŵapele mesi gakopoka mu lwala. Ŵalukasenye lwala, nipo mwakopwece mesi.

²² “Nambo ŵandu ŵakulemwa ŵangali mtendele,” akuti myoyo AMBUJE.