Yesaya 44 - Chiyawo Bible

AMBUJE jika ni ŵali Mlungu

¹ AMBUJE* akuŵeceta kuti, “Mpikane sambano, jemanja ŵa mwiŵasa lya Yakobo.* Jemanja Aisalaeli, mli ŵakutumicila ŵangu, ŵinamsagwile.

² Une ndili AMBUJE junampanganyisye ni kumgumba mcitumbo ca mama ŵenu, ŵele soni namkamucisyaga. Mkajogopa m'mwe Yakobo, jwakutumicila jwangu, jemanja mli ŵandu ŵangu ŵakunonyeledwa ŵele ŵinamsagwile.

³ Tinjitaga mesi pa cilambo cejumu, tinjigajendesya mesi mu sulo sya mcipululu. Tinjitumisya msimu wangu pa ŵanace ŵenu, tinjipeleka upile kwa yisukulu yenu.

⁴ Ŵelewo tacikula cenene mpela manyasi gakwitilila cenene, mpela yitela yakumela mungulugulu mwa sulo,

⁵ Jwine taciŵeceta kuti ‘Une ndili jwa AMBUJE,’ jwine taciti ali jwa mwiŵasa lya Yakobo. Jwine soni tacilemba pa mkono wakwe kuti, ‘Wa AMBUJE,’ nipo tacilikolanga kuti ali wa mwiŵasa lya Isalaeli.”

⁶ AMBUJE mwenye ni mkulupusyo jwa Isalaeli, AMBUJE Ŵamaciligosope akuŵeceta kuti, “Une ndili jwandanda soni jwakumalisya, pangali soni Mlungu jwine, nambo Une jikape.

⁷ Ana ŵani soni ŵatesile yinayitesile une? Ana ŵani uŵalocesye ya msogolo yitiyicitendekwa, kutyocela ndaŵi jandanda mpaka jambesi?

⁸ Mkajogopa kapena kutenda woga. Ana nganinamsalila yeleyi kutandila ndaŵi jakalakala? Jemanja mli mboni syangu. Ana pana Mlungu jwine pambali pa Une? Iyayi, pangali soni lwala lwine, ngangulumanyilila lwine lululose.”

Akwanyosya ŵakupanganya milungu

⁹ Wosope ŵakusapanganya milungu ali ŵacabe, milungu jakusajilumba mnope jili jangali mate. Ŵakusajilambila ali ŵandu ŵangalola kapena kuyimanyilila yindu, myoyo tacatendesya soni.

¹⁰ Pindu jakwe jili cici, kupanganya kamlungu kapena kupanganya mtembe wacabecabe?

¹¹ Wosope ŵakuwulambila mtembewo tacatesya soni. Ŵakupanganya mitembe ali ŵandu ŵacabe. Wosope asongane ni kwima pa nganya ja magambo. Wosopewo tacijogoyedwa, nipo tacitenda soni.

¹² M'misili jwa yisyano akusajigala cisyano ni kuciŵika pa moto. Ni mkono wakwe wamacili akusacipanganya mwakusosela pakamulisya masengo nyundo. Panyuma pakwe akusajipikana sala ni kumala macili, naga ngamwa mesi, akusaŵa ŵangali macili.

¹³ M'misili jwa matabwa akusapima citela pakamulisya masengo lukonji. Akusalembapo citusitusi ni cakulembela, ni kusepa ni yisyano yakwe. Akusacipanganya mpela mundu, mundu jwakwe jwakusalala kuti aciŵice m'nyumba ja mapopelo.

¹⁴ Akusayigwisya yitela ya mkungusa. Mwine soni akusasagula citela ca paini kapena ca mtundu mu ukweti. Mwine mwakwe akusapanda mtundu wine wa paini nipo ukusakula ni ula.

¹⁵ Citelaco mundu akusacitenda sasu. Nyambi sine akusakolecesya moto wakota, sine moto wakutelecela mkate. Mbali jine ja citelaco akusapanganyicisya kamlungu nikutanda kukalambila. Akusapanganya kamlungu ni kukatindiŵalilaga.

