Yesaya 21 - Chiyawo Bible

Mesomkulola ga kugwa kwa Babiloni

¹ Awu ni utenga wakwaya Babiloniya. Likungu tilicityocela ku cilambo cakutendesya woga, mpela kupuga kwa cimbunga cakutyocela ku cipululu.

² Nayiweni yindu yakogoya m'mesomkulola: ŵakusumula alimkusumula, ŵakonanga alimkonanga. Ŵa ngondo ŵa ku Elamu, mjitande ngondo! Ŵa ngondo ŵa ku Mediya, mwusyungule msindawo. Une AMBUJE* tinjiyimala yisawusyo yosope, yele yayice ni Babiloni.*

³ Ni ligongo lyakwe yele yinayipikene ni kuyiwona m'mesomkulola yila yindendesye woga, nipo yimbwetece mpela jwamkongwe pakuŵeleka mwanace. Mbele myipwetesi ligongo lya yinguyipikana soni kuyiwona.

⁴ Mtima wangu ukugunda, soni ngutetemela ni woga. Mbele ndili mkwembecela ndaŵi ja ligulo, nambo ligulo nganiliyika ni yambone nambope yakogoya.

⁵ Jemanja akosecele cindimba, tebulo akujiŵika m'malo gakwe, magono akugatandika kuti atamile acalendo. Akulya soni kumwa. Mwangakaŵa ŵandu akupikana maloŵe kuti, “Acakulungwa ŵa ngondo mjimuce! Myipakasye mawuta yida yenu yakulicinjilicisya.”

⁶ AMBUJE ŵaŵecete ni une kuti, “Mjawule, mkaŵice mlonda jwakuti asaleje yakuyiwona.

⁷ Naga akwawona ŵandu ali akwesile pa yigeleta ŵaŵiliŵaŵili, ŵane pa mbunda ni ŵane pa ngamila,* mlondajo alolecesye cenene.”

⁸ Pelepo mlondajo taciŵeceta kuti, “AMBUJE, musi wosope ngusindama pa sanja, cilo cosope ngusindama pa malo gakulondela.”

⁹ Nagambile kwawona ŵandu alimkwika ali akwesile pa yigeleta, alimkwenda ŵaŵiliŵaŵili. Jumo jwa jemanjajo jwatite kuti, “Babiloni jugwile, jugwile nditu! Yilandanyo yosope ya tumilungu twakwe, yikasicile pasi.”

¹⁰ Ŵandu ŵangu Aisalaeli, nambo sambano mbecete kwasalila jemanja utenga ŵambone, ŵele umbikene kutyocela kwa AMBUJE Ŵamaciligosope.

Utenga wa Edomu

¹¹ Awu ni utenga wakwaya Edomu: Jwine akuŵeceta ni une kutyocela ku Edomu, kuti, “M'mwe ŵakulondela, ana ciloci ticimale ndaŵici? M'mwe ŵakulondela, ana ticimale ndaŵici ciloci?”

¹² Mlonda jukuti, “Kukuca nambo soni cilo cikwisa. Naga mkusosa kuwusya, myice soni mwusye.”

Utenga wa Alebiya

¹³ Awu ni utenga wakwaya cilambo ca Alebiya. Jemanja ŵandu ŵa ku Dedani ŵimkwenda pa likuga pa ngamila, ŵele mkugona mu yipululu ya Alebiya.

¹⁴ Mpelece mesi kwa ŵandu ŵa njota, jemanja ŵandu ŵa ku Tema mpelece yakulya kwa ŵandu ŵakutilatila.

¹⁵ Jemanja mkutila, kulikulupusya ku mawupanga, ni mipamba jele jili cile kuti jimwulaje, kutila ngondo jakogoya.

¹⁶ Kaneko AMBUJE ŵatite kwa une, “Cisigele caka cimo, mwakusaŵalanjila mundu jwamasengo ga ganyu, kuti ucimbicimbi wosope wa ŵandu ŵa ku Kedala umale.

¹⁷ Ŵandu ŵakuponya mipamba ŵa ku Kedala, tacisigala ŵapanandi.” AMBUJE Mlungu jwa Isalaeli, aŵecete myoyo.