Yelemiya 51 - Chiyawo Bible

Kupelenganya kwa cilango ca Babiloniya

¹ AMBUJE* akuŵeceta kuti, “Tinjiyika ni mbungo jitijicijonanga msinda wa Babiloniya pamo ni ŵandu wosope ŵakutama mwelemo.

² Tinjatuma acalendo ku Babiloniya kuti tapete ni kupyajila yosope yakutama mcilambo cakwe. Jemanjajo tacimjimucila mbali syosope pa lisiku lya yisawusyoyo.

³ Mkalecelela kuti aponye mipamba jawo, kapena kuti awale yida yawo ya ngondo. Mkasimwaleka acacanda ŵakwe ni jumo jose. Mwajonanje ŵa ngondo ŵakwe wosope.

⁴ Taciwulasidwa ni kuwila mcilambo cosope ni m'misewu ja msinda wawo.

⁵ Isalaeli ni Yuda nganalecedwa ni Mlungu jwawo, AMBUJE Ŵamaciligosope. Nambo cilambo ca Ababiloni cigumbele ni ulemwa,* ulemwa wakwe wakumnyosya Jwamswela jwa Isalaeli.

⁶ Jwalijose jwa jemanja atile, atyoce mu Babiloniya kuti akulupusye umi wakwe. Mkawulajidwa nawo pamo pa ndaŵi jitacipocelaga cilango cakwe. Lyeleli lili lisiku lyele AMBUJE tacapa cilango nipo tacawucisya nditu.

⁷ Paja Babiloniya ŵaliji mpela mgawo wa golidi* m'myala mwa AMBUJE, kuti acitende cilambo cosope capasi cikolelwe. Mitundu jejinji ja ŵandu jwamwele finyo jwakwe, ali ni ligongo lyakwe jatesile masoka.

⁸ Babiloniya agwile mwacisisimucisya nipo ajonasice. Mumlilile, mumsosele mtela kuti mwine mpaka alame.

⁹ Ŵane ŵatite kuti, ‘Twalinjile kwapa mtela Ababiloni nambo nginalama. Kwende tugambe kumleka, tumtyocele soni jwalijose ajawuleje ku cilambo cakumangwawo. Paja magambo gakwe gayice mpaka kwinani, gayice mpaka mwipananga.’ ”

¹⁰ Sambano AMBUJE alosisye pakulanguka kuti uweji tuli ŵangalemwa. Kwende tujenesye ku Siyoni* yele yatutendele AMBUJE, Mlungu jwetu.

¹¹ AMBUJE ajumwisye mitima ja ayimwene ŵa Amedi, pakuti cakulinga cawo cili cakuti ajonanje Babiloniya. Mwelemo ni mutacimtendela ligongo lyakonanga Nyumba jakwe. Acimlongola ŵa ngondo akulamula kuti, “Mnole mipamba jenu! Mjigale cile yakulicinjilicisya yenu!

¹² Mkwesye mbendela ja ngondo nipo mjonanje mapupa gakucinjilicisya msinda wa Babiloni. Mwalimbikasye ŵa citetelo. Mŵice acilonda ni mliŵicile cile kuciswamba.” AMBUJE asimicisye nipo tacitenda yiŵaŵecete ya ŵandu ŵa ku Babiloniya.

¹³ Mli ŵakusicila jemanja ŵimkwete sulo syejinji, nambo mbesi jenu jiyice, umi wenu umasile.

¹⁴ AMBUJE Ŵamaciligosope ŵalumbile kuti, “Tinjituma ŵandu ŵangaŵalanjika ŵa ku Babiloniya ŵangaŵalanjika mpela sombe kuti amenyane ni jemanja, ni tacigumila kulosya kuti apundile.”

Nyimbo jakumlumba Mlungu

¹⁵ AMBUJE ni uŵalinganyisye cilambo capasi ni macili gakwe. Jwalakwejo ni juŵapanganyisye yosope ni lunda lwakwe, ni umisili wakwe ŵatandice mawunde kwinani.

¹⁶ Jwalakwejo naga akuŵeceta, kwinani kukusapikanika kukukuma kwa mesi, jwalakwejo ni jwakusayikasya mawunde kutyocela kumbesi kwa cilambo capasi. Akusatendesya kuti njasi jimesye, akusapujisya mbungo kutyocela kwakusajisunga.

