Yesaya 1 - Chiyawo Bible

¹ Bukuji jikuŵeceta ya yindu yiŵajuwile Mlungu kwa jwakulocesya* Yesaya, mwanace jwa Amosi. Jikuŵeceta yakwaya Yuda ni msinda wa Yelusalemu mu ndaŵi ja Usiya, Yotamu, Ahasi ni Hesekiya ayimwene ŵa ku Yuda.

Mlungu akwasisya ŵandu ŵakwe

² AMBUJE* ŵatite, “Mpikane cilambo capasi ni kwinani, yinguŵeceta une! Ŵanace ŵangu unalelite, sambano anjimucile.

³ Ng'ombe jikusam'manyilila msyene, nipo soni bulu jikusamanyilila kwakusajilicisya, nambo Aisalaeli ngakumanyilila une, ŵandu ŵangu ŵangapikanicisya kose.”

⁴ Ha! Lukosyo lwakulemwa, ŵandu ŵesitopelwe ni ulemwa,* ŵakupagwa kutyocela kwa ŵandu ŵakutenda yakusakala, ulemwa wenu umwutile pasi! Mwakanile AMBUJE, Mlungu Jwamswela jwa Isalaeli, soni mtyosile sikati jakwe.

⁵ Ana ligongo cici mkupitilisya kwimucila? Ana mkusosa kupitilisya kupegwa cilango? Isalaeli, mtwe wenu ugumbele ni maŵanga nipo mtima wenu uli wakulwala soni wangali macili.

⁶ Kutyocela ku sajo syenu mpaka ku mtwe wenu pangali pele pali pambone, cilu cenu cosope cili ceposokoce soni cegumbale ni yilonda, miasi jikusulula kutyocela m'maŵanga genu. Maŵanga gakwe gangacapa, gangataŵa soni gangapaka mawuta gakoloŵesya.

⁷ Cilambo cenu ciŵele mpela ca masije, misinda jenu jijocedwe ni moto. Acalendo akucijonanga cilambo cenu mli papopo. Cilamboco ciŵele ca masije, acipaswile acalendo.

⁸ Msinda wa Yelusalemu usigele jikape, uŵele mpela sanja ja mu mgunda wa mpeleya, mpela kacilindo mu mgunda wa mangaka, nambo soni mpela msinda wesyungulilidwe ni ŵa ngondo.

⁹ Naga yikaŵe kuti Mlungu Jwamaciligosope nginatukulupucisila ŵane ŵamnono, ni kuti tukajonasice wosope, mpela ŵandu ŵa ku Sodomu ni Gomola.

¹⁰ Sambano mpikane yele yakuyiŵeceta AMBUJE, jemanja acakulungwa ŵa ku Sodomu. Mpikanicisye yele Mlungu jwetu yakumjiganya, jemanja ŵandu ŵa ku Gomola.

¹¹ AMBUJE akuti, “Ana mkupela kuti une ngusasosa mbopesi syosope simkusapeleka kwa une? Mbocele mbopesi syakupundanganya mnope sya ŵanace ŵa tonde ŵangondolo ŵakutinisya, ni sya mawuta ga nyama syejimbale. Ngingujisaka soni miasi ja ng'ombe, ŵanace ŵangondolo ni mbusi sya mikambako.

¹² Ana ŵani akusamlamula kuti myice nayo yeleyi pameso pangu? Ana ŵani akusamsalila kuti mliŵateje mluŵala lwa nyumba jangu?

¹³ Mkuyika nasyo soni akuno mbopesi syenu syacabecabe. Kununjila kwa lyosi lyakwe kukunyalaya. Ngisingombola soni kupilila najo misongano jenu ja dini, soni ja yindimba ya pakopoka kwa lwesi ni ya lisiku lyakupumula* lya Ayuda, ngisimbilila ni mapopelo gesakasidwe ni ulemwa.

¹⁴ Jwanganonyelwa ni yindimba yenu ya pakukopoka kwa lwesi ni ya masiku genu gamaswela. Yeleyi yiŵele katundu jwakusitopa kwa une, mbesile ni kupilila nayo.

