Yelemiya 6 - Chiyawo Bible

Msinda wa Yelusalemu usyungulilidwe ni amagongo

¹ Mtile, jemanja ŵandu ŵa lukosyo lwa Benjamini mkopocemo mu msinda wa Yelusalemu. Mgombe lipenga lyenu ku Tekowa, ni kukwesya mbendela jenu ku Beti Hekelemu. Likungu tilicimgwila jemanja kutyocela kumpoto, celecitu cili conasiko cekulungwa.

² Msinda wakuwoneka cenene ni wakusalala wa Siyoni,* tinjiwujonanga.

³ Ŵakucinga taciyika ni yilangwa yawo, tacitaŵa matenti gawo mwakuwusyungulila msinda wa Yelusalemu, soni tacilisyaga yilangwa, jwalijose pa malo gakwe.

⁴ Taciŵeceta kuti, “Mliŵicile cile kuti mpute ngondo ni ŵandu ŵa mu msindamu. Yikani kuti tumenyane nawo musi uno.” Nambo tacijila kuti, “Tucelewe pakuti lyuŵa lipendeme kala, soni yiwilili ya kwigulo yitandite kulewupa.

⁵ Yikani kuti tukamenyane nawo cilo cino ni konanga mapupa gakuwucinjilicisya msindawo.”

⁶ Maloŵe ga Mlungu Jwamaciligosope gakuti, “Mgwisye yitela yosope ya mu Yelusalemu, ni kulinganya citundulumya ni cakulinga cakuti asilikali awusyungulile msindawo. Ŵandu ŵa mu msinda welewu akwenela kupegwa cilango, ligongo lyakuti akusagamba kulagasyana.

⁷ Mpela mucikusasunjila cisima mesi gakwe, myoyo soni ni mwele ŵandu ŵa mu msindamu mwakusasunjila yakusakala yawo. Yimkupikanayo yili ya conasiko ni ngondo. Nambo une nguwona ya yilwele ni yilonda.

⁸ Jemanja ŵandu ŵakutama mu msinda wa Yelusalemu, mkunde kuti yisawusyo yeleyi yiŵe lijiganyo kwa jemanja, kogopela kuti cinonyelo cangu pa jemanja citakumala, soni kuti mpaka niwusandusye msinda wenu kuŵa cipululu, ku malo kwele kwangatamako ŵandu.”

Aisalaeli ali ŵandu ŵangapikanila

⁹ AMBUJE* Ŵamaciligosope ŵasalile une kuti, “Mwasosesose ni kwasonganya pamo ŵandu ŵakusigala ŵa ku Isalaeli, ni kwasumula yosope, mpela mwakusatendela ŵandu, pakukaŵa mipeleya ku nyambi syakwe.”

¹⁰ “Ana sambano mbecete ni ŵani, nambo soni nakalamusye ŵani, kuti apikane? Mawiwi gawo gali gewugalice, mwakuti ngaŵa mkupakombola kupikana. Akusaganyosyaga maloŵe ga Mlungu, ni kungagatendela kose masengo.

¹¹ Ali ni ligongo lyakwe ngumbalilwe ni lutumbilo lwa AMBUJE, mwakuti ngaŵa soni mkomboleka kulilekasya kuti lutumbilolo lukawonecela kusa.” Kaneko AMBUJE ŵasalile une kuti, “Lutumbilo lwelelu mkalutaje pa ŵanace ŵakwenda m'misewu, ni pa acacanda ku malo kwakusasongana. Ŵalume ni ŵakongwe tacijigalidwa, atamose ŵacekulupe ŵakwete wuli ni ŵacekulupe mnope.

¹² Nyumba syawo tisicipelecedwa kwa ŵane, kupwatikapo migunda jawo ni acakongwe ŵawo ŵene. Kusyesyene, ni ligasa lyanguli tinjapa cilango ŵandu ŵakutama mcilambomo.

¹³ Pakuti wosope ŵacinandipile ni acakulungwa ŵakwe, akulinjilila kupata mbiya kupitila mu matala gangakulupicika; atamose ŵakulocesya ni ŵakutaga mbopesi ŵawo ali ŵa unami.

¹⁴ Jemanjaji akusaposya maŵanga ga ŵandu pacanyape, akusagamba kuŵeceta kuti, ‘Yosope yili cenene,’ citamileco yindu yosopeyo yili nganiyiŵa cenene.