¹⁷ Ŵandu wosope ali ŵakuloŵela, ŵangali lunda; m'misili julijose jwa yisyano akusatenda soni ni yilandanyo ya unamiyo. Yilandanyo yakusapanganyayo yili ya unami, mwa yalakweyo mwangali kose umi.

¹⁸ Yilandanyoyo yili yangali mate, yakwenela kuyinyosya, nipo pa ndaŵi jitacipegwaga cilango ŵandu yilandanyoyo tiyicijonanjidwa.

¹⁹ Nambo Mlungu jwa Yakobo* nginaŵa mpela yilandanyoyo, jwalakwejo ali Mkupanganya jwa yindu yosope. Aisalaeli ali ŵandu ŵakwe uŵasagwile jwalakwejo, lina lyakwe lili AMBUJE Ŵamaciligosope.

Nyundo ja AMBUJE

²⁰ AMBUJE akuti, “M'mwe Babiloniya mli nyundo jangu, cida cangu ca ngondo: ni m'mwejo ngusakasanya mitundu ja ŵandu, ngusajonanga ma ucimwene,

²¹ ngusakasanya mahaci ni ŵakwela ŵakwe, ngusaswanya mageleta ni ŵakwendesya ŵakwe,

²² ngusaswanyanda acalume ni acakongwe ŵawo, ni m'mwejo ngusaswanyanda ŵacekulupe ni acacanda, ngusaswanyanda acacanda ni ŵali,

²³ ngusaswanyanda ŵakucinga ni yilangwa yawo, ngusaswanyanda anamalima ni ng'ombe syawo, ngusaswanyanda acibwanamkubwa ni acimlongola ŵa ngondo.”

Ya cilango ca Babiloniya

²⁴ “Une tinjipeleka cilango ku Babiloniya jemanja mli kulola ni wosope ŵakutamamo ligongo lya yileŵi yosope yiŵatesile ku Siyoni,” akuti myoyo AMBUJE.

²⁵ Ngumjimba magambo, m'mwe litumbi lyakonanga, m'mwe ŵimkusasakasya cilambo cosope capasi. Tinjitambasukula ligasa lyangu pakusaka kumpa cilango, ni kumgundumucisya pasi kutyocela ku malwala genu. Tinjimsandusya kuŵa litumbi lyepye ni moto.

²⁶ Pangali liganga lyenu ni limo lyose kutyocela pa masame genu litimciyika nalyo kulikamulisya masengo gakutaŵila ndumba kapena yilimbilimbi. M'mwejo timciŵa mpela cipululu mpaka kalakala. Une AMBUJE mbecete myoyo.

²⁷ “Mkwesye mbendela ja ngondo pa cilambo, mjimbe lipenga kuti mitundu ja ŵandu jipikane. Mŵilanje mitundu josope kuti jipute ngondo ni Babiloniya. Mŵilanje ma ucimwene ga ku Aalalati, ga ku Mini ni ga ku Ashikenasi. Mŵice mlongola jwa ngondo kuti amenyane ni Ababiloniwo. Myice ni mahaci gejinji mpela sombe.

²⁸ Mjisonganye mitundu ja ŵandu kuti amenyane najo ngondo. Mwaŵilanje ayimwene ŵa ku Mediya pamo ni acibwanamkubwa ni nduna syawo, nambo soni ŵa ngondo ŵa myilambo yosope yakusayilamulila.

²⁹ Cilambo cikutetemela, soni cikupuluputa ligongo lya yipwetesi, ligongo yele yapanganyisye AMBUJE ku cilambo ca Babiloniya tiyicitendekwa, yakuti tacicisandusya kuŵa masame.

³⁰ Ŵa ngondo ŵa ku Babiloniya alesile kuputa ngondo, agambile kutama m'malo gawo. Macili gawo gamasile, mwakuti sambano aŵele mpela jwamkongwe. Nyumba syakwe sijocedwe moto, yakuwugalila ya pa yipata yakwe yitemangwice.

³¹ Ŵakuwutuka agamba kusimanasimana, nombe nawo ŵa mitenga agamba kukuyanakuyana. Wosope ŵeneŵa akuja kukumsalila mwenye jwa ku Babiloniya kuti yosope ya mu msinda wakwe yisumulidwe.