¹⁵ “Naga mkuganyakula makono genu ni kupopela, une ngisindola kweleko. Atamose mpopele camtuli, une ngisimbikanila, ligongo m'myala mwenu mugumbele miasi.

¹⁶ Mlijojesye, mliswejesye; mlece yakusakala yosope yinguyiwona mli kutenda. Elo, mlece kutenda yakusakala.

¹⁷ Mlijiganye kutenda yambone. Msosesoseje cilungamo, ŵakulagasidwa mwakamucisyeje, mwateteye ŵanace ŵamasije, mŵeceteje yisyene kwakamucisya acakongwe ŵamasije.”*

¹⁸ AMBUJE akuŵeceta kuti, “Kwende tuŵecete magambo genu: Mŵele ŵacejewu ligongo lya ulemwa wenu, nambo une tinjimcapa, nipo timciŵa ŵaswela kuti mbee. Mgambile kuti psyu mpela miasi, timciŵa ŵaswela mpela litonji.

¹⁹ Naga mkulipeleka ni kumbikanila, timcilya yambone ya mcilambo.

²⁰ Nambo naga mkukana ni kunjimucila, timciwulajidwa ni upanga.” Une AMBUJE mbecete myoyo.

Msinda wegumbale ni ulemwa

²¹ Msinda wele kala waliji wakulupicika ukutenda mpela jwamkongwe jwa lilama. Msinda wele kala waliji ni ŵandu ŵa cilungamo, sambano ugumbele ni ŵandu ŵakuwulaga acimjawo.

²² M'mwe Yelusalemu mwaliji mpela silifa,* nambo sambano mli ŵangali masengo. Mwaliji mpela finyo jwambone, nambo sambano mŵele mpela finyo jwewanganye ni mesi.

²³ Acimlongola ŵenu aŵele ŵakunjimucila soni akusapikanganana ni ŵandu ŵawiyi. Jwalijose akuyinonyela yipupu, soni akusawutucila kupocela mituka. Ŵangacinjilicisya ŵanace ŵamasije, nipo ŵangapikanila acakongwe ŵamasije.

²⁴ Ni ligongo lyakwe AMBUJE, Mlungu Jwamaciligosope, Jwamacili jwa Aisalaeli jula, akuŵeceta kuti: “Tinjilosya lutumbilo lwangu kwa amagongo ŵangu ni kwawucisya mbusyo.

²⁵ Tinjitambasukula ligasa lyangu kuti limbane namwe. Tinjinyelenyendula ulemwa wenu ni kuwutyosya, mpela mwakusatyocesya mkuwo ku yisyano pakukamulisya masengo mtela.

²⁶ Tinjimpa ŵakulamula mpela ŵele umwaliji nawo kalakala. Nombe nawo apungu ŵenu tinjatamilisya mpela muyaŵelele kalakala. Kaneko m'mwejo timcikolanjidwa msinda wakulungama, soni ŵakulupicika.”

²⁷ Msinda wa Yelusalemu tiwucikulupusidwa ni cilungamo, ni wosope ŵakutama mwelemo utacipesya ulemwa mwakulungamika.

²⁸ Nambo ŵakwimucila ni ŵakulemwa tacajonanga yalumo; ŵele ŵakwatila AMBUJE tacimala.

²⁹ Timcitenda soni ligongo lya yitela ya mtundu yele yimwayinonyelaga; timcigwisya ngope jenu ligongo lya migunda jele mwalisagulile jika.

³⁰ Pakuti timcilandana ni citela ca mtundu cenyale masamba gakwe, timciŵa soni mpela mgunda wangali mesi.

³¹ Ŵandu ŵamacili taciŵa mpela manyasi gejumu, masengo gawo tigaciŵa mpela lilamba lya mwana lya moto. Ŵandu wosopewo tacipya yalumo ni masengo gawo, nipo pangali jutacipakombola kuwusimisya motowo.