Yesaya 19 - Chiyawo Bible

Mlungu tacipeleka cilango ku cilambo ca Iguputo

¹ Awu uli utenga wakwaya cilambo ca Iguputo. AMBUJE* akwesile liwunde lyakuwutuka mnope, akwawula ku Iguputo. Milungu jakupanganyidwa ja cilambo ca Iguputo tijicitetemela, nipo mitima ja Aiguputowo tijicigumbala ni woga.

² AMBUJE akuŵeceta kuti tinjatendekasya Aiguputo kuti amenyaneje ngondo ja pa ulongo. Tacimenyana, mlongo ni mlongo mjakwe, ŵandu ŵakutama m'majumba gakuŵandikana, msinda ni msinda ujakwe, nipo soni ukumu ni ukumu ujakwe.

³ Tinjiyilepelesya yakulinga ya Aiguputo nipo tacijasa mtima. Tacijiwusya milungu jawo ni misimu ja ŵandu ŵawe, kuti ŵape lunda. Soni tacijawula kwa ŵakulondola yisango ni asaŵi, kuti ŵakamucisye.

⁴ Tinjapeleka Aiguputo m'myala mwa jwakulamula jwa ngalwe. Nipo mwenye jwakogoya ni jutacalamulila, akuŵeceta myoyo AMBUJE Ŵamaciligosope.

⁵ Mesi ga mu Lusulo lwa Nayilo tigacipwa, nipo lusulolo tilucijumula.

⁶ Mesi ga mu ngalande sya lusulolu tigaciŵa gakununga, nipo tusulo tosope twakutyocela mu lusulolu tucinondipa kaneko kumula, matete ni manyasi tiyicinyala.

⁷ Mbeju syosope syakupandidwa mungulugulu mwa Lusulo lwa Nayilo tisicijumula, soni ngawoneka kose.

⁸ Ŵandu ŵakuwulaga somba mu lusulolu tacidandawula soni kulila. Wosope ŵakusaponya yisopo, ni makoka gawo pa mesigo tacilaga.

⁹ Ŵandu ŵakamula masengo gakupota litonji, nipo soni ŵakupanganya nguwo tacijasa mtima.

¹⁰ Ŵandu ŵalunda lwakupanganya nguwo tacisokonecela mtwe, nipo ŵandu ŵakukamula masengo gakulipidwa tacidandawula ni kulitendela canasa.

¹¹ Acayimwene ŵa msinda wa Sowani ali ŵakuloŵela! Apungu ŵalunda ŵa Mwenye jwa ku Iguputo akusapeleka upungu ŵangalumbana. Ana komboleka camtuli kumsalila Mwenye jwa ku Iguputo kuti une ndili mwanace jwa mundu jwalunda, mwanace jwa ayimwene ŵakalakala.

¹² Mwenye jwa ku Iguputo, ana ali kwapi apungu ŵenu ŵalunda? Ŵelewo, naga apakombole amsalile nganisyo sya AMBUJE Ŵamaciligosope syakusisya Iguputo.

¹³ Ayimwene ŵa mu msinda wa Sowani atendekwe kuŵa yisilu, nipo ayimwene ŵa ku Memfisi ŵalambwisye. Acimlongola ŵa cilambo ca Iguputo, acisokonesye cilambo cawo.

¹⁴ AMBUJE acisokonesye cilambo ca Iguputo. Ŵandu ŵa mcilamboco agamba kupepeluka pakutenda yiliyose, akupepeluka mpela mundu jwakolelwa ukana pakutapika.

¹⁵ Pangali jwine jwalijose soni mcilambo ca Iguputo, jwampaka apakombole kutenda cilicose, ŵakusicila kapena ŵakulaga, ŵakumanyika cenene ni ŵandu ŵangamanyika.

Iguputo tacalambila AMBUJE

¹⁶ Pa lisiku lyelelo ŵandu ŵa ku Iguputo taciŵa mpela acakongwe, tacitetemela ni kutenda woga, pitacawona AMBUJE Ŵamaciligosope ali awutambasukwile mkono wawo kuti ŵape cilango.

¹⁷ Ŵandu ŵa ku Iguputo tacitenda woga ni cilambo ca Yuda. Ndaŵi syosope pitacipikana kuti Yuda tacikamulwa ni woga ligongo lya yindu yele AMBUJE Ŵamaciligosope yakusosa kuyitenda pa jemanjajo.

¹⁸ Pa lisiku lyelelo ku Iguputo tikuciŵa misinda msano jakuŵeceta ciŵeceto ca ku Kenani, nipo ŵandu ŵakwe tacitenda cilanga* ni AMBUJE Ŵamaciligosope kuti tacatumicila. Umo mwa misindajo taciwukolanga kuti, “Msinda wa Lyuŵa.”

¹⁹ Pa lisiku lyelelo mkati mwa cilambo ca Iguputo timucipagwa malo gakwatajila mbopesi AMBUJE, nipo ciŵandika ni kumbesi kwa cilamboco tacijimika cipilala ca liganga kwacimbicisya AMBUJE.

²⁰ Yeleyi tiyiciŵa yimanyisyo ni umboni wakusimicisya kuti AMBUJE Ŵamaciligosope ali mcilambomo. Naga Aiguputo akulila kwa AMBUJE ligongo lya yisawusyo yawo, Ŵalakwe tacituma mkulupusyo kuti ŵatetele soni kwakulupusya.

²¹ AMBUJE tacililosya jika kwa Aiguputo, nipo jemanja tacamanyilila AMBUJE pa lisiku lyelelo. Tacalambila AMBUJE pakutaga mbopesi soni kupeleka yakupeleka. Tacitenda cilanga cacikulungwa ni AMBUJE nipo taciyilondesya ya mcilangaco.

²² Atamose kuti AMBUJE tacapa Aiguputo cilango camnope, nambo soni tacaposya. Jemanja taciwujilila kwa AMBUJE, nipo Ŵalakwe tacapikanila ni kwaposya.

²³ Pa lisiku lyelelo tikucipagwa litala lyekulungwa kutyocela ku Iguputo kupita ku Siliya. Ŵandu ŵa ku Siliya tacijawulaga ku Iguputo, soni ŵandu ŵa ku Iguputo tacijawulaga ku Siliya. Nipo Aiguputo ni Asiliya tacilambila pampepe.

²⁴ Pa lisiku lyelelo Isalaeli tacitama pamo ni Iguputo ni Asiliya, nipo yilambo yitatuyi tiyiciŵa upile ku cilambo cosope capasi.

²⁵ AMBUJE Ŵamaciligosope tacapa upile ni kuti, “Upile kwa Aiguputo, ŵandu ŵangu; upile kwa Asiliya, masengo ga makono gangu; upile kwa Aisalaeli ŵakusagulidwa ŵangu.”