Yesaya 14 - Chiyawo Bible

Kuwujila kwa Aisalaeli

¹ Nambo AMBUJE* tacilitendela canasa liŵasa lya Yakobo,* tacisagula soni mtundu wa Isalaeli kuŵa ŵandu ŵakwe ŵakwepe, nipo tacija kwatamika mcilambo ciŵapele. Ŵandu ŵa yilambo yine tacijawula nawo yalumo nipo tacitama kukoko pamo ni ŵa mwiŵasa lya Yakobo.

² Ŵandu ŵa mitundu jine* tacapecesya Aisalaeli pakwawula ku cilambo cele AMBUJE ŵapele. Tacitama nawo kukoko nipo tacatumicilaga Aisalaeli mpela acikapolo ŵacakongwe ni ŵacalume. Ŵele uŵakamwile Aisalaeli sambano tacikamulwa ni Aisalaeli, nipo ŵandu ŵa ku Isalaeli tacalamulila ŵandu ŵele uŵalagasisye jemanjajo.

Mwenye jwa ku Babiloniya mcilambo ca ŵandu ŵawe

³ AMBUJE tacimpumusya ku yipwetesi ni yisawusyo yenu, soni ku masengo gele ŵandu giŵamkanganicisyaga kuti mkamuleje.

⁴ Timciŵeceta mwano kumŵecetela mwenye jwa ku Babiloniya: “Mwenye jwa ngalwe agwile! Ngisapakombola soni kwalagasya ŵaliwose!

⁵ AMBUJE atemangwile yikoti ya ŵandu wakusakala, ajonasile simbo ja ucimwene ja ŵakulamula.

⁶ Jemanjajo ŵajiwulagaga mitundu ja ŵandu, mwakutumbila pakwaputa jemanjajo mwangalecesya. Ŵajilamulilaga mitundu ja ŵandu mwa ukali, ni kwalagasya mwangalecesya.

⁷ Cilambo cosope capasi cipumwile, nipo ŵandu akwimba mwakusengwa.

⁸ Yitela ya payini yikusengwa, soni mikungusa ja ku Lebanoni jikuti, ‘Kutyocela ndaŵi jiŵamgwisisye m'mwejo pasi, pangali soni jwine jwalijose juŵayice kukutugwisya.’

⁹ “Ku malembe kuli cile kuti kumpocele, mwenye jwa ku Babiloniya pakwika. Misimu ja ŵandu uŵasicidwe m'malembego, jijimwice kuti jimkomasye m'mweji, misimu ja wosope ŵele ŵaliji, acimlongola pa cilambo capasi. Misimujo jikwimilila pa yitengu yawo ya ucimwene, wosope ŵele ŵaliji ayimwene ŵa mitundu ja ŵandu.

¹⁰ Wosopewo taciŵeceta, nipo tacimsalila kuti, ‘M'mweji soni macili genu gamasile mpela uweji! Sambano mli mpela uwe.

¹¹ Ucimbicimbi wenu umasile, nyimbo siŵamjimbilaga ni yitolilo syosope simasile, nambo sambano mli mcilambo ca ŵandu ŵawe. Mkusagona pa cindanda ca mbisu soni cakuliwunicila cenu cili nyongolosi.’

¹² “Mwenye jwa ku Babiloniya, m'mwe mng'andu, mgwile kutyocela kwinani, kalakala mwajipundaga mitundu ja ŵandu, nambo lelo amgwisisye pasi.

¹³ Mu mtima mwenu mwatiji kuti tinjikwela mpaka kwinani; pacanya pa ndondwa sya Mlungu, tinjitamikapo citengu cangu ca ucimwene; Tinjitama pa citengupo pa litumbi lya kumpoto, kwele milungu josope jikusasongana.

¹⁴ Tinjikwela pacanya pa mawunde, ni kuŵa mpela Jwamaciligosope.

¹⁵ Nambo amtulwisye ni kumsika m'malembe, pasi pasyesyene pa lisimbo.

¹⁶ “Ŵandu ŵawe pitacimlola tacimlolecesya ni kuganisyaga ya m'mwejo kuti, ‘Ana aju ngaŵa mundu juŵacitetemelesyaga cilambo capasi, ni kugatenganya ma ucimwene?

