Yesaya 18 - Chiyawo Bible

Mlungu tacipeleka cilango ku cilambo ca Ifiyopiya

¹ Likungu kwa ŵandu ŵakutama mcilambo capesi pa sulo sya cilambo ca Ifiyopiya! Kweleko kukusapikanika mkokomo wa mapapiko.

² Kutyocela ku cilamboco akusatuma ŵakwimilila cilamboco, m'mawato gakupanganyidwa ni matete kupitila mu Lusulo lwa Nayilo. Mjawuleje kumangwenu jemanja ŵamitenga ŵacitema, kwa ŵandu ŵalewu mnope soni ŵa yilu ya mya, kwa ŵandu ŵakusajogopedwa ni ŵandu ŵapakuŵandika soni ŵakutali, cilambo ca ŵandu ŵamacili soni ŵakulimbangana pa ngondo, cilambo cawo cili cegaŵanice ni sulo.

³ Mpikane jemanja wosope ŵimkutama mcilambo capasi, Pitacijimusya mbendela ja cimanyisyo pa matumbi, mlole! Pitacigombaga lipenga, mpikane!

⁴ Pakuti AMBUJE* ŵaŵecete ni une kuti, “Kutyocela kungusindama Uneji tinjilola pasi mwakuwusimana mtima, mpela mulikusaŵalila lyuŵa mu ndaŵi ja citukuta, mpela mugakusagwila mangame cilo mu ndaŵi jagowola.

⁵ Ŵandu alimkanatande kugowola, maluŵa gali gagwile pasi, nipo yisogosi yili yitandite kwiwula Mlungu tacikatatu yakusipuka ni kusityosya nyambi syakutambalala mnope.

⁶ Mitembo ja ŵandu ŵa ngondowo tacijileka jangasika kuti yijuni ya m'matumbi ni yinyama yilye. Yijuni tiyicilya mu ndaŵi ja cawu nipo yinyama ya mwitinji tiyicilya mu ndaŵi jakusisima.”

⁷ Mu ndaŵi jelejo ŵandu taciyika ni yakupeleka kwa AMBUJE Ŵamaciligosope. Ŵandu ŵakwe taciŵa ŵalewu ni ŵakusalala pa cilu. Taciŵa ŵakogopedwa ni ŵandu ŵa pakuŵandika ni kwakutalika. Mtundu wa ŵandu ni wakujipunda mitundu jine. Cilambo cawo cili cekaticekatice mtande wa sulo. Yakupelekayo taciyika nayo Kwitumbi lya Siyoni* kwele ŵandu akusiŵalambila AMBUJE Ŵamaciligosope.