¹⁵ Jemanjaji atesile yindu yakutesya soni. Atesile yindu yakusakala mnope, nambo ŵangatenda soni amta panandi. Ŵangamanyilila kugwisya ngope syawo mtande wa soni. Ali ni ligongo lyakwe jemanjaji tacigwila sikati ja acimjawo uŵagwile kala. Pa lisiku litinjapa cilango, mbesi jawo tijiciŵa jijojo. AMBUJE akuŵeceta myoyo.”

Aisalaeli ŵamkanile Mlungu

¹⁶ AMBUJE ŵasalile ŵandu ŵakwe kuti, “Mjime pa malekano, ni mlole, ni kuwusya kugali matala gakala ni kulili litala lyambone. Sambano mlikuye litala lyambonelyo, nipo timciŵa pa mtendele.” Nambo jemanja mwatite kuti, “Ngitujenda mwitalamo.”

¹⁷ AMBUJE ŵamsagulile jemanja acilonda ŵakuti apikanileje kukalamusya kwa malipenga. Nambo jemanja mwatite kuti, “Ngitupikanila.”

¹⁸ Myoyo AMBUJE ŵaŵecete ni une acitiji kuti, “Mpikanile jemanja ŵandu ŵa mitundu jine,* ni mlijiganye pa yele yiticatendecela ŵandu ŵangu.

¹⁹ Mpikane jemanja ŵakutama pa cilambo capasi, ŵandu ŵeleŵa tinjajonanga, nambotu yeleyi yili yakuyicisya yakwe ligongo lya unami wawo, ligongo lyakungapikanila maloŵe gangu ni kungagapikanila malamusi gangu.

²⁰ Ana pana cakupindula camtuli kwa une, atamose ayice ni ubani* kutyocela ku Sheba kapena yakununjila yine kutyocela ku yilambo ya kwakutalika? Ngisimbocela yakupeleka yawo yakutinisya, mbopesi syawo syangasangalasya.

²¹ Ali ni ligongo lyakwe ŵandu ŵeleŵa tinjaŵicila yakwakuŵasya kuti agwe. Acatati ni ŵanace ŵawo ŵacalume, acanasi ni acimjawo, wosope ŵenewo tacijonasika.”

Amagongo ŵakutyocela kumpoto

²² AMBUJE akuŵeceta kuti, “Mlole, ŵandu ŵa mtundu wine akwisa kutyocela ku cilambo ca kumpoto. Mtundu wa ŵandu ŵamacili unyakwice kutyocela kumbali syakutali sya cilambo capasi.

²³ Jemanjajo ajigele mawukunje ni mipamba, jemanjajo ali ŵandu ŵangalwe ni ŵangali canasa. Masegwe gawo gali mpela kukukuma kwa nyasa. Jemanjajo akwesile pa mahaci, aliŵicile cile mpela mundu jwakuputa ngondo, akwisa kukumenyana ni jemanja ŵandu ŵangu ŵa mu Yelusalemu.”

²⁴ Ŵandu ŵa ku Yelusalemu akuŵeceta kuti, “Mbili jawo tujipikene,” mwakuti mcilu mwetu mugambile kusisima. Tukudandawula nambo soni tukupikana ululu mpela wakusapikana jwamkongwe pa ndaŵi jakuŵeleka.

²⁵ Mkalinga kwawula ku migunda kapena kwenda mu msewu, pakuti amagongo akwisa ni ngondo mwakuti palipose ŵandu akwete woga.

²⁶ Jemanja ŵandu ŵangu, m'wale yisaka, ni kuligalagatisya pa luwundu. Mlile mwamacili mnope, mpela mundu jwakumlilila mwanace jwakwe jumpepe, pakuti mwacisisimucisya jwakonangajo taciyika kukumwulaga.

²⁷ M'mwe Yelemiya, nimsagwile kuti mŵe cakupimila yisyano. Mwapime ŵandu ŵangu kuti mlole musiŵelele ndamo syawo.

²⁸ Wosope ŵenewo akwete upandu wakanika, wosope ŵenewo ali acikasitape, ni ŵakulimba mpela liganga lya bulonsi ni cisyano. Wosope ŵene akusagamba kutenda yakusakala.

²⁹ Ng'aso ja moto jikukolela mwakutesya woga, mtofu unyelenyendwice ni moto. Nambo masengo gakunyelenyendulago ngagakupindula, ligongo lyakuti litaka lyakusakala ngalikutyokapo.

³⁰ Jemanjajo ali mpela silifa* jwangali masengo, pakuti AMBUJE ŵakanile jemanjajo.