¹⁷ Ana jweleju ngaŵa juŵacitendekasisye cilambo capasi kuŵa cipululu ligongo lyakujijonanga misinda jakwe, soni nganiŵakundaga ŵandu ŵakamulwa kuti awujile kumangwawo?’

¹⁸ Ma ucimwene gosope ga mitundu ja ŵandu gakugona mwa ucimbicimbi jwalijose malembe gakwegakwe.

¹⁹ Nambo m'mwe ŵangali lilembe, mtembo wenu awujasile kusa kwa lilembe kuti uwole. Mtembo wenu awuwunicile ni asilikali, uŵawulajidwe ku ngondo ni mawupanga.

²⁰ Ngasiŵasika m'malembe yalumo ni ayimwene ŵakucimbicikwa, ligongo lyakuti acijonasile cilambo cawo, pakwawulaga ŵandu ŵawo. Yisukulu ya ŵandu ŵakusakala kuti yikakumbucila ni panandi pose.

²¹ Mŵe cile kwawulaga ŵanace ŵacalume ŵa mwenyeju.”

Mlungu tacajonanga Ababiloni

²² AMBUJE Ŵamaciligosope akuŵeceta kuti, “Tinjiputa ngondo ni msinda wa Babiloni. Tinjilimasya lina lya Babiloni ni wosope ŵitaciŵa ali ciŵela, ngisapagwa jwakulupuka, ŵanace ni yisukulu yakwe. Une AMBUJE mbecete myoyo.

²³ Msindawo tinjiwusandusya kuŵa lilambo lya matope ni malo gakutamamo acikasisi. Tinjiwupyajila ni lisace lyalikusakokola yosope yayisigele. Nguŵeceta myoyo une AMBUJE.”

Mlungu tacajonanga Asiliya

²⁴ AMBUJE Ŵamaciligosope alumbile kuti: “Yindu tiyicitendekwa mwakulingana ni munganicisye. Soni mpela munguganicisya tiyiciŵa myoyo.

²⁵ Tinjajonanga Asiliya mcilambo mwangu, soni tinjaliŵata ni sajo syangu pa matumbi gangu. Sambano ŵandu ŵangu tinjawula likongwa lyele Asiliya liŵawecice, tinjatyocesya katundu jwakusitopesya pa makoyo gawo.

²⁶ Yeleyi ni yilamwile kuti tiyicitendekwa pa cilambo cosope capasi. Ndambasukwile ligasa lyangu kuti mbelece cilango kwa ŵandu ŵa mitundu josope.”

²⁷ AMBUJE Ŵamaciligosope asimicisye kuti yeleyi yitendekwe, ana ŵani mpaka amlekasye jwalakwejo? Ligasa lyakwe lili lyetambasukuce ana ŵani soni mpaka aliwusye?

Mlungu tacajonanga Afilisiti

²⁸ Caka ciŵawile Mwenye Ahasi AMBUJE ŵaŵecete kuti:

²⁹ Ŵandu ŵa cilambo ca Filisitiya akasengwa ligongo lyakuti simbo jakumputila jitemangwice. Palikuwa lijoka lyangajogoya likusayika lipili lyakogoya, kutyocela mwa lipili likusapagwa lijoka lyakogoya soni lyakuguluka.

³⁰ Ŵandu ŵakulaga mnope tacipata yakulya, nipo tacitama ni kugona mwamtendele. Nambo jemanja Afilisiti tinjimjonanga ni sala, soni utacisigalila tinjawulaga.

³¹ Mlile mwakwesya maloŵe jemanja ŵimli pa yipata, mgumile kwaŵenda cikamucisyo ŵandu ŵa mu msinda. Mtetemeleje ni woga jemanja Afilisiti wosope, liwunde lya lyosi likutyocela kumpoto, nipo sikati ja ŵa ngondo ŵakwisawo pangali jwa woga.

³² Ana tucajanga cici ŵamitenga ŵa ku Filisitiya? Tucajanga kuti AMBUJE atamilicisye kala Siyoni* nipo ŵandu ŵakwe ŵakulaga tacikulupucila mwelemo.