Yesaya 22 - Chiyawo Bible

Utenga wakwaya msinda wa Yelusalemu

¹ Awu ni utenga wakwaya Ciŵata ca Mesomkulola. Ana cikutendeka ni cici? Ana ligongo cici wosope mkwesile pa masakasa, soni mlikusengwa?

² Msinda wosope usokonecele, ugumbele ni masegwe. Ŵandu ŵenu ŵakuwulajidwa nginawulajidwa ni upanga, kapena kuwila ku ngondo.

³ Acimlongola ŵenu wosope ŵatisile, nambo ŵakamwile mkanatande kuputa ngondo. Wosopemwe ŵiŵamsimene mwakamwilwe atamose kuti mwatisile kala amagongo ali kutali.

⁴ Ni ligongo lyakwe Une natite kuti mtyoce apano, mundece ndile ni mtima wakupweteka, ligongo lya ŵandu ŵangu ŵajonasice, mkalinga kundulasya une.

⁵ Ndaŵi ajino jili ja yisawusyo, jakulepela soni cisokonesyo, m'Ciŵata ca Mesomkulola. AMBUJE* Ŵamaciligosope ni ŵayitumicisye yeleyi. Mapupa gagumwice nipo ŵandu alimkulila kwitumbi.

⁶ Likuga lya asilikali ŵa ku Elamu lyayice, lili likwesile pa yigeleta soni mahaci, m'miyala mwawo lyajigele mipamba, nipo wa ngondo ŵa ku Kili ŵaliji cile ni yakulicinjilicisya yawo.

⁷ Yiŵata yenu ya cajila yaliji yegumbale ni yigeleta, nipo asilikali uŵakwesile pa mahaci ŵajile kwima pa yipata ya msindawo.

⁸ Citetelo cosope ca Yuda acityosisye. Lisiku lyelelo mwayikulupililaga yida ya ngondo yele yiyaliji m'nyumba ja mu ukwete jila.

^9-10 Mwasimene malo gane m'mapupa ga mu msinda wa Yelusalemu muli mwegumuce. Mwasunjile mesi mlitamanda lyapasi. Mwaŵalasile nyumba syosope sya mu msinda wa Yelusalemu, nipo mwasigwisisye sine kuti mpate maganga gakutaŵila mapupa ga msindawo.

¹¹ Sikati ja mapupa gaŵili mwataŵile cisima cakusunjilamo mesi gakutyocela ku litamanda lyakalakala. Nambo nganimganisya ya Mlungu jwele jwayitendekasisye yeleyi, nganimŵalanjila ya jwele juŵayilinganyisye yeleyi kalakala.

¹² Pa lisiku lyelelo AMBUJE, Mlungu Ŵamaciligosope, ŵamŵilasile kuti mgumile ni kulila misosi, kuti msenje umbo ni kuwala yiguduli.

¹³ Nambo m'malo mwakwe mwakwete lukondwa ni cisangalalo, mwawuleje ng'ombe ni ngondolo nipo mwalyaga nyama jakwe, nipo soni mwamwele finyo. Mwatite, “Tulye, tumwe, pakuti malaŵi tutuwe.”

¹⁴ AMBUJE Ŵamaciligosope ŵanjuwulile m'mapikanilo gangu kuti, “Nditu, ulemwa* welewu ngasiwukululucidwa naga mli cijumi,” aŵecete myoyo AMBUJE, Mlungu Jwamaciligosope.

Mesomkulola gakwaya Sebina

¹⁵ AMBUJE, Mlungu Ŵamaciligosope, ŵaŵecete ni une kuti njawule kwa Shebina, kapitawo jwa m'nyumba ja ucimwene, kukumwusya kuti,

¹⁶ “Ana mkutenda cici akuno? Ana mkwete ulamusi wamti uli kuti msepeje lilembe lyenu mluŵala lwa mwitumbi.

¹⁷ Komboleka kuti mkwete macili, nambo AMBUJE tacimkamula, kumnyakula mwinani ni kumponya pasi.

¹⁸ Tacimnyakula mwinani mpela mpila ni kumponya mcilambo cekulungwa mnope. M'mwe ŵakujitesya soni nyumba ja ambuje ŵenu.

¹⁹ AMBUJE tacimtyosya pa citengu nipo tacimgwisya kutyocela pa citengu capenani.”

²⁰ AMBUJE ŵaŵecete ni Sebina kuti, “Pa lisiku lyelelo tinjimŵilanga jwakutumicila jwangu Eliyakimu, mwanace jwa Hilikiya.

²¹ Mkanjo wenu tinjim'weca jwalakwejo ni lamba jwakulitaŵila mciwunu soni tinjimpa ulamusi wosope. Taciŵa baba kwa wosope ŵakutama mu Yelusalemu ni ku nyumba ja Yuda.

²² Tinjimpa makiyi ga ulamusi wa pa liŵasa lya Mwenye Daudi.* Pitaciwugula pangali jutaciwugala soni. Nipo pitaciwugala pangali jwine soni jutaciwugula.

²³ Tinjimlimbisya jwalakwe mpela cicili pa citengu cakweco. Nipo taciŵa jwakwikasya ucimbicimbi ku nyumba ja babagwe.

²⁴ “Nambo ŵanace ni yisukulu yakwe taciŵa mpela yicindu yakwasitopa. Wosope tacilikoleka mwa jwalakwe mpela yida ya kukicini ni yakoleka pepupa.

²⁵ Pa lisiku lyelelo cicili cekomedwe mwakulimba cila ticicisukunya ni kugwa. Sambano yosope yitaciyikoleka pelepo tiyicigwa ni konasika.” AMBUJE aŵecete.