Yesaya 17 - Chiyawo Bible

Mlungu tacipeleka cilango ku cilambo ca Siliya ni Isalaeli

¹ AMBUJE* akuŵeceta kuti, “Msinda wa Damasiko ngasiwuŵa soni msinda, nambo tiwucitendekwa kuŵa malo gangatamidwa.

² Misinda ja ku Siliya tijiciŵa jangatamidwa ndaŵi syosope. Tijicitendekwa kuŵa malo gakulanjila ngondolo ni ng'ombe, nipo pangali mundu jutacisitopola mwelemo.

³ Ku Efelemu ngakusikupagwa soni lipupa lyakwacinga amagongo, nipo ku Damasiko ngasikuŵa soni mwenye. Ŵakusigalila ŵa ku Siliya taciŵa ŵangali ucimbicimbi mpela mwaŵelele Aisalaeli. Une AMBUJE mbecete myoyo.”

⁴ “Pa lisiku lyelelo ucimbicimbi wa Yakobo* taciwunandiya, nipo cipanje cakwe ticicitendekwa kuŵa usawuci.

⁵ Isalaeli taciŵa mpela mgunda wa tiligu, uŵawumalisisye gowola kala. Taciŵa soni mpela mgunda wa m'Ciŵata ca Lefayimu, ŵandu ali amalisisye kugowola yakusigalila mu mgunda wa tiligu uli ugowoledwe kala.

⁶ Ŵamnonope tacisigalila, mpela muyikusaŵela pakucitenganya citela ca olifi,* kuti yisogosi yiŵili mwine yitatu yikusasigalila, pa citela capenani pasyesyene. Une AMBUJE mbecete myoyo.”

⁷ Pitiliciyika lisiku lyelelo ŵandu taciwujilila kwa Mlungu Mkupanganya Jwamswela jwa Isalaeli kusosa cikamucisyo.

⁸ Ngasakulupilila soni malo gakupelecela mbopesi gakupanganya ni makono gawo, kapena kukulupilila malo gawo gakupelecela mbopesi giŵapanganyisye ni makono gawo, kapena kulupilila yilandanyo ya mlungu jwa mkongwe Ashela ni malo gawo gakutinicisya yakununjila yakusapeleka kwa mlungu.

⁹ Pitiliciyika lisiku lyelelo, ŵandu tacitila m'misinda jawo jamacili nipo tacijileka misinda jawojo jangatamidwa mpela misinda jiŵajilesile Ahifi ni Aamoni pakwatila ŵandu ŵa cilambo ca Isalaeli.

¹⁰ Jemanja ŵandu ŵa cilambo ca Isalaeli, mliŵalile Mlungu Mkulupusyo jwenu, mliŵalile lwala lwakumkulupusya. M'malo mwakwe mkulima migunda jambone, kuti mjipopeleleje milungu ja cilendo.

¹¹ Nambope atamose yikusakula ni kusogola kundaŵi kukoko, nambope yitimcigowola tiyiciŵa yangali mate, ligongo tigaciŵa masiku ga yisawusyo ni yipwetesi yangali mbesi.

Amagongo apundidwe

¹² Ha! Ŵandu ŵa mitundu jejinji akutenda masegwe mnope! Masegwe gawo gakupikanika mpela kukokoma kwa nyasa! Ha, masegwe ga ŵandu ŵa mitundu jine* gakusokosa mpela mpesi ga m'nyasa.

¹³ Nambope atamose atende masegwe mpela mesi gejinji gakogoya, Mlungu tacakalipila wosope nipo tacitila kuwujilila panyuma. Tacitopoledwa mpela masapi gaguluka m'matumbi, mpela luwundu lwaguluka mkanicitande cimbunga cakogoya.

¹⁴ Pandaŵi jakwigulo akusaputa ngondo mwakogoya, nambo pakwika kundaŵi akusaŵa ali ajonasice. Amu ni muciyitendekwela kwa ŵandu ŵakusatusumula yetuwe, ali lili likungu lya ŵandu ŵakutujiŵila yindu yetu.