Yesaya 2 - Chiyawo Bible

Mtendele wangamala

¹ Awu uli utenga uŵapelece Mlungu kwa Yesaya mwanace jwa Amosi kupitila m'mesomkulola wakwamba Yuda ni Yelusalemu.

² M'masiku gagali mkwisa, pa litumbi pijili Nyumba ja AMBUJE* tilicitendekwa kuŵa lyelewu mnope kupunda matumbi gane gosope. Mitundu josope ja ŵandu tijiciwutucila kwitumbi lyelelo.

³ Ŵandu ŵa ngosyo syejinji taciyika nipo taciŵeceta kuti: “Kwende tujawule Kwitumbi lya AMBUJE, Ku Nyumba ja AMBUJE jwa Aisalaeli. Jwalakwejo tacitujiganya matala gakwe, nipo tucijenda m'matala gakwego. Pakuti ku Siyoni ni kutikucityocela malamusi gakwe, nipo ku Yelusalemu ni kutikucityocela maloŵe ga AMBUJE.”

⁴ Jwalakwejo tacilamula sikati ja yilambo kumasya kungapikanganana sikati ja ngosyo syejinji sya ŵandu. Ŵandu tacisyana mapanga gawo kuti gaŵe majela, nipo soni mipamba jawo kuti jiŵe yipula yakatila nyambi. Mitundu ja ŵandu ngasijijimucilana ni mawupanga, soni ngasijilijiganya soni kuputa ngondo.

⁵ Jemanja yisukulu ya Yakobo,* kwende tujende mu lilanguka lyakutupa uwe AMBUJE!

Lisiku lya AMBUJE

⁶ Ŵalakwe Mlungu, ŵakanile ŵandu ŵawo, yisukulu ya Yakobo! Cilambo cigumbele ni ŵandu ŵamatipwi ŵakutyocela kungopoko lyuŵa, ni acimlondola ŵa yisango mpela ŵa ku Filisitiya. Ŵandu ŵawo akujikuya misyungu ja cilendo.

⁷ Cilambo ca ŵandu ŵawo cigumbele ni silifa* ni golidi,* nipo cipanje cawo cili cangamala. Cilambo cawo cigumbele ni mahaci, nipo yigeleta yawo ya ngondo yili yangaŵalanjika.

⁸ Cilambo cawo cigumbele ni milungu jakupanganyidwa ni yala, nipo akusalambila yindu yele yiŵayipanganyisye ni magasa gawo, yele yayigumbile yala yawo.

⁹ Ni ligongo lyakwe AMBUJE, tacimtesya soni mundu jwalijose soni kumnandiya. AMBUJE, akasiŵakululucila jemanjajo.

¹⁰ Ajinjile m'malwala, ajuŵe m'masimbo gamwitaka kutila lutumbilo lwa AMBUJE, soni lumbili lwakwe.

¹¹ Likwisa lisiku lyele kulikwesya kosope kwa ŵandu tikucimala, kulilumba kwa ŵandu tikucijonanjidwa, nipo AMBUJE jikape ni wutacipocela lumbili.

¹² Pa lisiku lya AMBUJE Ŵamaciligosope, ŵandu wosope ŵakulikwesya ni kulilumba tacanandiya. Wosope ŵamacili tacagwisya pasi.

¹³ Taciyikata yitela ya mikungusa yosope ya ku Lebanoni, jelewu kupunda jine josope. Taciyikata yitela yosope ya mtundu ya ku Bashani.

¹⁴ Tacimwasanya matumbi gosope gelewu ni mikuli josope jelewu.

¹⁵ Tacigwisya sanja syosope syelewu. Tacigumula mapupa gosope gakulimba.

¹⁶ Tacitiŵisya yombo yosope yekulungwa ni yakusalala.

¹⁷ Kulikwesya kosope kwa mundu tikucimala, kulilumba kwa jemanja kosope tukucijonanjidwa. AMBUJE jikape ni utacipocela ucimbicimbi pa lisiku lyelelo.

¹⁸ Milungu jakupanganyidwa josope tijicimalila papopo.

¹⁹ Ŵandu tacitilila mu mbanga sya m'maganga, ni m'masimbo ga mwitaka. Tacitila lutumbilo lwa AMBUJE, soni lumbili lwamacili gakwe, pele pitaciyika kucijogoya cilambo capasi.

²⁰ Pa lisiku lyelelo ŵandu tacijasa milungu jakupanganyidwa ja golidi ni silifa, yele ŵayipanganyisye kuti ayilambileje. Taciyijasa kugapa namfuko ni mileme.

²¹ Ŵandu tacitilila mu mbanga sya m'malwala, ni m'masimbo ga m'malwala. Tacitila lutumbilo lwa AMBUJE, soni lumbili lwamacili gakwe, pele pitaciyika kucijogoya cilambo capasi.

²² Mkasimumkulupilila mundu soni, pakuti umi wakwe wangakaŵa kumala. Ana jwalakwejo ni kumjigala mpela kandu?