Yesaya 12 - Chiyawo Bible

Nyimbo jakutogolela

¹ Lisiku lyelelo jwalijose jwa jemanja taciti: “Ngwatogolela ŵalakwe AMBUJE!* Wawo ŵambilile mtima nambope ŵalakwe ŵangululucile, nipo ŵalakwe alimbikasisye mtima.

² Yakuwona nditu, Mlungu ali mkulupusyo jwangu, tinjakulupilila ŵalakwe, soni ngisinjogopa. Macili gangu gakusatyocela kwa AMBUJE Mlungu, tinjajimbila nyimbo ŵalakwe, pakuti ali cikulupusyo cangu.

³ Ni lukondwa timciteka mesi kutyocela mu yisima ya cikulupusyo.”

⁴ Lisiku lyelelo timciti, “Mwatogolele AMBUJE, mpopeleje mu lina lyakwe. Mwasalile ŵandu ŵa mitundu josope yiŵayitesile AMBUJE. Mlalicile kuti lina lyakwe lili lyakupunda mena gane gosope.

⁵ Mwajimbile AMBUJE nyimbo syakwalumba, ligongo lya yekulungwa yatesile. Mwasalile ŵandu wosope ŵa cilambo capasi kuti ayimanyilile yeleyi.

⁶ Jemanja ŵandu ŵa mu Siyoni,* mtende lisegwe ni kwimba mwa lukondwa, ligongo lyakuti Ŵaswela ŵala ŵa Isalaeli ali ŵakulungwa sikati jenu.”