Yelemiya 50 - Chiyawo Bible

Yakukamulwa kwa ŵandu ŵa ku Babiloni

¹ Aga gali maloŵe giŵaŵecete AMBUJE* ni jwakulocesya* Yelemiya kwamba ya msinda wa Babiloni* ni ŵandu ŵakwe. Ŵatite kuti,

² “Msale ni kwenesya kwa ŵandu ŵa mitundu josope. Mkwesye mbendela ni msale ngani kuti, Babiloni agwile! Mlungu jwakwe Beli atesyedwe soni nombe nawo Melodaki ajasile mtima. Tumilungu twawo twakupanganya ni yala tunyosyedwe nditu, milungu jakwe jijasile mtima.

³ “Mtundu wa ŵandu ŵa ku mpoto uyice kukuputa ngondo ni cilambo ca Babiloniya tacicitendesya kuŵa masame. Ŵandu ni yinyama tacitila, soni jwalijose ngasatama kweleko.”

Kuwujila kwa Aisalaeli

⁴ AMBUJE akuŵeceta kuti, “Pitijicikwana ndaŵi, ŵandu ŵa ku Yuda ni ku Isalaeli taciyika ali mkulila, kusosasosa une, Mlungu jwawo.

⁵ Taciwusya litala lyakuja ku Siyoni* ni kuwutanda ulendo kupitila litala lyelelo. Tacitenda cilanga* cangamala ni une nipo ngasacikasa.

⁶ “Ŵandu ŵangu ali mpela ngondolo syakusokonecela syele ŵakucinga ŵakwe ŵasisokonesye ni kusijawusya ku matumbi. Ŵagambaga kwendajenda ku mikuli ni matumbi mpaka kuliŵalila kumangwawo.

⁷ Ŵaliwose uŵasimene jemanjajo ŵajonasile. Amagongo ŵawo ŵaŵecetaga kuti, ‘Uwe nginitukola magambo, ligongo lyakuti jemanjaji ni uŵalemwecesye AMBUJE ŵele ŵali pakutama pasyesyene pa jemanjajo, ŵele soni acinangolo ŵawo ŵamkulupililaga mnope.’

⁸ “Ŵandu ŵa ku Isalaeli, mtile ku Babiloniyako! Mcilece cilamboco! Jemanja mtande kukopoka mcilambomo!

⁹ Tisagule ni kwika nalyo likuga lya ngondo lyamacili lya mitundu jine ja ŵandu kutyocela kumpoto kuti lipute ngondo ni ŵandu ŵa ku Babiloniya. Mipamba jawo jili mpela ja msilikali jwakumanyilila kuputa ngondo, jangakulusya jila.

¹⁰ Babiloniya tacijigalidwa, nipo wosope ŵakujigalidwa tacijikuta. Une AMBUJE mbecete.”

Kugwa kwa msinda wa Babiloni

¹¹ “Jemanja Ababiloni, mwajonasile ŵandu ŵangu ŵakusagulidwa. Atamose mŵe ŵakondwa ni ŵakusangala, atamose msumbesumbe mwa lukondwa mpela mwanace jwangondolo jwakuliŵata tiligu, atamose mlile mwakusimbwa mpela mahaci

¹² msinda wenu tiwucitesyedwa mnope soni. Msinda wawuli mpela mama ŵenu taciwunyalayisya. Ababiloni, taciŵa ŵakumalisya mwa ŵandu ŵa mitundu josope. Msinda wawo tiwuciŵa mpela litinji, mpela cilambo cejumu ca cipululu.

¹³ Tiwuciŵa wangali ŵandu ligongo lya lutumbilo lwa AMBUJE, tiwuciŵa cipululupe. Wosope ŵakupita ku Babiloni tacitendesyedwaga usakwa, ni gambaga kusonya ligongo lya maŵanga ga msindawo.

¹⁴ “Mŵe cile kuti mwusyungulile msinda wa Babiloni mbali syosope, jemanja ŵakuwuta mipamba. Culuyani mipamba jenu kuti mumsome. Jwalakwe jula ŵalemwecesye AMBUJE.

¹⁵ Mgumile posepose pakuti alepele. Sanja syakwe sigwile, soni mapupa gakwe gajonasice. Syelesi sili mbusyo sya AMBUJE. Mwawucisyani, mwatende mpela yiŵatite ŵelewo pakwatendela ŵane.

