Yesaya 13 - Chiyawo Bible

Mlungu tacipeleka cilango ku Babiloni

¹ Awu ni utenga wakwamba msinda wa Babiloni,* wele uŵapocele Yesaya mwanace jwa Amosi kutyocela kwa Mlungu.

² Mkwesye mbendela ja ku ngondo petumbi pele pali pangali yitela. Mwagumilile asilikali ŵa ngondo ni kwakodola kuti ajinjile pa yipata ya msinda.

³ Une, Mlungu msyene mbelece, malamusi kwa asilikali ŵangu ŵakulupicika, nasongenye pamo asilikali ŵamacili, ŵele ŵakusasangalala ni kupunda kwangu, kuti apelece cilango kwa ŵele unatumbilile.

⁴ Mpikane lisegwe kutyocela kumatumbi, likupikanika mpela lisegwe lya likuga lya ŵandu ŵajinji, mitundu ja ŵandu ni ma ucimwene kusongana pamo. AMBUJE* ŵa makuga ga ngondo alimkoseka ni makuga gawo kuti apute ngondo.

⁵ Jemanjajo akutyocela ku yilambo yakutali, kumbesi kwa cilambo capasi. Mwa lutumbilo lwakwe AMBUJE anyakwile yida ya ngondo, kukucijonanga cilambo capasi cosope.

⁶ Mlile mwamacili pakuti lisiku lya AMBUJE liŵandicile. Lisiku lyele AMBUJE Ŵamaciligosope tacipeleka conasiko.

⁷ Iyoyo makono gosope ga ŵandu tigaciŵa gangali macili, soni mtima wa mundu jwalijose tiwucityokamo.

⁸ Wosope tacijasa mtima, taciyipikana yipwetesi, yipwetesi yakwe mpela mwakusayipikanila mundu jwamkongwe pa ndaŵi jakuŵeleka mwanace. Tacilolegana jwine ni mjakwe mwa woga ali agwisisye ngope syawo ligongo lya soni.

⁹ Yakuwona lisiku lya AMBUJE likwisa, lisiku lyele kwangali canasa lisiku lya ukali ni lutumbilo. AMBUJE akwisa kucitenda cilambo kuŵa cipululu ni kwajonanga ŵandu ŵakulemwa mwelemo.

¹⁰ Ndondwa syosope sya kwinani ngisisilosya lilanguka. Lyuŵa tilicitenda cipi pakukopoka, nipo lwesi ngisiluŵala kose.

¹¹ AMBUJE akuŵeceta kuti, “Tinjipeleka cilango ku cilambo capasi ligongo lya kusakala kwakwe, ni kwa ŵandu ŵakusakala ligongo lya ulemwa* wawo. Tinjimasya kulilumba kwa ŵandu ŵakulikwesya, nipo tinjikutulusya kulikwesya kwa ŵandu ŵangalwe.

¹² Ŵandu ŵitacikulupuka taciŵa ŵakusoŵa mnope kupunda mujukusasoŵela golidi* jwambone mnope.

¹³ Iyoyo, tinjikutenganya kwiwunde, nipo cilambo capasi ticicityoka pa yilimbilimbi jakwe. Yosopeyi tiyicitendekwa ligongo lya ukali wa Une AMBUJE Ŵamaciligosope, pa lisiku litinjilosya lutumbilo lwangu lwakogoya.

¹⁴ “Mundu jwalijose tacitila kuwujila ku cilambo ca kumangwakwe, tacitila mpela mbaŵala jakwatila ŵandu ŵa mani, soni mpela ngondolo syangali ŵakucinga.

¹⁵ Jwalijose jwakamulwa taciwulajidwa ni upanga.

¹⁶ Ŵanace ŵawo tacawulaga pakwaputisya m'maganga, jemanja mli mkulola. Tacisumula yindu yosope ya m'nyumba syawo, acakongwe ŵawo tacigona nawo mwakwakanganicisya.”

¹⁷ AMBUJE akuŵeceta kuti, “Tinatume Amedi kuti apute ngondo ni ŵandu ŵa mu msinda wa Babiloni, jemanjajo ŵangasosa silifa,* nambo soni ŵanganonyelwa ni golidi.

¹⁸ Ni mawupanga gawo tacawulaga acacanda, ngasiŵatendela canasa ŵanace, mitima jawo ngasijitenda canasa kose ni ŵanace ŵa makandi.

¹⁹ Babiloniya ali msinda wakusalala kupunda misinda jine josope, nipo ŵandu ŵakwe akusawunonyela, nambo Une, AMBUJE, tinjiwujonanga, msinda wa Babiloni, munatendele ni misinda ja Sodomu ni Gomola.

²⁰ Pangali jutacitama kapena kutamilicika mwelemo, atamose Mluya jwagamba kwendajenda ngasataŵa cisakasa mwelemo, pangali soni jwakucinga jutacilanga ngondolo syakwe kweleko.

²¹ Nambo tigaciŵa malo gakutama yinyama ya mwitinji, nyumba syawo tisicigumbala ni yisusi ya acikasisi, mbuni tisicitamaga kweleko, nipo acitonde ŵa mwitinji tacisumbasumba mwelemo.

²² Matunu tigacitongolaga penani pa sanja syawo, makule nago tigacitongolaga m'nyumba syambone sya Ayimwene. Ndaŵi ja cilambo ca Babiloni jiŵandicile, masiku gakwe gali ciŵandika kumala.”