³² Yiko yosope yisumulidwe, malo gakuŵa acilonda gajocedwe, soni ŵa ngondo ŵakwe wosope yindu yasokonecele.

³³ Mwangakaŵilisya tiŵawulaje wosopewo ni kwapondaponda mpela tiligu pa malo gakupwagulila tiligujo. Une AMBUJE Ŵamaciligosope, Mlungu jwa Aisalaeli, mbecete.”

³⁴ Ŵa ku Yelusalemu akuti Nebukadinesa mwenye jwa ku Babiloniya atujonasile, Atuswanyandile ni kutujasa mpela mu lulo mwangali kandu. Atumisile mpela cimngwena. Ajikwite ni yakulya yetu yakulyolyopela, ni kutulukula.

³⁵ Ŵandu ŵakutama mu Siyoni aŵecete kuti, “Ya ngalwe yiŵatesile Ababiloni kwa uwe ni ŵanace ŵetu yawujilile acimsyene!” Ŵandu ŵakutama mu Yelusalemu aŵecete kuti, “Babiloniya yiŵe pa mtwe pakwe pa mwele mwatulagasisye!”

AMBUJE tacikamucisya Isalaeli

³⁶ Ali ni ligongo lyakwe AMBUJE akuŵeceta kuti, “Tinjimputila ngondo jenu, nipo tinjimwucisya. Tinjijumusya nduluko sya mesi ga ku Babiloniya, nduluko syakwe syosope tisicipwa.

³⁷ Myoyo cilambo celeco ticisanduka kuŵa liwunjili lya nyumba syegumuce, kumalo kwakutama makule, malo gakogoya ni gakunyosyeka, kwangali jwalijose jwakutama kweleko.

³⁸ Ŵandu ŵa ku Babiloniya tacibangula mpela masimba. Tacilapa mpela ŵanace ŵa masimba.

³⁹ Naga akutenda mitulo, tinjalinganyicisya cindimba. Tinjakolelwesya, nipo tacisangalala ni kugona lugono lwampaka ngajimuka soni.

⁴⁰ Tinjijawula nawo kuti akawulajidwe mpela ŵanace ŵangondolo, mpela ngondolo sya mikambako kapena acitonde. Une Mbuje mbecete.”

Likungu lya Babiloni

⁴¹ AMBUJE akuŵeceta kuti, “Kweli Babiloni apundidwe, msinda wele cilambo cosope capasi cawunyadilaga usumulidwe. Babiloni jula jusandwice cindu cakunyalaya sikati ja mitundu ja ŵandu.

⁴² Nyasa jikwesile mpaka kumila Babiloni, mwakuti awunicilidwe ni matumbela gakwe.

⁴³ Misinda jakwe jiŵele malo gakunyalaya, cilambo cejumu ni cacipululu cilambo cangatamamo ŵandu kapena kwendamo.

⁴⁴ Tinjipeleka cilango kwa Beli, mlungu jwa ku Babiloniya, tinjimlukulikasya yele yiŵamisile. Mitundu ja ŵandu ngisijijawula soni kwa jwalakwejo. “Mapupa gakucinjilicisya msinda wa Babiloni gagwile.”

⁴⁵ Jemanja ŵandu ŵangu, mtile kweleko! Mjanguye kuti mkulupusye ma umi genu! Mlutile lutumbilo lwakogoya lwa Mlungu.

⁴⁶ Mkajasa mtima kapena kutenda woga, ligongo lya ngani simkupikana. Caka ni caka pakusabuka ngani, syakuŵeceta ya ngondo ja cilambo capasi, nambo syakuŵeceta kuti mwenye jwamtijwamti akumenyana ngondo ni mwenye jwamtijwamti.

⁴⁷ Sambano ndaŵi jikwisa jitinjipeleka cilango kwa mlungu jwakupanganyidwa jwa Ababiloni. Cilambo cosope ticicitenda soni, nipo ŵandu ŵakwe wosope taciwulajidwa.

⁴⁸ Kaneko kwinani ni cilambo capasi ni yosope yakutama mwelemo tiyicijimba mwa lukondwa ligongo lyakugwa kwa Babiloniya. Ŵandu ŵakonanga ŵakutyocela kumpoto tacimpunda.

⁴⁹ Babiloniya ŵatendekasisye ciwa ca ŵandu wosope pa cilambo, sambano Babiloniya tacigwa ligongo ŵatendekasisye ciwa ca Aisalaeli. Une AMBUJE mbecete myoyo.

