Yesaya 43 - Chiyawo Bible

Mlungu akutenda cilanga cakwakulupusya ŵandu ŵakwe

¹ Nambo sambano AMBUJE* uŵampanganyisye m'mwe Yakobo* akuŵeceta kuti, “Mkajogopa ligongo namwombwele, natesile kumŵilanga lina lyenu, mli ŵangune.

² Pitimcijomboka nyasa tinjiŵa namwe, pitimcijomboka sulo ngasimjigalwa nasyo Pitimcipitaga pamoto ngisimpya, malamba gakwe ngasigamjoca.

³ Pajatu Une ndili AMBUJE, Mlungu jwenu, ndili Ŵaswela ŵala ŵa Isalaeli, Mkulupusyo jwenu. Tinjimpeleka Iguputo pakusosa kwakulupusya wawo. Tinjimpeleka Ifiyopiya ni Seba m'malo mwa wawo.

⁴ Pakuti m'mwejo mli ŵangu ŵa pamtima, tinjapeleka ŵandu m'malo mwa m'mwejo. Ligongo lyakuti mli ŵamtengo wapenani pameso pangu, nipo ngusinamnonyela, tinjijipeleka mitundu ja ŵandu pakusosa kuwukulupusya umi wenu.

⁵ Mkajogopa, ndili namwe! “Tinjiyiwusya yisukulu yenu kutyocela kungopoko lyuŵa, ni kumsonganya wosope kutyocela kungapilo lyuŵa.

⁶ Tinjasalila ŵa ku mpoto kuti ŵalece ajawuleje tinjalamulila ŵa ku m'mwela kuti akakamula. Ŵanace ŵangu ŵacalume awujilile kutyocela ku yilambo yakutali, ŵanace ŵangune ŵa acakongwe awujilile kutyocela ku mbesi kwa cilambo capasi.

⁷ Wosopewo ali ŵandu ŵangu, napanganyisye ligongo lya lumbili lwangu, napanganyisye ni kwapa umi.”

Aisalaeli ali mboni sya AMBUJE

⁸ Mlungu akuŵeceta kuti, “Mwaŵilanje ŵandu ŵangu ku nganya ja magambo. Meso akwete, nambo ngakulola. Mawiwi akwete, nambo ngakupikana.

⁹ Mitundu josope ja ŵandu jisonganye, ŵandu ŵa myilambo yosope ayice pa magambogo; ana ŵani mwa jemanjajo ŵapakombwele kuyisala cile yeleyi? Ŵani mwa jemanjajo ŵapakombwele kutusalila yakalakala, ayice ni ŵakwatendela umboni kuti mboni sisimicisye maloŵe gawo, kuti ŵandu ŵane pakupikana aŵecete kuti, ‘Yakuwona.’

¹⁰ “Jemanja Aisalaeli mli mboni syangu, mli ŵakutumicila ŵangu unamsagwile, kuti mumanyilile ni kungulupilila, ni kuti mpikanicisye kuti Une Mlungu ndili jikape. Pasogolo pangu nganapanganyidwa mlungu jwine, nipo panyuma pangu ngasipapagwa soni jwine.

¹¹ “AMBUJE ni Unejo, Mkulupusyo jwenu ni Une jikape.

¹² Une ni junayiŵecete cile yeleyi, soni Une ni junamkulupwisye. Nganaŵa mlungu jwine jwa cilendo juŵayipanganyisye yeleyi sikati jenu. Jemanja mli mboni syangu, nguŵeceta myoyo Une AMBUJE.

¹³ Une ndili Mlungu nipo tinjitama masiku gosope. Pangali jwampaka apakombole kutila mu mkono wangu, pangali jwampaka apakombole kucenga yitendo yangu.”

Kutila kutyocela ku Babiloni

¹⁴ AMBUJE, Mkulupusyo jwenu, Ŵaswela ŵala ŵa Isalaeli, akuŵeceta kuti, “Tinjituma likuga lya ngondo kuja kukumenyana ni Babiloni,* kuti nimkulupusye. Tinjigwisya yipata ya msindawo, nipo lukondwa lwa ŵandu ŵakwe tulucitendekwa kuŵa kulila.

¹⁵ Une ndili AMBUJE, Ŵaswela ŵenu ŵala, Mkupanganya jwa Isalaeli, Une jika ndili mwenye jwenu.”

¹⁶ Kalakala kala AMBUJE ŵapanganyisye litala pa nyasa, litala pasikati ja mesi gamacili.

¹⁷ Ŵagasongenye mageleta ni mahaci, nipo soni likuga lya ngondo ni asilikali ŵamacili. Wosopewo ŵagwile ngajimuka soni, ŵasimisye ni kumalilatu papopo mpela lukonji lwa nyali.

¹⁸ Ŵalakwe akuŵeceta kuti, “Mkakumbila yakala kapena kuyiganisyaga soni yindu yiyatendecekwe kala.

¹⁹ Ngupanganya yindu yasambano. Yitandite kala kuwoneka. Ana ngimkuyiwona? Ngupanganya msewo myipululu, nipo tinampe sulo mcilambo cangali mesi.

²⁰ Yinyama yakwitinji tiyicinjimbicisya, makule ni ndiŵatiŵa sicilumba, pa ndaŵi jitinjigajendesya mesi myipululu nipo tinjijesya sulo mcilambo cangali mesi, kuti mbelece mesi kwa ŵandu ŵangu ŵasaguce.

²¹ Ŵelewo ali ŵandu ŵangu unalipanganyicisye, kuti ajimbeje nyimbo syakulumba Une.”

Ulemwa wa Isalaeli

²² AMBUJE akuti “Mwapesile ni Une, jemanja Isalaeli, nganimpopela kwa Une jemanja ŵa mwiŵasa lya Yakobo.

²³ Nganimyika kwa Une ni ngondolo kuŵa yakupeleka yakutinisya, nganimunjimbicisya ni mbopesi syenu. Nganinamlagasya pakumŵenda kuti mpelece kwa une, nganinimlagasya pakumŵenda ubani.*

²⁴ Nganimusumila mawuta gakununjila, nganimumba mawuta gakwanila ga mbopesi syenu. Nambo m'malo mwakwe jemanja musakalisye ni ulemwa wenu, mbele jwakusitopelwa ni ulemwa wenu.

²⁵ “Une nditu Unejo, ndili jungusinawutyosya ulemwa wenu, kuti ucimbicimbi wangu uwonece. Ulemwa wenu tinjiwuliŵalila, ngasingumbucila.

²⁶ Mungumbusye yakala kuti tusisyane. Ŵecetani magambo genu kulosya kuti nganimlemwa.

²⁷ Atati ŵenu ŵandanda ŵalemwisye, acimlongola ŵenu ŵala ŵandemwecesye.

²⁸ Ayimwene ŵenu ŵagasakasye malo gangu gamaswela. Ni ligongo lyakwe nakundile liŵasa lya Yakobo lijonanjidwe, nakundile kuti Aisalaeli anyosyedwe.”