Yesaya 11 - Chiyawo Bible

Ucimwene wa mtendele

¹ Lunyambi tilucisipuka pa litepo lya Yese nipo yakusipuka yakwe tiyicikopocela ku miciga jakwe.

² Msimu wa AMBUJE* tiwuciŵa pa jwalakwe msimu wakupeleka lunda soni kupikanicisya, msimu wakupeleka upungu ni macili, msimu wakupeleka umanyilisi wa yindu soni kwajogopa AMBUJE.

³ Nipo kwajogopa AMBUJE ni cele citiciŵa cindu cakwanonyelesya. Ngasalamula pakuya mujikuwonecela ngope, kapena kwalamula pakuya yakupikana.

⁴ Nambo tacalamula ŵakulaga mwacilungamo, nipo ŵandu ŵakutulala m'mitima ŵa cilambo capasi tacalamula mwangatenda lusagu. Maloŵe gele taciŵeceta tigaciŵa mpela simbo jakwakwapulila ŵakulemwa, pitacilamula jwalakwejo, ŵandu ŵakusakala taciwulajidwa.

⁵ Cilungamo ticiciŵa mpela lamba jwa jwalakwe, nipo kulupicika kwakwe tikuciŵa mpela cakulitaŵilila naco mciwunu mwakwe.

⁶ Lisogo tilicitama pamo ni mwanace jwangondolo, cisuŵi ticicigona pasi pamo ni mwanace jwa mbusi, mwanace jwa ng'ombe ni mwanace jwa lisimba tacilya pamo, nipo mwanace jwamnono ni jutaciyicingaga yosopeyo.

⁷ Ng'ombe jajikongwe ni cimbalangondo tiyicilya pamo, nipo ŵanace ŵawo tacigona pamo. Lisimba tilicilya manyasi mpela ng'ombe.

⁸ Mwanace jwakonga tacing'anda pa lisimbo lya litewo, nipo mwanace jwalesile konga taciwujinjisya mkono wakwe malo gali lipili, nambo ngasalumidwa.

⁹ Tipaciŵa pangali soni cine cilicose cakupweteka kapena cakonanga pa litumbi lyeswela lya Mlungu. Nipo ŵandu pa cilambo cosope capasi taciŵa wegumbale ni lunda lwakwamanyilila AMBUJE, mpela mujikusagumbalila nyasa ni mesi.

Ŵandu ŵali ku ukapolo taciwujila

¹⁰ Lisiku lyelelo mwenye jwasambano jwakutyocela ku liŵasa lya Daudi* taciŵa cimanyisyo kwa ŵandu ŵa mitundu josope. Ŵandu wosope tacisongana kwa jwalakwe, nipo malo gakwe gakutama tigaciŵa ga ucimbicimbi.

¹¹ Pa lisiku lyelelo AMBUJE tacitambalisya mkono wawo kaŵili kuti ŵakulupusye ŵandu ŵawo ŵakusigalila ku Asiliya, ku Iguputo, ku Patilosi, Ifiyopiya, ku Elamu, ku Babiloniya, ku Hamati ni ku yilambo ya mungulugulu mwa nyasa jekulungwa.

¹² Tacajimicila cimanyisyo ŵandu ŵa mitundu jine,* tacasonganya ŵakwasika ŵa ku Isalaeli soni ŵapwilingenye ŵa ku Yuda kutyocela kumbali syosope mcece sya cilambo ca pasi.

¹³ Wiwu wa Efelemu kucitendela cilambo ca Yuda tiwucimala, nipo ŵele ŵakucisisya cilambo ca Yuda taciwulajidwa. Efelemu ngasatenda wiwu ni Yuda, soni Yuda ngasasisya Efelemu.

¹⁴ Yilambo ya Yuda ni Efelemu yalumo, tiyiciputa ngondo ni cilambo ca Afilisiti ŵa kungapilo lyuŵa, nipo wosopewo yalumo tacisumula yindu ya ŵandu ŵa kungopoko lyuŵa. Tacilimbana ni ŵandu ŵa ku Edomu ni Mowabu, nipo ŵandu ŵa ku Amoni tacapikanilaga.

¹⁵ Nipo AMBUJE tacijipwesya mnope nyasa jekulungwa ja ku Iguputo. Taciwutambalisya mkono wakwe nipo tacijitendekasya mbepo jakoca kupuga ni kumusya Lusulo lwa Yufuleti. Lusulolo tulucigaŵikana mtumasulo msano ni tuŵili, kuti ŵandu ajomboce pejumu.

¹⁶ Pelepo tipaciŵa litala lyekulungwa lyakutyocela ku Asiliya, lyele litacijenda Aisalaeli utacisigalila, mpela mwele yiyaŵelele pa litala lyekulungwa lyele Aisalaeli ŵajesile pakutyoka ku Iguputo.