Yelemiya 7 - Chiyawo Bible

Yelemiya akulalicila ku Nyumba ja AMBUJE

¹ AMBUJE* ŵamsalile kuti,

² Mjime pa Cipata ca Nyumba ja AMBUJE ni kulalicila kuti: Mpikane maloŵe ga AMBUJE, jemanja wosope ŵandu ŵa ku Yuda, ŵimkusajinjila pa cipata aci kukwalambila AMBUJE.

³ AMBUJE Ŵamaciligosope, Mlungu jwa Aisalaeli akumsalila kuti, “Mkolosye ndamo ni yitendo yenu, nipo tinjimkunda kutama pa malo agano.

⁴ Mlece kulupilila pa maloŵe ga unami gakuti, ‘Tuli pambone! Ajino jili Nyumba ja AMBUJE!’

⁵ “Mkolosye ndamo syenu ni yitendo yenu. Mtendelaneje yakulungamika jwine ni mjakwe.

⁶ Mlece kwalagasya acalendo kapena ŵanace ŵamasije kapena acakongwe ŵamasije.* Mkasimwawulaga ŵandu ŵangalemwa pa malo agano. Mkasijikuyaga milungu jine, kogopela kuti jitakumjonanga.

⁷ Naga mkugapikanila maloŵe gangu, tinjimkunda kuti mtame pa malo agano, mcilambo cinapele acinangolo ŵenu mpaka kalakala.

⁸ “Sambano mlole, jemanja mkusakulupilila unami.

⁹ Mkusajiŵa, mkusawulaga, mkusatenda cikululu, mkusalumbila ya unami, mkusapeleka mbopesi syakutinisya kwa Baala,* mkusajikuya milungu jine jimkinijim'manyililaga kala.

¹⁰ Kaneko ni mkusayika kukwima pameso pangu m'Nyumba ajino, jele jikusamanyika ni lina lyangu. Mkusaŵeceta kuti, ‘Tuli pambone,’ nambope mkusapelenganya kutenda yakunyalaya yosopeyi.

¹¹ Ana sambano Nyumba jino, jele jikusamanyika ni lina lyanguji, jiŵele sambano mbanga jakuŵamo ŵaciswamba, jemanja mli mgamba kulolela? Une namsyene niyiweni yosopeyi.

¹² Jawulani ku malo gangu ku Shilo, malo gele pandanda gamanyikaga ni lina lyangu. Mkalole yinatesile kweleko ligongo lyakusakala kwa ŵandu ŵangu Aisalaeli.

¹³ Mwatesile yakusakala yosope yeneyi, mwakanile kumbikanila pa ndaŵi jinaŵecete namwe kwangalecesya, soni nginimjanga pa ndaŵi jinamŵilasile.

¹⁴ Myoyo, yinatesile ku Shilo, tinjiyitenda soni pa Nyumba ajino, jele jikusamanyika ni lina lyangu, malo gimkusagakulupililaga jemanja, malo ginampele jemanja ni acinangolo ŵenu.

¹⁵ Tinjimtyosya pameso pangu mpela munatyocesyele acanasi ŵenu wosope, ŵandu ŵa ku Isalaeli. Une AMBUJE mbecete myoyo.”

Ya ungapikanila wa ŵandu

¹⁶ AMBUJE ŵaŵecete ni une acitiji kuti, “Yelemiya, mkasimwapopelela ŵandu ŵeleŵa. Mkalila kapena kupopela m'malo mwawo, mkadandawula kwa une, pakuti une ngusinimpikanila m'mwejo.

¹⁷ Ana ngamkuyiwona yayikutendecekwa m'misinda ja ku Yuda ni m'misewu ja ku Yelusalemu?

¹⁸ Ŵanace akulokotela sasu, atati akukolesya moto, acakongwe akuwunya utandi kuti atelece makeke, mwakumtendela ucimbicimbi Mwenye Jwamkongwe Jwakwinani. Jemanjajo akusataga mbopesi ja yakumwa kwa milungu jine, kuti ambyesye mtima.

¹⁹ Ana jemanjajo ateje kuti atende cici! Ana apesileje kuti akusawusya une, kutendaga ali mgamba kulisawusya acimsyene ni kulitesya soni.

