Yesaya 42 - Chiyawo Bible

Jwakutumicila jwa AMBUJE

¹ AMBUJE* akuti, “Aju ni jwakutumicila jwangu jungusinamkamucisya, jungusinamnonyela, soni mtima wangu ukusasangalala najo mnope. Pa jwalakwe mbisile msimu wangu, nipo tacilamulila ŵandu ŵa ngosyo syosope mwa cilungamo.

² Jwalakwe ngasagumila kapena kugakwesya maloŵe gakwe, Pangali mundu jutacipikana soni liloŵe lyakwe mwitala.

³ Jwalakwe ngasamalisya kulitemangula litete lyeposokoce, nipo ngasasimisya moto wakusilala. Mwakulupicika tacitamilisya cilungamo.

⁴ Ngasalepela kapena kwasa mtima, mpaka ali atamilisye cilungamo pa cilambo capasi. Ŵandu ŵa yilambo yine akwembecela malamusi gakwe.”

⁵ Mlungu, AMBUJE, ŵapanganyisye kwinani ni kukutambasukula. Ŵapanganyisye cilambo ni yosope yicikusaŵeleka. Ŵapelece lipuje kwa ŵandu ŵakutama mcilambomo, soni umi kwa ŵandu ŵakwenda pa cilambopo. Ŵalakwe akuŵeceta kuti,

⁶ “Une, AMBUJE, namŵilasile kuti mtamilisye cilungamo. Kupitila mwa m'mwejo tinjitenda cilanga* ni ŵandu wosope, timciŵa lilanguka lyakumulicila ŵandu ŵa mitundu jine.*

⁷ Timciwugula meso ga ŵandu ŵangalola, Timcigopola acikayidi m'nyumba ja akayidi, timcakoposya acikayidi ŵakutama m'malo ga cipi.

⁸ “Une ndili AMBUJE, lina lyangu ni lyelelo. Ngasimbeleka kwa jwine jwalijose ucimbicimbi wangu, kapena malumbo gangu kwa milungu jakupanganya ŵandu.

⁹ Yindu yinayiŵecete kalakala yitendecekwe. Sambano cinamsalile yindu ya sambano, cinam'manyisye cile mkaniyitendecekwe.”

Nyimbo ja Malumbo

¹⁰ Mwajimbile AMBUJE nyimbo ja sampano. Ŵandu ŵimkutama mcilambo capasi mwalumbeje Ŵalakwe. Ŵimkusajenda pa nyasa ni yombo mwalumbe AMBUJE. Yakupanganyidwa yosope ya m'nyasa yalumbe AMBUJE. Ŵandu ŵa ku yilambo ya cilendo mwajimbile AMBUJE.

¹¹ Cipululu ni misinda jakwe jalumbe AMBUJE Mlungu, misi ja Akedala jatogolele. Ŵandu ŵakutama mu msinda wa Sela ŵajimbile mwa lukondwa, ajimbe kutyocela pamtepa pa matumbi.

¹² Ŵandu ŵa myilambo ya cilendo ŵalumbe AMBUJE, nipo alalicile ya ulemu wakwe.

¹³ AMBUJE akwawula ku ngondo mpela jwamkulungwa jwa ngondo, akulitendesya kuŵa jwaukali mpela mundu jwa ngondo. Akuguma, soni kutenda lisegwe lya ku ngondo. Akugalosya macili gakwe pakwapunda amagongo ŵakwe.

Mlungu tacakamucisya ŵandu ŵakwe

¹⁴ Mlungu akuŵeceta kuti, “Nganimbeceta kwa ndaŵi jajilewu, nagambile kuti jii, ngatenda kalikose. Nambo sambano ngugumila mpela jwamkongwe pa ndaŵi jakuŵeleka mwanace, ngupumula mwakaticisya nipo ndili mkupumasika.

¹⁵ Tinjigajonanga matumbi ni yikwesya, manyasi ni yitela yili kweleko tinjiyijumusya. Sulo tinjisitenda kuŵa yilumba, matamanda tinjigatenda kuŵa matamanda ga mesi.

¹⁶ Tinjalongolela ŵandu ŵangalola m'misewu janganajimanyililaga, tinjapecesya pa matala ganganapitila kala kosope. Cipi ca kusogolo kwawo tinjicitenda kuŵa lilanguka, malo gelemale tinjigatenda kuŵa gambone. Ayi yinduyi tinjiyitenda nipo tinjiyimalisya ngayilecela petala.

¹⁷ Wosope ŵakusajikulupilila milungu jine, ŵakusajikolanga milungu jinejo kuti, ‘Mli milungu jetu,’ tacanandiya ni kwatendesya soni.”

Kulepela kulijiganya kwa Isalaeli

¹⁸ AMBUJE akuŵeceta kuti, “Mpikane, jemanja ŵangapikana! Mwugule meso jemanja ŵangalola kuti mlole!

¹⁹ Ana pana jwine jwangalola mpela jwakutumicila jwangu? Ana ŵani ŵali ŵangapikana mpela jwamtenga jungumtuma? Ana pana jwine jwangalola mpela jwakulupicika jwangu? Ana ŵani ali ŵangalola mpela jwakutumicila jwa AMBUJE?”

²⁰ Myiweni yindu yejinji, nambo nganimkamulisya masengo. Mkwete mapikanilo gakupikanila nambo pangali cimpikene.

²¹ Ligongo lyakulungama kwa AMBUJE caliji cakwanonyela kuti malamusi gawo gaŵe gakupunda soni gakucimbicikwa.

²² Nambo sambano agasumwile kwa ŵandu ŵeleŵa ni kwasumula soni yindu yawo; wosopewo ŵakamwile pakwagwisya m'masimbo, ni ŵasisile m'nyumba sya akayidi. Ŵasumwile yindu yawo ngapata jwakwakulupusya, ŵajiŵile yindu yawo ngasimanikwa jwakuti, “Myiwusye!”

²³ Ana pana jwine mwa jemanja jutaciyipikanila yeleyi? Ana ŵani utacitejela lipikanilo ni kupikanila soni kuyilondesya ndaŵi ja msogolo?

²⁴ Ana ŵani uŵampelece Yakobo* kwa ŵandu ŵakusumula yacimsyene? Ana ŵani uŵampelece Isalaeli kwa ŵandu ŵawiyi? Ana jwakuyitenda yeleyi ngaŵa AMBUJE? Pajatu twamlemwecesye, nganitugakuya matala gakwe, soni nganitugapikanila malamusi gakwe.

²⁵ Myoyo ŵatutumbilile mnope, ni kutusawusya ni ngondo. Lutumbilo lwakwe lwakolele mpela moto pa malo gosope, nambo uwe nganitupikanicisya. Moto watujocile nambo nganitupata lijiganyo pa yiyatendecekweyi.