Yesaya 4 - Chiyawo Bible

¹ Pa lisiku lyelelo acakongwe msano ni ŵaŵili tacimkamula jwamlume jumo ni kuŵeceta najo kuti, uweji citulyeje yakulya yetu ni kuwala yakuwala yetu; nambo wawo atujiticisye kuti ŵandu atukolanjeje ni lina lya ŵalakwe kuti tuli ŵamkwawo, kuti soni sya ungalombedwa sityoce pa uwe.

Yelusalemu taciwucisidwa soni

² Lisiku lyelelo AMBUJE* taciyitenda yakumela yiliyose ni yitela ya mcilambo kuti yikule soni tiyiciŵa yakusalala. Ŵandu wosope ŵa ku Isalaeli utaciŵa ali cijumi tacisengwa ni kulilumba ligongo lya yakumela yeleyi.

³ Sambano wosope utacisigala ku Siyoni* ŵele Mlungu ŵasagwile kuti aŵe cijumi ku Yelusalemu, tacikolanjidwa kuti ŵaswela.

⁴ Pelepo AMBUJE taciŵa ali ŵajojesye acakongwe ŵa ku Siyoni kuyityosya yakusakala ya jemanjajo, nipo taciŵa ali ajicapile miasi jijasulusidwe mu msinda wa Yelusalemu. Mlungu taciyitenda yeleyi ni msimu wakulamula soni msimu wa moto.

⁵ Sambano musi, AMBUJE taciŵika liwunde ni lyosi kusyungula litumbi lyosope lya Siyoni ni pacanya pa ŵandu ŵakwe wosope. Nipo cilo taciŵika moto wakunyesimila. Pacanya pa yosopeyi tipaciŵa lumbili lwakwe lwa Mlungu.

⁶ Lumbili lwakwe tuluciŵa m'bwilili wakutililamo citukuta ca musi, tiwuciŵa malo gakutililapo mbepo ni ula.