¹⁶ Ku Babiloniko mumtyosye jwakumisa mbeju jwalijose nipo soni jwalijose jwakukata tiligu ni cikwakwa cakwe pa ndaŵi jakugungula mbeju. Pakogopa upanga wa ŵakulagasya acimjawo, jwalijose tacigalawucila kwa ŵandu ŵakwe, ni kutilila ku cilambo cakumangwakwe.”

Kuwujila kwa Aisalaeli

¹⁷ AMBUJE akuŵeceta kuti, “Aisalaeli ali mpela ngondolo syepwilingane sisikutopoledwa ni masimba. Mwenye jwa ku Asiliya ni juŵatandite kwawulaga Aisalaeliwo, kaneko ni kwisa Nebukadinesa mwenye jwa ku Babiloniya kutenda mpela kumemena mawupa gawo.

¹⁸ Ligongo lya yeleyi, Une, AMBUJE Ŵamaciligosope, Mlungu jwa Aisalaeli, tinjipeleka cilango kwa Mwenye Nebukadinesa pamo ni cilambo cawo, mpela munatendele pakupeleka cilango kwa mwenye jwa ku Asiliya.

¹⁹ Ŵandu ŵa ku Isalaeli tinjawucisya ku cilambo cawo. Tacilyaga yakulya yakumela Petumbi lya Kalimeli ni ku dela ja Bashani. Tacilya yakulya yakwanila yakupandidwa ku upande wa Efelemu ni Giliyadi.

²⁰ Ndaŵi jelejo pitijicikwana, tacisosasosa yakulemwa ya Aisalaeli, nambo ngasicisimanikwa ni cimo cose. Taciwungunyawungunya yakulemwa ya Yuda, nambo ngasicisimanikwa ni cimo cose. Pakuti tinjakululucila ŵakusigala unalesile ŵala. Une, AMBUJE mbecete myoyo.”

Cilango ca Babiloniya

²¹ AMBUJE akuŵeceta kuti, “Mpute ngondo ni cilambo ca Melataimu ni ŵandu ŵakutama ku Pekodi. Mwawulaje ni upanga ni kwajonanga wosopewo. Mtende yosope yinimlamwile, Une AMBUJE mbecete myoyo.

²² Masegwe ga ngondo gakupikanika mcilambo, sonitu pana conasiko cekulungwa.

²³ Ŵele ŵali mpela nyundo ja cilambo capasi ŵala, mlole mwajonasicile. Mlole mwaŵelele Babiloniya mwaŵelele cindu cakunyalaya pasikati pa mitundu ja ŵandu.

²⁴ M'mwe Babiloniya, ni mtejile lwawu nipo mtanjilemo, m'mwe ŵimli mjinga. Mwasimanikwe nipo mwakamwilwe ligongo lyakuti mwalimbene ni AMBUJE.

²⁵ AMBUJE awugwile nyumba ja yida yakwe, nipo akopwesye yida ya lutumbilo lwakwe. Pajatu AMBUJE Ŵamaciligosope akwete masengo gakuti akamule ku cilambo ca Babiloniya.

²⁶ M'menyane najo Babiloniya kutyocela ku mbali syosope. Ŵandu ŵakwe mwawunjice mpela mawunjili ga tiligu, nipo mwajonanje kwakumalilatu, mwakuti pakapagwa jwakukulupuka ni jumo jose.

²⁷ Mwawulaje asilikali ŵakwe wosope! Wosope ŵene awulajidwe! Likungu kwa ŵandu wosope ŵa ku Babiloniya! Ndaŵi jikwanile jakuti apegwe cilango!”

²⁸ (Ngwapikana ŵandu ŵakutila ngondo ja ku Babiloniya ali mkusala ya mbusyo sya AMBUJE, Mlungu jwetu, kwapa mbusyo ligongo lyakonanga Nyumba jakwe).

²⁹ “Mwaŵilanje wosope ŵakusaponya mipamba kuti amenyane ni Ababiloni, ayice soni wosope ŵakuwuta mawukunje. Mwasyungulile ni misi jakwe kuti pakasimanikwa mundu jwakutila. Mwape cilango pakukuya yakulemwa yawo. Mwatende yele yiŵatesile ŵane. Jwalakweju ŵanyosisye AMBUJE, Ŵaswela ŵa Aisalaeli.

³⁰ Ali ni ligongo lyakwe acacanda ŵakwe tacigwa m'maluŵala gakwe. Ŵa ngondo ŵakwe wosope tacijonanjidwa pa lisiku lyelelo, akuti myoyo AMBUJE.