Utenga wa AMBUJE wakuja kwa Aisalaeli ku Babiloniya

⁵⁰ “Jemanja ŵimkulupwice ku ngondo ja Babiloniya, mtyoce apa. Mwakumbucileje AMBUJE atamose mli kwakutalikangana ni kumangwenu, mumkumbucileje Yelusalemu.

⁵¹ Jemanja mkuŵeceta kuti, ‘Tukutenda soni ligongo lyakunyosya kutupocele. Ngope syetu sikutenda soni ligongo lya ŵa cilendo ŵajinjile ku maluŵala gakusagulidwa ga Nyumba ja AMBUJE.’

⁵² Nambo AMBUJE akuŵeceta kuti, jikwisa ndaŵi jitinjipeleka cilango kwa tumilungu twakupanganyidwa twa ku Babiloni, soni kuwuwula kwa ŵandu ŵasomedwe ku ngondo tikucipikanika pa cilambo cosope capasi.

⁵³ Atamose Babiloni alikwesye mpaka kwinani, ni kulimbisya sanja jakwe, tinjatuma ŵakonanga kuti ampunde, akuti myoyo AMBUJE.”

Konasika kwa Babiloni kukwendelecelape

⁵⁴ AMBUJE akuti, mpikane masegwe gakulila ku Babiloni, gakonasika kwekulungwa.

⁵⁵ AMBUJE akonanga Babiloni ni kumasya masegwe gakwe gekulungwa. Kulila kwa ŵandu ŵakwe kukupikanika mpela kukukuma kwa matumbela, mwakuti masegwe gakwe gakukulilakulila.

⁵⁶ Ayice kukonanga Babiloni, soni asilikali ŵakwe akamwilwe, mawukunje gawo gatemangwice. Pajatu AMBUJE ali Mlungu jwakusapeleka cilango, taciwucisya kusyesyene yakulemwa yawo.

⁵⁷ Tinjakolelwesya ŵakulamulila ŵakwe pamo ni ŵandu ŵakwe ŵalunda, acimlongola ni asilikali ŵakwewo soni. Tacigona lugono lwangajimuka nalo. Ni yakuti mwenye, AMBUJE Ŵamaciligosope.

⁵⁸ AMBUJE Ŵamaciligosope akuŵeceta kuti, “Mapupa gekulungwa ga ku Babiloni tigacisimasidwa, yipata yakwe yelewu tiyicijocedwa. Mitundu ja ŵandu jakamwile masengo gangali mate, ŵandu ŵagambile kupela ni kutaŵa yele yayikupsa sambano jino ni moto. Une AMBUJE, mbecete myoyo.”

Yelemiya akutumisya utenga ku Babiloniya

⁵⁹ Mwenye Sedekiya ŵakwete nduna jakwe jekulungwa, lina lyakwe lyaliji Selaya, mwanace jwa Neliya, cisukulu ca Maseyiya. Pa caka ca mcece ca ucimwene wa Sedekiya ku Yuda, Selaya ŵalongene ni mwenyejo kuja ku Babiloniya. Sambano jwakulocesya* Yelemiya ŵampelele utenga Selayajo.

⁶⁰ Yelemiya ŵaliji ali alembile mu buku ya conasiko cosope ca Babiloniya ni yine yosope yakwayana ni Babiloniya.

⁶¹ Yelemiyajo ŵasalile Selaya kuti, “Pitimkayice ku Babiloni, mkaja kulepela kwaŵalanjila ŵandu wosope maloŵe gosopega.

⁶² Mkajile kuti, ‘Wawo AMBUJE, ajenesye cakulinga cawo cakusosa konanga malo agano, ngaleka cilicose, mundu kapena cinyama, nipo tigaciŵa cipululu mpaka kalakala.’

⁶³ Pitimkamale kuŵalanga bukujo, mkajitaŵilile pamo ni liganga ni mkajiponye mu Lusulo lwa Yufuleti.

⁶⁴ Mkaŵecete kuti, ‘Amu ni mutacimililwa Babiloniya. Ngasajimuka soni ligongo lya yakogoya yosope yitinjiyika nayo pa jwalakwejo.’ ” Maloŵe ga Yelemiya gamalile papapa.