Yesaya 34 - Chiyawo Bible

Mlungu tacipeleka cilango kwa amagongo ŵakwe

¹ Ŵandu ŵa ngosyo syosope, myice! Msongane kuti mpikane, jemanja ŵandu wosope myice akuno kuti mpikanile.

² AMBUJE* ayitumbilile yilambo yawo yosope, agapilile mtima makuga gawo gosope ga ngondo, soni asimicisye kuti tacijonanjidwa, ŵapelece kuti awulajidwe.

³ Mitembo jawo ngasajisika, nambo tacigamba kujileka kuti tijiwoleje ni kunungaga, nipo matumbi tigacicejela mpela miasi.

⁴ Lyuŵa, lwesi ni ndondwa tiyicinyelenyendukuka, nipo kwiwunde tikucipindika mpela mwakusatendela ni cipukutu ca yakulembedwa. Ndondwa syosope sicigwa mpela mugakusatendela masamba ga mpeleya kapena mkuju.

⁵ AMBUJE akuŵeceta kuti, “Upanga wangu niwukolosisye kala kwinani. Ana ngaŵa welewu uwukutuluka kukwapa cilango Aedomu, ŵandu ŵanasimicisye kuti najonanje.”

⁶ Upanga wa AMBUJE wana miasi jejinji, soni wana mawuta. Miasi jakwe ja ŵanace ŵangondolo ni mbusi, nipo mawuta gakutyocela ku mbyo sya ngondolo syasilume. AMBUJE akuja kutaga mbopesi mu msinda wa Bosila, ni kuti kuwulajidwa kwa ŵandu ŵajinji mcilambo ca Edomu.

⁷ Njati ni ng'ombe syasilume syasinandi ni syekulungwa, tisiciwulajidwa yalumo ni ŵandu. Cilambo cosope ticicijoloŵa ni miasi, nipo litaka lyawo tilicigumbala ni mawuta.

⁸ Aji jili ndaŵi jele AMBUJE tacikulupusya Siyoni,* ni kuwucisya pakupeleka cilango kwa amagongo ŵakwe.

⁹ Mesi ga sulo sya ku Edomu tigacitendekwa kuŵa lipula, nipo litaka lyakwe tilicitendekwa kuŵa maganga ga sulufule.* Cilambo cosope ticicitendekwa kuŵa lipula lya moto.

¹⁰ Motowo tiwucikolela cilo ni musi, nipo lyosi licikwela kwinani ndaŵi syosope. Cilambo ticiciŵa cipululu mpaka kalakala. Pangali atamose mundu jumo jutacipajenda soni mwelemo.

¹¹ Yisyamtima ni makungulu tiyicijigala cilamboco kuŵa cawo. AMBUJE tacicitenda kuwa cilambo cangali yakumela, mpela muyaŵelele mkanicipanganyidwe.

¹² Tipaciŵa pangali mwenye jwakucilamulila cilamboco, nipo acimlongola ŵakwe wosope taciŵa ali ŵatyosisye.

¹³ Miŵa tisicimela m'nyumba syakwe syakucinjilicisidwa sya ngondo nipo matungwisa tigacimela mu ndenje syawo. Makule ni yisyamtima yicitamaga mwelemo.

¹⁴ Yiwulu yicisimanaga ni matunu, yiŵanda tiyiciŵa mkuŵilangana. Kweleko soni tikuciyika misimu jakusakala,* ja cilo, nipo tiyijisimana malo gakupumulila.

¹⁵ Yisyamtima yicitaŵa yisusi yawo ni kutajilaga mandanda, nipo yicisosola ŵanace ni kwasamalilaga kukoko. Matumbusi tigacisongana kweleko, lililyose tiliciŵa ni mjakwe.

¹⁶ Mwungunyewungunye ni kuŵalanga m'buku ja AMBUJE. Pangali yakupanganyidwa yiliyose yicisoŵa, pangali soni yicisimanikwa yili yangali mjakwe. Pakuti AMBUJE alamwile kuti yiŵe myoyo, nipo msimu wakwe uyisonganyisye malo gamo.

¹⁷ AMBUJE ni ŵitacicigaŵanya cilamboco sikati ja jemanjajo, jwalijose tacimpa mbali jakwe. Tacitama mcilambomo kwa yaka ni yaka, nipo cilamboco ticiciŵa cawo mpaka ndaŵi syangamala.