³¹ “Babiloniya, mgumbalilwe ni cipongwe, pakuti ndaŵi jenu jikwanile liyice lisiku lyenu lya cilango, akuti myoyo AMBUJE Ŵamaciligosope.

³² Mtundu wakulikwesya, timcikuŵala ni kugwa soni ngasasimanikwa jwakumjimusya. Misinda jenu tinjijijoca ni moto, motowo tiwucitinisya yosope yayiŵandikene ni misindajo.”

³³ AMBUJE Ŵamaciligosope akuŵeceta kuti, “Ŵandu ŵa ku Isalaeli akulagasidwa pamo ni ŵandu ŵa ku Yuda. Wosope uŵakamwile ku ukapolo ŵakamatanye soni ngagopola.

³⁴ Nambo mkulupusyo jwawo ali jwamacili, lina lyakwe lili AMBUJE Ŵamaciligosope. Tacajimilila pa magambo, kuti apelece mtendele pa cilambo cosope capasi, nambo tacalagasya ŵakutama ku Babiloniya.”

³⁵ AMBUJE akuti, “Ciwa ciŵe pa ŵandu ŵa ku Babiloniya. Ciwa ciŵe pa ŵandu ŵakwe, acimlongola ŵawo ni pa ŵandu ŵawo ŵalunda, akuti myoyo AMBUJE.

³⁶ Ciwa ciŵe pa ŵakulocesya ŵa unami kuti aŵe ŵakuloŵela. Ciwa ciŵe pa asilikali ŵakwe ŵa ngondo kuti ajonanjidwe.

³⁷ Mjonanje mahaci ni mageleta gakwe! Ciwa ciŵe pa asilikali ŵawo ŵa cilendo, ŵali pasikati pa jemanjajo kuti aŵe ŵangali macili. Mjonanje yipanje yakwe yosope kuti ticisumulidwe ni ŵandu.

³⁸ Cilala ciyice pa cilambo ni kuti sulo syakwe sijumule. Babiloniya cili cilambo ca tumilungu twakupanganyidwa ni yala, ŵandu ŵakwe ajalwice ni tumilunguto.

³⁹ “Ali ni ligongo lyakwe ku Babiloni, nyama sya mwitinji tisicitama yalumo ni matunu, soni timuciŵa mwana ngukundembo. Kweleko ngasikutama mundu mpaka kalakala. Ngasikusimanikwa soni mundu ni jumo jose pa mipago josope.

⁴⁰ Mpela Mlungu muŵajonanjile msinda wa Sodomu ni Gomola ni misinda josope jakujisyungulila, myoyo soni pangali mundu jutacitama kweleko. Pangali ni jumo jose jutacijendaga kweleko.

⁴¹ Mlole ŵa ngondo akwisa kutyocela kumpoto. Mtundu wakulimbangana ni ayimwene akunyakuka ku madela ga kwakutalika ga cilambo cosope capasi.

⁴² Ajigele mipamba ni mawukunje jemanjajo ali ŵangalwe, soni ŵangali canasa. Masegwe gawo gali mpela kukukuma kwa nyasa. Akwesile pa mahaci, ali awete yida ya ngondo, kuti amenyane ni jemanja, m'mwe msinda wa Babiloniya.

⁴³ Mwenye jwa ku Babiloniya jwapikene ya mbili jawo, mwakuti atengwice m'malungo. Akudandawula akupikana kupweteka mpela jwamkongwe pa ndaŵi jakuŵeleka.

⁴⁴ “Mpela lisimba lyakopoka mu ukweti wa ku Yolodani mu likusajogoyecesya licinga lya ngondolo lyecinjilicisye cenene, Une soni mwacisisimucisya tinjatopocesya Ababiloni kwakutalikangana ni kumangwawo. Kaneko tinjaŵicila jwakwalamulila jutinjimsosa Une. Ana ŵani ŵampaka alandane ni Une? Ana ŵani ŵampaka anjawusye ku nganya ja magambo. Ana mlongola jwapi jwa mpaka asisyane ni une?

⁴⁵ Sambano mpikane yele yimbanganyisye yakuwusisya msinda wa Babiloni ni yingusosa kutenda kwa ŵandu ŵakutama mu msindamo. Ŵanace ŵawo tacijigalidwa nipo wosope taciŵa ŵakudandawula mnope ni likungu lyawolyo.

⁴⁶ Cilambo cosope capasi ticicitetemela ligongo lyakugwa kwa msinda wa Babiloni. Kulila kwakwe tikucipikanika pasikati pa mitundu josope ja ŵandu.”