Yesaya 10 - Chiyawo Bible

¹ Likungu kwa jemanja wosope ŵakupanganya malamusi gakwalagasya ŵandu ŵangu.

² Pakutenda myoyo mkusimwakanya ŵandu ŵakulaga ukoto wawo, soni kulamulidwa mwa cilungamo. Amu ni mwele mumkusatendela pakwasumula yindu acakongwe ŵawilwe soni ŵanace ŵamasije.

³ Ana timcitenda cici pa lisiku lyele Mlungu tacimpa cilango? Ana timcitenda cici pitaciyika ni yisawusyo kutyocela ku yilambo yakutali? Ana timcitilila kwa nduni jwele tamkamucisye? Ana yipanje yenu timciyisisa kwapi?

⁴ Tacimwulaga ndaŵi jakuputa ngondojo soni ŵane tacijigalidwa mpela acikayidi. Atamose yindu tiyiciŵa iyoyo, nambo lutumbilo lwa AMBUJE* tuluciŵa mkanilumale. Mkono wakwe tiwuciŵa uli wetambasukule kuti apelece cilango.

Mwenye jwa ku Asiliya ali cida ca Mlungu

⁵ AMBUJE ŵatite, “Ndumbile, nipo cingamulisye masengo cilambo ca Asiliya mpela cimbonga cakumpela cilango jemanja.

⁶ Ngutuma cilambo ca Asiliya kuja kumenyana ni ŵandu ŵangamjogopa Mlungu, ŵandu ŵandendekasisye kutumbila. Natumile jemanjajo kuja kusumula yindu ni kwiŵa ni kwapondaponda ŵandu mpela mataka mwitala.”

⁷ Nambo mwenye jwa ku Asiliya akwete nganisyo syakusokonesya. Jwalakwejo akusacilisya konanga yilambo yejinji.

⁸ Jwalakwe akuti, “Mlongola jwangu jwalijose jwa ngondo ali mcimwenepe!

⁹ Une najipundile misinda ja Kalino ni Kakameshi, misinda ja Hamati ni Alipadi, najipundile soni misinda ja Samaliya ni Damasiko.

¹⁰ Ni macili gangu, nawuleje ayimwene sikati ja ŵandu ŵakupopelela tumilungu twakupanganyidwa ni ŵandu, ŵele yilandanyo yawo yaliji yejinji mnope kupunda ya ku Yelusalemu ni Samaliya.

¹¹ Ana mpaka ndepele konanga cilambo ca Yelusalemu ni tumilungu twakwe mpela munatendele ni Samaliya?”

¹² AMBUJE akuti, “Pitinjimalisya masengo gawo gosope pa Litumbi lya Siyoni,* ni ku Yelusalemu AMBUJE tacipeleka cilango kwa mwenye jwa ku Asiliya, ligongo lyakulikwesya ni kulilumba kwakwe.”

¹³ Mwenye jwa ku Asiliya akulikwesya pakuŵeceta kuti, “Nayitesile yeleyi ni macili gangu, soni ni lunda lwangu ligongo mbele jwakupikanicisya. Ndyosisye malile sikati ja mitundu ja ŵandu, soni sumwile yipanje yawo. Uŵatemi pa citengu ca ucimwene natyosisye.

¹⁴ Mkono wangu ukamwile yipanje ya mitundu ja ŵandu, mpela mwakusakamulila mundu tujuni pa cisusi. Mpela mwakusagasonganyila ŵandu mandanda gakulecedwa. Myoyo ni munatesile Une pakucisonganya cilambo cosope capasi. Nipo paliji pangali atamose jumo juŵalinjile guluka, atamose jumo jwakulila.”

¹⁵ Nambo AMBUJE akuŵeceta kuti, “Ana liŵago mpaka lipakomboleka kulikwesya kupunda mundu jwakulikamulisya masengo? Ana saha jili jakusosekwa mnope kupunda mundu jwakujikamulisya masengo? Cimbonga ngaŵa mkulinyakula cisyenepe; nambo mundu ni jwakusacinyakula cimbonga.”

¹⁶ Myoyo AMBUJE, Mlungu Jwamaciligosope, tacitumisya cilwele kwagandisya asilikali ŵa ngondo; mcilu mwawo timuciŵa moto wangasima.