²⁰ Ali ni ligongo lyakwe tinjapa cilango cakogoya mwa ukali. Lutumbilo lwangu tilucigwila pa nyumba janguji, ŵandu, nyama, yitela ni mbeju syakwe. Lutumbilolo tilucikolela mpela moto wangakomboleka kuwusima.”

²¹ AMBUJE Ŵamaciligosope, Mlungu jwakusamlambilaga Aisalaeli, akuŵeceta kuti, “Mjonjecesye yakupeleka yenu yakutinisya pa mbopesi syenu sinesyo, nipo mlye nyama jakwe,

²² Pandaŵi jinakopwesye acinangolo ŵenu mcilambo ca Iguputo, une ngininalamula jemanjajo kuti apeleceje mbopesi syakutinisya kapena mbopesi sine.

²³ Nambo cinalamwile ni cimpepe, cakuti ‘naga ambikanileje une timbeje Mlungu jwawo, soni jemanjajo taciŵa ŵandu ŵangu. Mgakuyeje malamusi gangu gosope kuti yindu yimjendeleje cenene.’

²⁴ Nambo ŵanduwo nganapikanila, nganasamala kose, myoyo ŵapitilisye kuŵa ŵangapikanila ni mitima jawo jakusakala. Jemanjajo ŵalolaga ya mu nyuma ngaŵa ya msogolo.

²⁵ Kutyocela pa lisiku liŵakopwece acinangolo ŵenu ku cilambo ca Iguputo mpaka lelo jino, mbele ndili kumtumicisya ŵakutumicila ŵangu, ŵakulocesya, kwa jemanja.

²⁶ Nambope jemanja nginimumbikanila, nginimsamala. Ni mitima jenu jakanikajo, msakele kwapunda acinangolo ŵenu.”

²⁷ Sambano m'mwe Yelemiya, mkasalile yeleyi ŵandu ŵangu, nambo ngajakumpikanila, mkaŵilanje jemanjajo nambo ngaja kumjanga.

²⁸ Myoyo timwasalile jemanjajo kuti, Awu uli mtundu wa ŵandu ŵimkanampikanila AMBUJE Mlungu jwawo, soni nganasaka kuti kulijiganya kutyocela ku cilango ciŵapegwile. Maloŵe gakuwona gasyesyene gamalile nipo pakamwa pakusagamba kuŵeceta ya unaminamipe.

Yitendo yakusakala ku Ciŵata ca Benihinomu

²⁹ “Mlile ŵandu ŵa ku Isalaeli, msenje umbo syenu, ni msijase. Mjimbe nyimbo ja pa malilo penani pa matumbi ligongo lyakuti Une, AMBUJE, ndumbile, ni kwakana ŵandu ŵangu.”

³⁰ AMBUJE akuti, “Ŵandu ŵa ku Yuda atesile yakusakala une ndili mkulola. Aŵisile tumilungu twawo twakunyalaya m'Nyumba ajino, jele jikusamanyika ni lina lyangu, nipo ajisakesye.

³¹ Ataŵile sanja jakolanjidwa Tofeti m'Ciŵata ca Benihinomu, kuti akapeleceleko mbopesi ŵanace ŵawo ŵacalume ni ŵacakongwe. Yeleyo nganindamula une, atamose kuyiganisya kwene.

³² Ali ni ligongo lyakwe ndaŵi jikwisa jakuti malo agano ngasigakolanjidwa soni Tofeti, kapena ya Ciŵata ca mwanace jwa Hinomu, nambo ya Ciŵata ca Kuwulagawulaga, pakuti ŵandu ŵawe tacasika ku Tofeti, pa ligongo lyakuti ngasipasimanikwa soni malo gakwasika jemanjajo.

³³ Myoyo mitembo ja ŵandu ŵeleŵa tijiciŵa yakulya ya yijuni ya mwinani ni yilombo ya mwitinji, nipo ngasipapagwa mundu jwalijose jutaciyitoposya.

³⁴ Ngasikupikanika soni maloŵe gakusangalala ni ga lukondwa ku misinda ja ku Yuda ni ku misewu ja mu Yelusalemu. Ngasikupikanika soni maloŵe ga lukondwa, ga mlombela jwamlume ni jwamkongwe, pakuti cilamboco ticiciŵa cipululu.”