Yelemiya 9 - Chiyawo Bible

¹ Nganonyele kuti mtwe wangu uŵe mpela cisima ca mesi, kuti meso gangu gaŵe mpela uliŵa wa misosi, kuti ndile musi ni cilo, kwalilila wosope uŵawile ŵa mtundu wa ŵandu ŵangu.

² Ana ŵani utacimba malo gagona mcipululu, kuti nalece ŵandu ŵangu ni kwatila. Wosope ŵenewo ali ŵa cikululu soni ali ŵa mwikuga lya ŵandu ŵa unami.

³ Jemanjajo akusapinda lulumi mpela ukunje; cilambo cigumbele ni unami ngaŵaga yakuwona yisyesyene. AMBUJE* akuŵeceta kuti; Ŵandu ŵangu akusajaga mcijonjecesyajonjecesya yakusakala, soni une ngakumanyilila une mpela AMBUJE ŵawo.

⁴ Jwalijose akalamuceje ni mjakwe, akamkulupilila atamose mlongo mjakwe jwene. Yili yakuwona kuti jwalijose akusasaka kusumula malo ga mlongo mjakwe jwalijose akusamnyosya mjakwe.

⁵ Jwalijose akusamlambucisya mjakwe, soni jwangaŵeceta yakuwona. Pakamwa pawo ŵapasyoŵecesye kuŵeceta ya unami. Akusanonyela yakusakala yejinji, myoyo ngaŵa mkupakombola kupesya ulemwa* wawo.

⁶ Akusagamba kupwatika ulemwa wine penani pa ujakwe, unami penani pa unami wine. Akusakana kumanyilila une mpela Mlungu jwawo. AMBUJE akuŵeceta myoyo.

⁷ Ali ni ligongo lyakwe AMBUJE Ŵamaciligosope akuŵeceta kuti, “Ŵandu ŵangu tinjanyelenyendula mpela cisyano, ni tinjalinga. Jemanjajo ali ŵakulemwa, ana mpaka nalecelele uli?

⁸ Lulumi lwawo luli mpela mpamba wesongoce mnope; ndaŵi syosope ni pakamwa pawo akusaŵeceta ya unami. Jwalijose akusaŵeceta maloŵe gambone kwa mjakwe, nambo citamileco ali mkusaka mu mtima mwakwe kuti amtende ciswamba.

⁹ Ana yeleyi ni ndece kwapa nayo cilango? Yisyene kuti ngawujimucila mtundu wamti myiyi wa ŵandu? AMBUJE aŵecete myoyo.”

¹⁰ Une natite kuti, “Tinjikola canasa ni kulila mwakwesya ligongo lya matumbi. Tinjidandawula ligongo lya malo ga mopo gakulicisya yilangwa ligongo lyakuti mopo ujumwile, mwakuti pangali jwalijose jwakusajawulako, atamose kulila kwa ng'ombe kwangapikanika amta panandi. Yijuni yosope ni yinyama ya kwitinji yitisile, ngawoneka soni.”

¹¹ AMBUJE* akuŵeceta kuti, “Msinda wa Yelusalemu tinjiwusandusya kuŵa masame, tinjiwusandusya kuŵa mwakutama makule. Misinda ja ku Yuda tijicilecedwa, ngasatamamo ŵandu.”

¹² Une nawusisye kuti, “Ana jwalunda nduni jwampaka ayipikanicisye yeleyi? Ana AMBUJE* ŵalondecesye ŵani, kuti jwele mundujo akalondecesye ŵane? Nambi ligongo cici cilambo cijonasice ni kuŵa cipululu mwangapita ŵandu?”

¹³ AMBUJE ŵajanjile kuti, “Ligongo lyakuti ŵandu ŵanguwo nganagakuya malamusi ginapele ni kungagapikanila maloŵe gangu ni kugasamalila.

