Yesaya 3 - Chiyawo Bible

Yisawusyo mu Yelusalemu

¹ Sambano, AMBUJE* Ŵamaciligosope, ali ciŵandika kumsumula kutyocela ku Yelusalemu ni Yuda cikamucisyo ca mtundu uliwose cakusacikulupilila ŵandu. Taciyijigala yakulya yosope, tacigatyosya mesi gosope,

² ŵandu ŵamacili ni asilikali ŵa ngondo, ŵakulamula ŵawo, ŵakulocesya ŵawo, ŵamatipwi ni acakulungwa,

³ acakulungwa ŵa ngondo ŵakulongolela makuga ga asilikali 50 pa likuga limo, ni ŵandu ŵakucimbicikwa mcilambo, apungu ni ŵamatipwi nipo soni akaswili ŵa yilisi.

⁴ AMBUJE tacaŵicila acacanda kuŵa ayimwene ŵawo, nipo ŵanace ŵamakandi ni wutacalamulila.

⁵ Nipo ŵandu tacilagasyana jwine ni mjakwe, jwalijose tacimlagasya mjakwe. Acacanda tacatendela cipongwe acakulungwa, nipo ŵandu ŵangamanyika tacanyosya ŵandu ŵakucimbicikwa.

⁶ Mundu tacimkamula mlongo mjakwe m'nyumba ja atatigwe, ni kuŵeceta najo kuti, “M'mwejo mkwete malaja, myoyo mŵe mlongola jwetu, mu ndaŵi ja yisawusyoji.”

⁷ Nambo pa lisiku lyelelo mlongo mjakwejo taciti kuti, “Une iyayi, yisawusyo yamti myiyi jwangali mtela wakwe, m'nyumba mwangu mwangali yakulya soni yakuwala. Mkandenda une kuŵa mlongola jwa ŵandu.”

⁸ Yakuwona nditu Yelusalemu akonasika, nipo Yuda alimkugwa, ligongo lyakuti uŵecete ni yitendo ya ŵandu mwelemo yili yakwajimucila AMBUJE. Akumnyosya Mlungu pakulanguka.

⁹ Uwonece wa ngope syawo sikulosya kuti jemanja mli ŵakulemwa mpela muŵatendelaga ŵandu ŵa ku Sodomu, myoyo jemanja ŵangalinga kusisa kose. Likungu kwa jemanjajo, lyatesile kuliŵilanjila acimsyene.

¹⁰ Mwasalile ŵakulungama kuti, akwete upile pakuti yindu tiyicajendela cenene, tacisangalala ni pindu ja masengo gawo.

¹¹ Nambo likungu kwa ŵandu ŵakusakala! Yindu tiyicasakalila jemanjajo. Yindu yaŵele alimkwatendela acimjawo tiyicatendekwela jemanja.

¹² Ŵandu ŵangu, ŵele ŵakumlagasya ali acacanda, nipo ŵele ŵakumlamulila ali acakongwe. Aa! Ŵandu ŵangu, acimlongola ŵenu ni ŵakumsokonesya, akumsokonesya m'matala genu.

AMBUJE akwalamula ŵandu ŵakwe

¹³ Sambano AMBUJE atemi pa citengu cawo kuti agatande magambo, ali cile kuti ŵalamule ŵandu ŵakwe.

¹⁴ AMBUJE akwajimba magambo acakulungwa ni acimlongola ŵa ŵandu ŵakwe. AMBUJE akuti, “Jemanja mjonasile mgunda wangu wa mpeleya. Nyumba syenu sigumbele ni yindu yakusumula kwa ŵandu ŵakulaga.

¹⁵ Mkwalagasya ŵandu ŵangu ligongo cici? Ana ligongo cici mkwalila ŵandu ŵangune masuku pa mtwe?” Akuti myoyo AMBUJE Mlungu Jwamaciligosope.

Maloŵe gakwatetela acakongwe ŵa ku Yelusalemu

¹⁶ AMBUJE akuti, “Acakongwe ŵa ku Siyoni* ali ŵakulikwesya: Akusajenda ali alewiye ngosi syawo, akusiŵalola acalume ni meso gakwanyenga. Akusajenda panandipanandi, ni kuyilisyaga yingwinjili ya m'makongolo.

¹⁷ Ni ligongo lyakwe AMBUJE taciyikoposya yipele m'mitwe ja acakongwe ŵa ku Siyoni, umbo syawo syosope tisicimala.”

¹⁸ Pa lisiku lyelelo AMBUJE taciyityosya yakwasalalisya yosope, yakuwala mu mtwe, ni mlukosi,

¹⁹ makosa ni nguwo syakuliwunicila mlukosi,

²⁰ maduku, yibangili, malamba, mabotolo ga mawuta gakununjila, yilisi,

²¹ mbete ni cipini ca pambula,

²² madilesi ga pa yindimba, nguwo, mikanjo, yikwama,

²³ magalasi gakulilolela ngope, yakuwala ya bafuta, nduŵila, nipo soni nguwo syakuliwunicila nasyo ku meso.

²⁴ M'malo mwakununjila tipaciŵa kununga, m'malo mwa lamba taciŵala ngonji, m'malo mwa umbo syesakule cenene, taciwa ni lupala, m'malo mwa dilesi jambone taciŵala yiguduli, m'malo mwakuti apoce ligongo lyakusalala tacitenda soni.

²⁵ Acalume ŵa mu Yelusalemu taciwulajidwa ni upanga, nipo ŵandu ŵamacili taciwila ku ngondo.

²⁶ Myoyo pa yipata ya mu msindawo tipaciŵa kugumila ni kulila, nipo msindawo tiwuciŵa mpela jwamkongwe jwatemi pasi ali jikape jwangali kwakwinjilila.