Yesaya 16 - Chiyawo Bible

Yisawusyo ku cilambo ca Mowabu

¹ Kutyocela ku msinda wa Sela, pakupitila mlitala lya ku cipululu, ŵandu ŵa ku Mowabu atumisye mtuka wa mwanace jwangondolo kuja kupeleka kwa jwakulamulila ku Yelusalemu.

² Acakongwe ŵa ku Mowabu, agamba kwendajenda mungulugulu mwa Lusulo lwa Alinoni, akutenda mpela muyikusatendela yijuni, naga ayitopwesye myisusi yakwe.

³ Akwasalila ŵandu ŵa ku Yuda kuti, “Mtusalile yakuti tutende. Ndaŵi ja musi lyuŵa lili pa mtwe, mtupe mbwilili wambone. Mtujuŵisye uwe ŵatukutopoledwa, akatupeleka uwe ŵandu ŵakutila ngondo kuti jwalijose akatusimana.

⁴ Mtulece uwe ŵakutila ngondo ŵa ku Mowabu tutameje sikati jenu. Mtuteteye kwa wosope ŵakusosa kutujonanga.” Ndaŵi jikwisa jele yilagasyo ni konanjidwa tikucimala, nipo ŵandu ŵakwaliŵatila acimjawo tacityoka.

⁵ Iyoyo jumo mwa yisukulu ya Daudi* taciŵa mwenye, nipo taciŵa mwenye jwakulupicika, soni jwa cinonyelo. Jwalakwejo tacilamula mwa cilungamo, ni kutenda yakulungama.

⁶ Ŵandu ŵa ku Yuda akuŵeceta kuti, “Tukupikene kulilumba kwa ŵandu ŵa ku Mowabu, tukumanyilila kuti ali ŵakunyosya soni ŵamwano, nambo kulikwesya kwawo kosopeko kuli kwangali mate.”

⁷ Ŵandu ŵa ku Mowabu tacilila, tacilila ligongo lya yisawusyo yakuyisimana. Tacilila pitaciyikumbucila yakulya yambone, yiŵalyaga mu msinda wa Kili Heleseti. Myoyo tacijonanjidwa.

⁸ Paja migunda ja ku Heshiboni jangali cajila, jimasile yalumo ni migunda ja mpeleya ja ku Sibima. Yisogosi yakwe yakolelwesyaga ayimwene ŵa myilambo yapasi. Kalakala nyambi syakwe syajile kwika ku Yasa ni ku cipululu, nipo soni kupelenganya mpaka pesi nyasa.

⁹ Ni ligongo lyakwe ngugumila mpela mwakugumilila ŵandu ŵa mu msinda wa Yasa ligongo lya migunda ja mipeleya ja ku Sibima. Ngulila misosi ligongo lya ŵandu ŵa ku Heshiboni ni Eleyala, alepele kupata yagowola migunda mwawo, ligongo lyakuti ngondo jijonasile yosope.

¹⁰ Ku migunda ja cajila, pangali jwakusengwa, ku migunda ja mpeleya pangali jwagumila kapena kwimba nyimbo. Pangali jwakuyiminya yisogosi ya mpeleya kupanganya finyo, kugumila kwa lukondwa kwa ŵandu ŵakugowola yisogosi ya mpeleya kumasile.

¹¹ Ni ligongo lyakwe umi wangu ukucililila cilambo ca Mowabu ni konasika kwa Kili Helesi.

¹² Atamose kuti Amowabu akulipeleka pakuja kukupopela ku malo gakulambila m'matumbi, soni akupopela mpaka kupela mnope, yosopeyo ngasiyikamucisya.

¹³ Awu ni utenga uwapelecedwe ni AMBUJE* pakuŵeceta ya Mowabu.

¹⁴ Nambo sambano AMBUJE akuŵeceta kuti, pakumala yaka yitatu mpela mwakusaŵalanjila mundu jwa ganyu, ucimbicimbi wosope wa Mowabu tiwuciŵa uli umasile. Atamose kuti Mowabu akwete ŵandu ŵajinji, wosopewo tacijonasika, tacisigala ŵamnono nipo ŵelewo taciŵa ŵangali macili.