¹⁶ Mbali jine akusakolecesya moto wakocelapo nyama jele akusalya mpaka kwikuta. Akusajota motowo ni kuŵecetaga kuti, “Aa, ngupikana kutukutila! Motowu ukunong'a ngaŵa myoyo!”

¹⁷ Mbali jine jakusigalajo akusapanganya kamlungu kawo. Akusakajinamila ni kukalambila. Akusapopela kwa mlungu jwakupanganyajo ni kuŵecetaga kuti, “M'mwe mli mlungu jwangu, mungulupusye.”

¹⁸ Ŵandu ŵamti myiyi ngakumanyilila kandu soni ali ŵangapikanicisya. Meso gawo gali gangalola. Lunda lwawo lumasile, mwakuti ngaŵa mkupikanicisya.

¹⁹ Pangali jwakuganicisya, pangali jwalunda kapena jwakupikanicisya jwakuti mpaka aŵecete kuti, “Mbali jine ja citela nacijocice pamoto, pa makala gakwe najocicepo nyama ni nalile. Sambano mbali jisigeleji timbanganyicisye cindu cakunyalaya! Ana une lambileje litabwa?”

²⁰ Mundujo akutenda mpela kulya liwu, nganisyo syakwe syakusakala simsokonesye mwakuti ngaŵa mkulupusya umi wakwe. Ngaŵa soni mkuliwusya kuti ana cindu cili myala mwanguci ngaŵa ca unami?

AMBUJE ali Mkupanganya ni Mkulupusyo

²¹ AMBUJE akuŵeceta kuti, “Mkumbucile yeleyi, m'mwe Yakobo, pakuti m'mwejo mli jwakutumicila jwangu M'mwe Isalaeli ngasinimliŵalila.

²² Ndyosisye yakulemwa yenu mpela liwunde soni ulemwa* wenu mpela lipundugulu. Mwujile kwa une, pakuti nimwombwele.”

²³ Jimbani mwa lukondwa, jemanja yakupanganyidwa ya kwinani, pakuti AMBUJE akamwile masengo. Mgumile, m'mwe cilambo capasi. Mtande nyimbo, jemanja matumbi, soni jemanja ukweti ni yitela yenu yosope, ligongo AMBUJE amwombwele Yakobo, alosisye lumbili lwakwe mwa Isalaeli.

²⁴ AMBUJE Mkulupusyo jwenu, juŵampanganyisye mcitumbo mwa mama ŵenu akuŵeceta kuti, “Une ndili AMBUJE junapanganyisye yindu yosope. Pinapanganyaga ya kwinani, naliji jikape. Pandaŵi jinapanganyaga cilambo capasi ana jwapali jwine jwakungamucisya?

²⁵ Une ni jungusalepelesya mipingu ja ŵandu ŵa unami ni kwaloŵesya ŵandu ŵakulondola cisango. Une ni jungusasisya maloŵe ga ŵandu ŵalunda, ni kwalosya jemanjajo kuti lunda lwawo luli lwakuloŵela.

²⁶ Une ni jungusasimicisya maloŵe ga jwakutumicila jwangu, ni kukwanilisya yiŵaŵecete ŵa mitenga ŵangu. Une ni jungusaŵeceta ya Yelusalemu kuti ŵandu tacitama kweleko, ni kuŵeceta soni ya misinda ja ku Yuda kuti tijicitaŵidwa soni. Une tinjijimusya soni malo gawo gigagwile.

²⁷ Une ni jungusajisalila nyasa jekulungwa kuti jijumule, nipo nombe nasyo sulo syenu tinisijumusye.

²⁸ Une ni jungusaŵeceta ya Sailasi kuti, ‘Jwalakwe jula ali jwakulamula jwangu, tacitenda yosope yinguganisya! Tacilamula kuti Yelusalemu ataŵidwe soni, soni kuti yilimbilimbi ya Nyumba ja AMBUJE jiŵicidwe.’ ”