¹⁷ Mlungu ŵele ŵali lilanguka lya Isalaeli tacitendekwa kuŵa moto, motowo tiwucajoca ni kwatinisya mpela miŵa pa lisiku limo.

¹⁸ Tacijonanga ukwete wawo wekulungwa ni migunda jawo ja cajila. Tiyicijonanjidwa yosope, mpela mundu jwakulwala jwagandile mnope.

¹⁹ Yitela yakusigalila mu ukwetewo tiyiciŵa yamnono, yakuti mpaka mwanace kupakombola kuyiŵalanga.

Ŵapanandi taciwujila

²⁰ Pa lisiku lyelelo ŵakusigalila ŵa Isalaeli, ŵakulupuka ŵa mwiŵasa lya Yakobo,* ngasakulupilila soni yilambo yine, nambo tacakulupilila mnope AMBUJE Mlungu jwamswela jwa Isalaeli.

²¹ Ŵakusigalila ŵamnono taciwujilila, ŵakusigalila ŵa Yakobo, taciwujilila kwa Mlungu Jwamaciligosope.

²² Jemanja Aisalaeli, atamose ŵandu ŵenu atupe mpela mcenga wa ku nyasa, ŵakusigalila ŵamnonope ni wutaciwujilila. Conasiko cipelecedwe, calakweco ticicilosya cilungamo cakupunda.

²³ AMBUJE, Mlungu Jwamaciligosope, tacijonanga cilambo cosope mpela muŵalamulile.

AMBUJE tacapa cilango Asiliya

²⁴ Ali ni ligongo lyakwe AMBUJE, Mlungu Jwamaciligosope akuŵeceta kuti, “Ŵandu ŵangu ŵimkutama mu Siyoni, mkasimwajogopa ŵandu ŵa cilambo ca Asiliya, atamose kuti akumlagasya muŵatendelaga ŵandu ŵa cilambo ca Iguputo.

²⁵ Ndaŵi jisigele panandi kuti masye lutumbilo lwangu pa jemanja, nambo tinjatumbilila jemanjajo mpaka kwajonanga.

²⁶ Une, AMBUJE Ŵamaciligosope, tinjakwapula jemanjajo ni yikoti, munatendele pakwakwapula ŵandu ŵa ku Midiyani, pa lwala lwa Olebi. Tinjilosya macili gangu ginakamulisye masengo pakupanganya litala pasikati pa nyasa ku Iguputo.

²⁷ Nipo mu ndaŵi jelejo tinjimkulupusya ku macili ga cilambo ca Asiliya, tinjigajonaga makongwa ga mlukosi mwenu, pakuti sambano mjimbele.”

Amagongo akwika kuputa ngondo

²⁸ Amagongo ŵa cisilikali ayice mu msinda wa Aiyati, ayice pakupitila m'musi wa Migiloni ni kwika katundu jwawo ku Mikimashi.

²⁹ Apitile pa mpata ula nipo tagone ku Geba ciloci. Ŵandu ŵa ku Lama akutetemela, nipo ŵa ku Gibeya m'msinda wa Saulo atisile.

³⁰ Mlile mwakubangula, jemanja ŵandu ŵa ku Galimu! Mpikanile, jemanja ŵandu ŵa ku Laisha! Mjanje jemanja ŵandu wa ku Anatoti!

³¹ Ŵandu ŵa ku Madimena akutila, ŵandu ŵa ku Gebimu ajuŵile.

³² Lelo jino amagongowo takajime ku Nobu, kweleko taciŵa ali mkupukunya makono gawo kwajogoya ŵandu ŵa Kwitumbi lya Siyoni, Litumbi lya Yelusalemu.

³³ Nambope AMBUJE, Mlungu Jwamaciligosope tacakata jemanjajo mpela nyambi sya citela. Acakulungwa tacigwisidwa, ŵakulikwesya tacanandiya.

³⁴ AMBUJE tacakata jemanjajo mpela mwakusakatila ŵandu yitela ya mkati mwa ukwete ni liŵago. Jemanjajo tacigwa mpela muyikusagwila atamose yitela yekulungwa ya ku Lebanoni!