Yesaya 36 - Chiyawo Bible

Asiliya akuwujogoya msinda wa Yelusalemu

¹ Mcaka ca 14 ca ucimwene wa Hesekiya, juŵaliji mwenye jwa ku Yuda, Senakelibu mwenye jwa Asiliya ŵaputile ngondo ni misinda josope ja mapupa ga ku Yuda, ni kujisumula.

² Panyuma pakwe ŵamtumile kasembe kutyocela ku Lakishi, kwawula ku Yelusalemu ni likuga lyekulungwa lya ngondo kukwakanganicisya Mwenye Hesekiya kuti alipelece. Kasembejo ŵajimi ciŵandika ni ngalande ja mesi jakutyocela ku litamanda lya kumkuli, pa msewu wekulungwa wakwawula ku malo ga m'misili jwakuswejelesya nguwo.

³ Ŵandu ŵatatu ŵatulwice mu msinda ni kuja kusimana najo. Ŵandu ŵakwe ŵaliji: jwamkulungwa jwakulolela nyumba ja mwenye, lina lyakwe Eliyakimu mwanace jwa Hilikiya, Shebina jwakulembela jwa pa luŵala, ni Yowa mwanace jwa Asafu, jwakulembela yakutendecekwa.

⁴ Kasembe jula jwatite kuti mwasalile Hesekiya kuti mwenye jwamkulungwa, mwenye jwa ku Asiliya akuti cikumlimbisya cikulupi cenu mwamti myiyi ni cici?

⁵ “Ana mkuganisya kuti maloŵepe mpaka komboleka kulandana ni lunda ni macili pa ngondo? Ana mkwakulupilila ŵani kuti munjimucileje?

⁶ Mkwembecela kuti Iguputo tacimkamucisya, nambotu kutenda yele kuli mpela kukulupilila litete lyetemanguce lyele mpaka likombolece kumsoma mundu m'miyala naga alimkamulisya masengo mpela simbo jakwendela. Amu ni mwakusatendela Mwenye jwa ku Iguputo kwa jwalijose jwakumkulupilila jwalakwejo.”

⁷ “Ana mwine timusalile kuti mkusakulupilila AMBUJE* Mlungu jwenu. Ana ngaŵaga Mlungu jujojo jwele malo gakwe gakulambila ni gakupelecela mbopesi ŵayimasisye Hesekiya, ni kwasalila ŵandu ŵa ku Yuda ni Yelusalemu kuti, mpopeleje pa malo gakupelecela mbopesi aga ku Yelusalemu?

⁸ Kwende sambano mkambilane ni ambuje ŵangu, mwenye jwa ku Asiliya: Tinjimpa mahaci 2,000 naga mpaka mwapate ŵandu ŵakwelapo.

⁹ Ana mpaka mpakombole uli kupunda pakuti atamose jumo jwa akasembe ŵanandinandi ŵa ambuje ŵangu, kutendaga mkukulupilila Aiguputo, kuti camtumicisye yigaleta ni ŵandu ŵakwela mahacigo?

¹⁰ Ana ngamkumanyilila soni kuti ali AMBUJE uŵandendekasye kuti mbice akuno, kuti nacipute cilambo cenu ni kucijonanga? AMBUJEWO ni uŵasalile kuti limbane naco ni kucijonanga cilambo acino.”

¹¹ Pelepo Eliyakimu, Shebina ni Yowa ŵaŵecete ni kasembejo kuti, “Conde atuŵecete mciŵeceto ca ci Alamu, ligongo tukusacipikana. Akusatuŵecetela Cihebeli ligongo ŵandu wosope ŵali pa mapupa akupikanila.”

¹² Kasembe jula jwatite, “Ana mkupela kuti une andumile kuti mbecete maloŵe gelega kwa jemanja ni mwenye jwenupe? Iyayi, nguŵeceta soni kwa ŵandu ŵatemi pa mapupawo, ŵele akwenela kulya manyi gawo ni kumwa makweso gawo, mutimcitendela jemanja.”

¹³ Myoyo kasembe jula jwajimi nikuŵeceta mwakwesya maloŵe mu cihebeli kuti, “Mpikane maloŵe ga mwenye jwamkulungwa, mwenye jwa ku Asiliya.

¹⁴ Mwenyejo akuti mkasimumkunda Hesekiya kuti anyenjeje ligongo ngasakombola kumkulupusya.

¹⁵ Akusamkanganicisya kuti mwakulupilile AMBUJE pakwasalila kuti mwangakayicila kose AMBUJE ŵenu tacimkulupusya, nipo kuti mwenye jwa ku Asiliya ngasawusumula msinda wenuwu.

¹⁶ Kasimumpikanila Hesekiya. Mwenye jwa ku Asiliya akumlamulila kuti mkopoce mu msindawo, nipo mlipelece mwakugonja. Pitimtende myoyo, jwalijose mwa jemanja tacilyaga mpeleya ni mkuju wakwe ni kumwaga mesi ga mcisima cakwe.

¹⁷ Tacitenda yeleyi mpaka ndaŵi jele mwenyejo tacimjigala kwawula ku cilambo cakulandana ni cenuci, cilambo cicikwete mipeleya jakupanganyicisya finyo ni tiligu jwakutelecela mkate.

¹⁸ Jemanja mkalamuce, Hesekiya akasamloŵesya pakumsalila kuti AMBUJE tacimkulupusya. Ana pana mlungu jwalijose mwa milungu ja ŵandu ŵa mitundu juŵakombwele kucikulupusya cilambo cakwe kwa mwenye jwa ku Asiliya?

¹⁹ Ana milungu ja Alipadi ni Hamati jili kwapi sambano? Nambi milungu ja Sefalafayimu jili kwapi? Ana milungujo jawukulupwisye msinda wa Samaliya kwa ambuje ŵangu?

²⁰ Ana ni japi mwa milungu ja yilamboyi jele jayikulupwisye yilambo yakwe kwa mwenye jwetu, kuti wawoji aŵeceteje kuti, AMBUJE mkomboleka kumkulupusya Yelusalemu kwa mwenye jwetujo?”

²¹ Nambo ŵandu ŵagambile kutama jii, nganajanga kandu kalikose, ligongo Mwenye Hesekiya ŵasalile kuti, “Mkasimumjanga iyayi.”

²² Pelepo Eliyakimu mwanace jwa Hilikiya juŵalolelaga nyumba ja mwenye, Shebina jwakulembela jwa luŵala ni Yowa mwanace jwa Asafu, juŵalembaga yiyatendecekwaga, ŵapapwile yakuwala yawo mwa canasa, nipo ŵayice kwa Mwenye Hesekiya ni kwasalila yiyaŵecetedwe ni jwamkulungwa jwa ku Asiliya.