Yesaya 23 - Chiyawo Bible

Utenga wakuja ku ŵakutama mungulugulu nyasa

¹ Awu ni utenga wakwaya Taya. Mgumile ni canasa, jemanja ŵakwendesya ya ku Talishishi! Pakuti msinda wa Taya ujonasice, kwangali soni nyumba kapena ciko! Yeleyi ŵayipikene pakutyocela ku Saipulasi.

² Mtame jii jemanja ŵandu ŵakutama mungulugulu mwa nyasa, jemanja ŵakusumisya malonda ŵa ku Sidoni! Ŵamitenga ŵenu ŵajombwece nyasa, nipo ŵapite pa nyasa syekulungwa.

³ Cakupata cenu mwacisimanaga kutyocela mu tiligu jwa ku Sihole, yagowola ya ku Nayilo, soni mwatendaga malonda ni ŵandu ŵa mitundu josope.

⁴ Mtende soni, m'mwe Sidoni, msinda wa mapupa wa ku nyasa, ligongo nyasajo jiŵecete, jitite kuti, “Nganimbikane yipwetesi yakusayipikana ŵakongwe pakuŵeleka, nganimbelece ŵanace, nganindeleje ŵanace, atamose jwamlume kapena jwamkongwe.”

⁵ Aiguputo pitacipikana kuti Taya jwajonasice, tacitenguka mtima soni kutenda woga.

⁶ Mtile kwawula ku Talishishi, mgumile ni canasa, jemanja ŵimkutama mungulugulu mwa nyasa.

⁷ Ana awuwu ni kuŵa msinda wakumanyika wa Taya, msinda wakalakala ula? Ana ni welewu msinda uwatumisyaga ŵandu kuja kutama pesi nyasa?

⁸ Ana nduni jwayiganisisye yeleyi kuti yitendekwele Taya, msinda wakupeleka ukulu kwa ŵandu, ŵele ŵa malonda ŵakwe ŵaliji ayimwene, soni ŵakucimbicikwa pa cilambo cosope capasi?

⁹ AMBUJE* ŵamacili gosope ni ŵayiganisisye yeleyi, pakusosa kumasya kupoka kwa jemanja, kuti ŵanandiye ŵandu wosope ŵakucimbicikwa ŵa mcilambo capasi cino.

¹⁰ Ŵandu ŵa ku Taya, mjawule mkalimeje mcilambo cenu. Pakuti ciko cenu cijonasice, soni pangali cine cakuti cimkamucisye.

¹¹ AMBUJE awutambasukwile mkono wawo pacanya pa nyasa, ma ucimwene gatenganyidwe ni jwalakwejo. Alamwile ŵandu ŵa ku Kenani kuti, agwisye mapupa gawo.

¹² Nipo ŵatite kuti lukondwa lwenu lumasile, mŵe ŵandu ŵakulagasidwa ŵa mu msinda wa Sidoni. Atamose mtile kwawula ku Saipulasi, kweleko soni ngasimja kupumula.

¹³ Mlole cilambo ca Babiloniya, ŵandu ŵeleŵa pangali, ŵamasile wosope. Asiliya ni ŵawutendekasisye msinda wa Taya, kuŵa malo gakutama yinyama ya mwitinji. Ŵataŵile sanja syawo sya ngondo, ni kugumula mapupa gakwe, ni kuwuleka wepasuce.

¹⁴ Mlile mwamacili jemanja ŵakuyijongolela yombo ya ku Talishishi, ligongo lyakuti mapupa ga msinda wenu agagwisisye.

¹⁵ Ndaŵi jikwisa jele Taya ngasakumbucilika kwa yaka makumi msano ni gaŵili, mpela masiku ga umi wa mwenye jumo pa citengu ca ucimwene. Yili yimasile yaka yeleyi, Taya taciŵa mpela jwamkongwe jwa cigwagwa jula jwakusamjimba mu nyimbo kuti:

¹⁶ Mjigale cida cakwimbila ca ngonji, msyungule mu msinda, m'mwe ŵakongwe ŵacigwagwa ŵakuliŵalika. Mjimbe mwakunonyelesya ni cida cakwimbila ca ngonjico. Mjimbe nyimbo syejinji, kuti ŵandu amkumbucile.

¹⁷ Yili yimasile yaka makumi msano ni gaŵili, AMBUJE tacimkumbucila Taya. Msindawo tiwuciwujilila ku masengo gakwe gakalakala. Nipo ŵandu tacitenda ya cigwagwa ni ma ucimwene ga cilambo cosope capasi.

¹⁸ Nambo pindu ni malipilo gakwe taciyipeleka kwa AMBUJE. Ngasatenda nayo ugaga kapena kulisunjila jika, nambo taciyipeleka kwa ŵakutumicila AMBUJE, kuti asume yakulya yejinji ni yakuwala yambone.