Yesaya 40 - Chiyawo Bible

Maloŵe gakupeleka cembeceyo

¹ Mlungu jwenu akuŵeceta kuti, “Mwatulasye mtima, mwatulasye mtima ŵandu ŵangu.

² Mwalimbikasye mtima ŵandu ŵa ku Yelusalemu. Mwasalile kuti ndaŵi ja yisawusyo yawo jimasile, ulemwa* wawo ukululucidwe. Napele cilango ndaŵi jajilewu ligongo lya ulemwa wawo.”

³ Kukupikanika maloŵe gakuti, “Linganyani Litala lya AMBUJE* mwitinji, Kolosyani litala lya Mlungu jwetu mcipululu.

⁴ Ciŵata cilicose acigumbasye, litumbi ni cikwesya cilicose ayitulusye. Cilambo cesokocesokoce ni yikwesya ayitende yiŵe ya tyatyatya.

⁵ Myoyo lumbili lwa AMBUJE tuluciwoneka, ŵandu wosope taciluwona. AMBUJE asyene ni uŵaŵecete yeleyi.”

⁶ Kwapikanice maloŵe gakuti, “Mlalicile utenga.” Myoyo une nawusisye kuti, “Ana ndalicile utenga wakuti cici?” Ni ŵanjanjile kuti, “Mlalicile kuti ŵandu wosope ali mpela manyasi. Usalale wawo uli mpela maluŵa ga kwitinji.

⁷ Manyasi gakusajumula, maluŵa gakusanyala, naga ayipujile mbungo jakwe AMBUJE. Nditu ŵandu nganaŵa ŵakulekangana ni manyasi.

⁸ Manyasi gakusajumula, maluŵa gakusanyala, nambo maloŵe ga Mlungu jwetu tigaciŵa citamile mpaka kalakala.”

⁹ Mkwele petumbi lyelewu, m'mweji ŵimkwisa ni ngani syambone ku Yelusalemu. Mŵecete ni maloŵe gamacili, m'mweji ŵimkwisa ni ngani syambone ku Siyoni.* Mŵecete mwakupikanika, mkajogopa. Mwasalile ŵandu m'misinda ja ku Yuda kuti, “Mlungu jwenu akwisa.”

¹⁰ Nditu, AMBUJE Mlungu akwisa kukulamula mwamacili, nipo alimkulamulila ni mkono wakwe. Akwisa ali ajigele mbote jakwe, soni mbote jakwe jili pasogolo.

¹¹ Tacisilanga ngondolo syakwe mpela mkucinga. Tacasonganya ŵanace ŵangondolo ni kwanyakula m'miyala mwakwe. Ngondolo sikwete ŵanace tacisilongolela cenene.

Mlungu Jwamaciligosope jwa Isalaeli

¹² Ana ŵani ŵagalinjile mesi ga m'nyasa ni ligasa lyawo, kapena kupima ulewu ŵakwinani ni mkono wawo? Ana ŵani uŵalinjile litaka lyosope lya cilambo capasi ni citundu? Ana ŵani uŵalinjile kusitopa kwa matumbi ni yikwesya pa sikelo?

¹³ Ana ŵani uŵalinjile juŵalamulile AMBUJE yakuti atende? Nduni juŵajiganyisye kandu mpela jwakupeleka upungu?

¹⁴ Ana AMBUJE ŵawusisye ŵani, kuti ayimanyilile yindu? Ana ŵani uŵajiganyisye kulamula mwakulungama? Ana ŵani uŵajiganyisye kuyimanya yindu? Ana ŵani uŵajiganyisye litala lyakuyipikanicisya yindu?

¹⁵ Kwa AMBUJE, mitundu ja ŵandu jili mpela lidondo lya mesi mu lulo, jili mpela luwundu cabe pa sikelo. M'myala mwa AMBUJE, yilumba yili yangali usito mpela luwundu.

¹⁶ Yinyama yosope ya mu ukweti wa Lebanoni yili yangakwanila kupeleka mbopesi kwa Mlungu, soni yitela yakwe yili yamnono kolecesya moto.

¹⁷ Mitundu josope ja ŵandu nganijiŵa kandu kose pameso pa AMBUJE, Ŵalakwe akusajiwanicisya kuŵa jacabe soni jangali mate.

¹⁸ Ana ŵani mpaka mwalandanicisye ni Mlungu? Ana cici campaka acilandanicisye ni Mlungu?

¹⁹ Kuŵaga tumilungu twakupanganya ni yala m'misili ni jwele jwakusayipanganya kaneko m'misili jwa golidi* akusasalalisya ni golidi, ni kulisalalisya ni ceni wa silifa.*

²⁰ Mundu jwa usawuci, jwampaka ngapakombola kuyipata yakupelecela mbopesi, akusasagula citela cele ngasiciwola. Akusasosasosa m'misili jwakuti ampanganyicisye mtembe wele ngasiwutenganyika.

²¹ Ana nganim'manyilila? Ana nganimpikana? Ana kundanda kosope nganamsalila? Ana nganimpikanicisya yakapanganye ka cilambo capasi?

²² Cilambo capasi ŵacipanganyisye ŵalakwe, ŵakusatama pa citengu ca ucimwene, pasyeto pa liwunde. Pakwalola ŵandu mcilambo capasi akusaŵa mpela yitete. Ŵakutambasukwile kwiwunde mpela nguwo jakuwunicila, mpela citenti mwakutama ŵandu.

²³ Ayimwene ŵamacili akusiŵagwisya, ŵakulamulila cilambo akusiŵatenda kuŵa ŵangasosekwa.

²⁴ Jemanja ali mpela mbeju syepande sampano, kapena mbeju simisidwe sampano, syagamba kutanda kumela kwene miciga. Pakutumisya mbungo AMBUJE, mbeju sikusajumula, nipo cimbunga cikusasigulusya mbeju mpela mipesi.

²⁵ Ana Mlungu Ŵaswela komboleka kwalandanya ni ŵani? Ana pana jwine mpela ŵalakwe?

²⁶ Mlole kwiwunde. Ana ŵani uŵapanganyisye ndondwa simkusiwona? Ŵalakwe akusasilongolela mpela likuga lya ngondo, nipo jilijose akusajikolanga ni lina lyakwe. Pakuti kulimbangana ni macili gawo yili yekulungwa, pangali atamose jimo jajikusasoŵa.

²⁷ Ana ligongo cici mkuŵeceta m'mwe Yakobo?* M'mwe, Isalaeli, ana ligongo cici mkuŵeceta kuti AMBUJE ngakumanyilila ya yisawusyo yenu, kapena kuti ngakuganicisyapo ya m'mwejo?

²⁸ Ana ngimkumanyilila? Ana nganimpikana? AMBUJE, ali Mlungu jwacitamile jwangamala, juŵapanganyisye cilambo capasi. Ŵangapela kapena kusakalika. Pangali jwakusasimanyilila nganisyo syawo.

²⁹ Akusiŵalimbikasya ŵangali macili, ni ŵakupela akusiŵajonjecesya macili.

³⁰ Atamose acacanda akusaŵa ŵangali macili, atamose acacanda ŵacalume akusakuŵala ni kugwa.

³¹ Nambo ŵakusiŵakulupilila AMBUJE tacipocela macili gasambano, taciguluka mpela cijuni cakolanjidwa ngwasi. Taciwutuka nambo ngasapela, tacijenda nambo ngasaŵa ŵangali macili.