Yesaya 26 - Chiyawo Bible

Mlungu tacapundisya ŵandu ŵakwe

¹ Likwisa lisiku lyele ŵandu tacijimba nyimbo jeleji mcilambo ca Yuda kuti: “Tukwete msinda wakulimba! Mlungu jikape ni jwakugateteya mapupa gakwe.

² Mwugule yipata ya mu msinda, kuti mtundu ŵa ŵandu ŵakulupicika ujinjile, ŵandu ŵali ŵakulungama.

³ Ŵalakwe AMBUJE,* akusapeleka mtendele usyesyene kwa ŵele ŵakwete umi wakutamilicika, ligongo lya cikulupi cawo pa ŵalakwe.

⁴ Mwakulupilileje AMBUJE mpaka kalakala, ligongo lyakuti AMBUJE Mlungu ni ŵali lwala lwangali mbesi.

⁵ Ŵalakwe ŵanandiye ŵandu ŵiŵaliji mkulikwesya, awujonasile msinda wakulimba ula. Agagumwile mapupa gakwe, nipo awugwisisye pasi, pa luwundu pasyesyene.

⁶ Sajo sya ŵandu sikuwuliŵata, sajo sya ŵandu ŵakulaga, sajo sya ŵandu ŵakusoŵa.”

⁷ Ŵalakwe AMBUJE ali ŵakulungama, litala lya mundu jwakwapikanila ŵalakwe akusalisalalisya.

⁸ AMBUJE, uwe tukusagalondesya malamusi gawo, nipo cembeceyo cetu cili mwa ŵalakwe. Mitima jetu jili jakusosasosa kukumbucila ni kulicimbicisya lina lyawo.

⁹ Umi wangu ukusiwasacilisya ŵalakwe cilo, kundaŵi msimu wangu ukwasosasosa ŵalakwe. Pandaŵi jimkucilamula cilambo capasi, ŵandu ŵa mcilambomo akusalijiganya ya cilungamo.

¹⁰ Atamose kuti ŵalakwe akwatendela canasa ŵandu ŵakusakala, jemanjajo ŵangalijiganya kose kutenda cilungamo. Atamose amuno mcilambo ca ŵandu ŵakulungamika akusatenda yakusakala, nipo akusalepela kulumanyilila lumbili lwa AMBUJE.

¹¹ Ŵalakwe AMBUJE, mkono wa jemanjajo awunyakule kuti ŵape cilango amagongo ŵawo, nambo jemanja ngakuyimanyilila yeleyo. Mwatendesye soni, pakwalosya cinonyelo cakwete ŵalakwe pa ŵandu ŵawo, nipo ŵajoce m'moto uŵakolecesye ŵalakwe amagongo ŵawo.

¹² AMBUJE, akatupa mtendele ligongo lyakuti yiliyose yitukusatenda, akusatulinganyicisya ni ŵalakwe.

¹³ AMBUJE Mlungu jwetu, atamose ŵane aŵele alimkutulamulila, nambo nganitulicimbicisya lina line akaŵe lya wawo jikape.

¹⁴ Sambano amagongo ŵangalwe awile, ngasaŵa soni cijumi, ngasayika soni kutulagasya. Mwapele cilango nipo ajonasice, pangali jutacakumbucila soni.

¹⁵ Nambo ŵalakwe AMBUJE, atupiye mtundu wetu, mwakuti ukusile nditu, mcitendekasye cilambo cetu kukula kumbali syosope, ayitendekasye kupocela ucimbicimbi.

¹⁶ Ŵalakwe AMBUJE, ŵandu ŵawo piŵaliji myisawusyo ŵasosile, piŵapelekaga cilango, ŵapopesile kwa ŵalakwe.

¹⁷ Ligongo lya yimwayitesile kwetuwe, twayipikene yipwetesi mpela yakusayipikana jwamkongwe pakuŵeleka mwanace.

¹⁸ Uwe twayipikene yakupweteka, nipo twalasile mpela jwamkongwe pa ndaŵi jakuŵeleka mwanace, nambo nginitupata kandu kose. Nganitucikulupusya cilambo capasi cino, soni nganituŵeleka ŵanace kwa ŵandu ŵa mcilambo capasi.

¹⁹ Ŵandu ŵenu ŵiŵawile taciŵa soni cijumi, yilu yawo tiyicijimuka. Jemanja wosope ŵimli m'malembe, mjimuce ni kwimba mwakusangalala. Mpela mangame ga kundaŵi gigakusalijoloŵesya litaka ni kuyipa umi yakumela, myoyo soni AMBUJE tacajimusya ŵandu uŵawile kala.

Kulamulidwa ni kuwucisidwa

²⁰ Ŵandu ŵangu, mjawule mkajinjile m'nyumba syenu, ni kuwugala matanga gakwe. Mkajuŵe mwelemo ndaŵi jamnono kwembecela kuti lutumbilo lwa AMBUJE lumale.

²¹ AMBUJE akwisa kutyocela kwakusatama, akwisa kukwapa cilango ŵandu ŵa cilambo capasi ligongo lya ulemwa* wawo. Miasi ja ŵandu ŵakuwulajidwa mcilambo capasi tijicijuwulika. Mitembo ja ŵandu ŵakuwulajidwa ngisijisisika.