¹⁴ Nambo ŵagambaga kukuya yakulemwa ya m'mitima jawo jakanika. Ŵaliji mkumlambila Baala* mpela muŵajiganyicisye acinangolo ŵawo.

¹⁵ Mpikane yitinjitenda une AMBUJE* Ŵamaciligosope, Mlungu jwa Aisalaeli. Ŵandu ŵeleŵa tinjalisya yakumela ya kuŵaŵa ni kwapa mesi ga yikoko kuti amwe.

¹⁶ Tinjapwilinganya sikati ja mitundu ja ŵandu jele jemanjajo kapena acinangolo ŵawo nganajisimana. Tinjakuya ni asilikali ŵa ngondo mpaka kwajonanga wosope ŵene.”

Ŵandu ŵa ku Yelusalemu akuŵenda cikamucisyo

¹⁷ AMBUJE Ŵamaciligosope akuŵeceta kuti, “Mganisye cenene pa yele yikutendekwa. Mwaŵilanje acakongwe ŵakulila malilo kuti ayice. Acakongwe aŵe aŵala ŵakusamanyila kulila mnope malilo ŵala.”

¹⁸ Ŵandu ŵatite kuti, “Mwasalile jemanjajo ayice mwacitema atulilile kuti m'meso mwetu muyice misosi ni kuti ngwimbi syetu sinyoŵe.”

¹⁹ Kukupikanika masegwega kulila ku Siyoni,* masegwego gakuti, “Ngondone! Tujonanjidwe! Soni syekulungwa situgwilile uwe. Tukwenela kuleka cilambo cetu ligongo lyakuti nyumba syetu asigwisisye.”

²⁰ Une natite kuti, jemanja acakongwe, mpikanile maloŵe ga AMBUJE. Mtejele mapikanilo genu ni mpikanile yakuŵeceta. Mwajiganye ŵanace ŵenu ŵacakongwe ulile wa malilo. Jwalijose amjiganye mjakwe nyimbo ja pa malilo.

²¹ Ciwa cituyicile kupitila m'mawindo, cijinjile atamose m'majumba getu ga ucimwene, ciwa cawuleje ŵanace ŵetu m'misewu, soni ciwaco camasile kupulula acacanda m'maluŵala.

²² AMBUJE ŵasalile kuti sale yeleyi: “Mitembo ja ŵandu tijicigwa, tijiciŵa mbwembwembwe palipose mpela ndoŵe m'migunda, mpela matita ga mbeju ja tiligu panyuma pa ŵandu ŵakukata tiligujo. Nambo pangali jutacigalokotanya matitago.”

²³ AMBUJE akuŵeceta kuti, “Mundu jwalunda akalilumba pa lunda lwakwelo, mundu jwamacili akalilumba pa macili gakwego, soni mundu jwakusicila akayilumba yipanje yakwe.

²⁴ Nambo naga jwine akusaka kulilumba, alilumbe pa cindu cakuti akusapikanicisya ya une, nambo soni akusamanyilila kuti ndili Mlungu jwawo. Akusamanyilila kuti une ndili AMBUJE ŵakunonyela canasa, cilungamo, ni jwakulungamika pa cilambo capasi. Pa yeleyi mtima wangu ukusasangalala. Une AMBUJE mbecete myoyo.”

^25-26 AMBUJE akuŵeceta kuti, “Ndaŵi jikwisa jitinjapa cilango ŵandu wosope, ŵawumbale, ŵali ŵangasamala m'mitima mwawo. Tinjapa cilango ŵandu ŵa ku Iguputo, ku Yuda, Ku Edomu, ku Amoni, ku Mowabu, ni ŵandu ŵa ku cipululu ŵakusamyola ca mumbali mwa mitwe jawo, mitundu josopeji jili jangawumbala, nambo soni nganasunga yicikwimilila cilanga.* Jwalijose jwa ŵandu ŵa ku Isalaeli ŵa pangali jwasunjile cilanga cangu.”