Yesaya 15 - Chiyawo Bible

Mlungu tacijonanga cilambo ca Mowabu

¹ Awu ni utenga wakwaya cilambo ca Mowabu: Msinda wa Ali ujonanjidwe cilo cimope, cilambo ca Mowabu cigwile. Ligongo lyakuti msinda wa Ali ni Kili ujonanjidwe cilo cimope, cilambo ca Mowabu cigwile.

² Ŵandu ŵa mu msinda wa Diboni akukwela, kupita ku malo gakulambila kuti akalileje. Ŵandu ŵa ku Mowabu akulila, akulila ligongo lya misinda ja Nebo ni Medeba. Mundu jwalijose asenjile lupala mu mtwe mwakwe, ndewu syosope asenjile.

³ M'matala gawo ŵandu awete yisaka, pa misakasa sya nyumba syawo ni m'maluŵala gawo, ŵandu akulila mnope misosi jilimkopoka,

⁴ Ŵandu ŵa ku Heshiboni ni ku Eleyala, akulila mwakwesya maloŵe. Kulila kwa jemanja kukupikanika mpaka kwa ŵandu ŵa ku Yahasi. Ni ligongo lyakwe asilikali ŵa ku Mowabu akugumila ni maloŵe gapenani, ligongo lyakuti ajasile mtima.

⁵ Une soni ngulilila cilambo ca Mowabu. Ŵandu ŵakwe akutila ngondo kupita ku misinda ja Sowali, ni Egilati Selisiya. Akulila alimkwela cikwesya ca Luhiti, mwakasika mtima akulila pa litala lya ku Holonaimu.

⁶ Mu Lusulo lwa Nimulimu mesi gapwele, mungulugulu mwakwe soni manyasi gajumwile, pangali soni cakumela cisigele ceŵisi.

⁷ Ŵandu akomboka Ciŵata ca Wilosi, kulinga kutila ni yipanje yosope yiŵakwete.

⁸ Kulila kwa jemanja kukupikanika ku cilambo cosope ca Mowabu. Ŵandu ŵa mu msinda wa Egilamu akupikene soni ŵa mu msinda wa Beyelimu apikene.

⁹ Mesi ga mu msinda wa Diboni gawanganicile ni miasi, nambope yisigele yisawusyo yejinji kuti niyipelece ku msinda wa Diboni. Tinjiŵika lisimba mcilambo kuti limkamule jwalijose jwakulupuka ku Mowabu, soni jwalijose jwakusigalila mcilamboco.