Yesaya 41 - Chiyawo Bible

Mlungu akwalimbisya mtima Aisalaeli

¹ Mlungu akuŵeceta kuti, “Mtame jii nipo mumbikanile, jemanja yilambo ya mungulugulu nyasa. Ŵandu ŵa mitundu josope apate macili gasambano. Asejele ciŵandika soni aŵecete. Kwende tuŵe pampepe pa magambo kuti atulamule.

² “Ana ŵani uŵayice najo jwakupunda pa ngondo kutyocela kungopoko lyuŵa, juŵaliji mkupunda kulikose kujwapitaga? Ana ŵani uŵamkamucisyaga kuti ajipunde mitundu jine ja ŵandu, ni kwapunda ayimwene? Upanga wakwe waliji mkwatendesya ŵanduwo kuŵa mpela luwundu lwapasi. Ukunje wakwe waliji mkwapwilinganya mpela mipesi.

³ Jwaliji mkwakuya soni jwajendaga mwangasawusya, m'matala gimkanagamanyilila kala kosope.

⁴ Ana ŵani ŵayitesile yeleyi mpaka kuyimalisya? Ana nganaŵa juŵajitandisye mitundu josope ja ŵandu? Ni Unejo, AMBUJE,* jundili Ndande, nipo tinjiŵa jujojo sikati ja ŵakumalisya.

⁵ “Ŵandu ŵa myilambo ya mu ngulugulu nyasa ayiweni yindesile, woga wakamwile soni alimkutetemela. Akusejela pakuŵandika, akwisa.

⁶ Jwalijose akumkamucisya mjakwe.

⁷ M'misili jwakupala matabwa akumsalila m'misili jwakunyelenyendula golidi* kuti ‘Mtesile cenene!’ Mundu jwakusakong'onda mtembe ni nyundo akumlimbikasya jwakusakong'onda pa cipala, pakuŵeceta yakocelela akusati, ‘Mkocelele cenene.’ Kaneko akusacikomelela cilandanyoco ni misomali kuti cikatenganyika.

⁸ “Nambo m'mwe Isalaeli jwakutumicila jwangu, m'mweji Yakobo* jwele junamsagwile, m'mwejo mli cisukulu ca Abulahamu,* mjangu.

⁹ Namjigele kutyocela ku mtepa kwa cilambo capasi, Namŵilasile kutyocela ku upande wakwakutalika wa cilambo capasi. Nipo tinjimsalila kuti, ‘M'mwejo mli jwakutumicila jwangu.’ Ngininimjasa, nambo namsagwile.

¹⁰ Mkatenda woga pakuti Une ndili ni m'mwejo, Une ndili Mlungu jwenu, mkajasa mtima. Tinjimpa macili, soni kumkamucisya, Tinjimcinjilicisya ni mkono wangu wamlyo wakupunda pa ngondo.

¹¹ “Mwakuti wosope ŵakumpila mtima tacitenda soni ni kunyosyedwa. Ŵakuputa ngondo ni ŵawo, taciŵa mpela ŵangali macili, nipo taciwa.

¹² Timcasosasosaga amagongo ŵenu, nambo ngasimwasimana. Uŵaputaga namwe ngondo taciŵa ŵangali kose macili.

¹³ Pakuti, Une, AMBUJE Mlungu jwenu, ngumlimbisya ni kumsalila kuti, ‘Mkatenda woga; tinjimkamucisya.’ ”

¹⁴ Une ndili AMBUJE Mlungu jwenu; Ngumlimbikasya ni kumsalila kuti, “Atamose mli ŵangali macili mpela nyongolosi, mkatenda woga, ligongo tinjimcinjilicisya. Une, Mlungu Jwamswela jwa Isalaeli, ndili jwakumkulupusya soni jwakumcinjilicisya.

¹⁵ Tinjimsandusya kuŵa mpela cida cakuputila tiligu casambano ca meno gakutema mnope. Timcikasa matumbi ni kugatikitatikita; matumbi gamwana timcigasandusya kuŵa mpela luwundu.

¹⁶ Timcapeta, ni ticiwululuka ni mbungo ni kumwasikana ni mbungo jamacili. Nambo m'mwejo timcikondwa ligongo lyakuti une ndili Mlungu jwenu. Timcipata ucimbicimbi ligongo lya une, Jwamswela jula jwa Isalaeli.

¹⁷ “Pakusosa mesi ŵandu ŵa usawuci ni ŵakusoŵa, nambo ni ngagasimana, nipo ngulo syawo sili sijumwile ni njota, Une, AMBUJE tinjijanga lipopelo lyawo, Une, Mlungu jwa Isalaeli ngisinajasa jemanjajo.

¹⁸ Tinjisitesya sulo kujilima m'matumbi gangali mesi, nipo mesi tigacikopoka mu nduluko sya mesi mu yiŵata. Tinjicitesya cipululu kuŵa litamanda lya mesi, soni cilambo cangali mesi kuŵa ca nduluko sya mesi.

¹⁹ Tinjicigumbasya cipululu ni yitela yakulekanganalekangana ya mkungusa, akesha,* mcisu ni olifi.* Tinjipanda yitela ya paini mitundu jitatu mcilambo cangali mesi.

²⁰ Pakutenda myoyo ŵandu taciyiwona ni kumanyilila kuti, Une, jundili AMBUJE niyitesile yeleyi, kuti Ŵaswela ŵa Isalaeli ni uŵayilinganyisye yeleyi.”

AMBUJE akujinyosya milungu ja unami

²¹ AMBUJE Mlungu jwa Aisalaeli, akuti: “Jemanja milungu ja mitundu ja ŵandu, msale magambo genu. Myice ni ma umboni genu gimkwete!

²² Myice akuno, mtusalile ya kusogolo, kuti tumanyilile ndaŵi jitiyicitendekwa. Mtusalile muyaŵelele yindu kalakala kuti tuyiganicisye, ni kuyimanyilila yakuyicisya yakwe.

²³ Mtusalile yitiyicitendekwa msogolo kuti tusimicisye kuti jemanja mli milungu jisyesyene. Mtende yambone kapena yakusakala, kuti mtusimonjesye ni kututendesya woga.

²⁴ Jemanja ngaŵa kose kandu, soni yakutenda yawo yili yangali mate; kwalambila jemanja kuli kulisakasya.

²⁵ “Sagwile mundu jwine kumpoto, nipo juyice kala, kutyocela kungopoko lyuŵa nipo taciŵilanjila pa lina lyangu. Jwalakwe akasiŵapunda ŵakulamulila mpela akuliŵata lilongo, mpela mwakusatendela mundu jwagumba yiŵiga pakuliŵata lilongo.

²⁶ Ana ŵani mwa jemanja juŵatusalile yeleyi kala kuti tiyicitendekwa, kuti tupakombole kuŵeceta kuti jemanjajo ŵapakombwele? Pangali atamose jumo jwa jemanja juŵayiŵecete, soni pangali juŵapikene maloŵe ga ŵalakwe.

²⁷ Une, AMBUJE, naliji jwandanda kumsalila Siyoni* utenga wambone, Namtumile jwamtenga ku Yelusalemu kukusala kuti, ‘Ŵandu ŵenu akwisa! Akwisa kumusi kuno!’

²⁸ Pinajilolite milungujo pangali ni jumo jose jungumsimana jwakuti mpaka apelece msyungu, pangali jwampaka ajanje yiwusyo yangu.

²⁹ Milungu josopeji jili jacabe nditu pangali masengo gampaka jitende, jili jangali macili.”