Yesaya 25 - Chiyawo Bible

Nyimbo ja Kulumba

¹ Ŵalakwe AMBUJE* Mlungu jwangu. Tinjacimbicisya ni kulilumba lina lyawo. Pakuti ŵalakwe ayitesile yindu yakumasya lunda mwakulupicika soni mwangakayicila, yindu yele yaliji mu nganisyo syawo kalakala.

² Msinda ula utendekwe kuŵa liwunjili lya maganga, Msinda uwakwete mapupa ula utendekwe kuŵa wangatamidwa. Amagongo ŵetu ngasataŵa soni nyumba syakulimba sya ucimwene.

³ Ni ligongo lyakwe ŵandu ŵamacili ŵakutyocela m'mitundu josope tacimlumba, m'misinda ja mitundu ja ŵandu ŵa ngalwe, ŵandu tacimjogopa.

⁴ Mŵele pakutilila pa ŵandu ŵa usawuci, pakutilila pa ŵakulaga myisawusyo yawo, malo gakutilila cimbunga soni mbwilili pakutilila mtukuta. Pakuti ŵandu ŵakusakala ali mpela cimbunga cakupuga pepupa,

⁵ soni mpela mcilambo cangali mesi. M'mweji mwalilekasisye lisegwe lya ŵandu ŵa cilendo. Mwaliji mpela liwunde lyakusisimisya citukuta, Mwalekasisye amagongo ŵetu kwimba nyimbo.

Mlungu akulinganya cindimba

⁶ Pa litumbi ali lya Siyoni* AMBUJE Ŵamaciligosope tacilinganya cindimba ca ŵandu wosope, ca yakulya yakunong'a ni finyo jwambone, cindimba ca nyama jakunakana ni finyo jwakunong'a mnope.

⁷ Pa litumbi alino tacityosya canasa cele cakamwile ŵandu wosope, cele ciwunicile mitundu josope ja ŵandu.

⁸ AMBUJE tacicimasya ciwa mpaka ndaŵi jangali mbesi. Tacipukuta misosi m'meso mwa jwalijose, nipo tacityosya soni sya ŵandu ŵakwe pa cilambo cosope capasi. Akuti myoyo AMBUJE.

⁹ Pa lisiku lyelelo ŵandu taciti, “Aju ni Mlungu jwetu, jutwamkulupililaga kuti tacitukulupusya. Ŵalakweŵa ni AMBUJE ŵetu. Twakulupililaga, sambano kwende tukondwe ni kusangalala ligongo lyakuti atukulupwisye nditu.”

Mlungu tacipeleka cilango kwa Amowabu

¹⁰ AMBUJE tacilitetela litumbili ni mkono wakwe, nipo Amowabu tacaliŵatila papopo palilipo, mpela mwakusatendela ŵandu pakuyiliŵatila yiswani mwisimbo.

¹¹ Amowabu tacilinga kugatambasukula makono gawo mpela mwakusatendela mundu jwakung'ambila. Nambo AMBUJE tacimasya kulilumba kwawo nipo soni umisili wa makono gawo.

¹² Tacigumula mapupa gawo gelewu. Tacagwisya, kaneko tacaponya pasi, pa luwundu pasyesyene.