Yelemiya 5 - Chiyawo Bible

Ulemwa wa Yelusalemu

¹ Ŵandu ŵa mu msinda wa Yelusalemu, mwutucile aku na kuku m'misewu jenu, ni mlilolele mwacimsyene. Msosesose ku maluŵala gakwe ni mlole naga mpaka mumsimane mundu jwali jwakutenda yakulungamika, jwakusacilila kutenda yili yakulungamika ni kulinjilila kuŵa jwakulupicika kwa Mlungu. Naga kumsimana jwamti myoyo, AMBUJE* tacakululucila ŵandu ŵa mu Yelusalemu.

² Atamose ŵandu akuŵeceta kuti akulambila mu lina lya AMBUJE, nambope akuŵeceta ya unami.

³ AMBUJE, ana ŵalakwe ngaŵaga aŵala ŵakusasosa ŵandu ŵakuŵeceta yakuwona? Ŵalakwe ŵapele jemanjajo cilango ligongo lya ulemwa* wawo, nambo jemanjajo nganapikana kupweteka. Ŵalakwe ŵaswanyandile jemanjajo, nambo nganasaka kukolosya yakulemweceka yawo. Ŵajumwisye mitima jawo mpela liganga ni kana kugalawuka mitima.

⁴ Kaneko natite kuti, “Ŵanduŵa akutenda mpela ŵakuloŵela, soni ŵangali lunda; pakuti ngakumanyilila yakusaka AMBUJE kutyocela kwa jemanjajo.

⁵ Tinjawule kwa acimlongola ŵawo kuti ngaŵecete nawo; pakuti jemanjajo akumanyilila yakuyisaka Mlungu jwawo.” Nambo naweni soni kuti wosope ŵenewo akanile ulamusi wa AMBUJE ni kukana kumpikanila jwalakwejo.

⁶ Ali ni ligongo lyakwe amagongo tacasawusya jemanjajo ni kwapaculanya mpela lisimba lya mu ukweti, nombe nago masogo ga mwitinji tigacapaculanya jemanjajo, nambo soni cisuŵi ticicipaculanya jwalijose jwakukopoka kwawula kusa kwa msinda, pakuti ulemwa wawo uli wejinji soni ndaŵi ni ndaŵi aŵele ali kumgalawucila Mlungu.

⁷ Sambano AMBUJE akuwusya kuti, “Sambano mpaka ngululucile uli ulemwa wa ŵandu ŵangu? Ŵanace ŵenu ŵandesile une, soni ŵalambilaga milungu jine jimkanijiŵa milungu jisyesyene. Une napele jemanjajo yosope yiŵayisoŵaga, nambo citamileco ŵanonyelaga kutenda cikululu, ni kwawulaga ku majumba ga ŵandu ŵalilama.

⁸ Jwalijose jwawutucilaga kwa jwamkongwe jwa mjakwe, mpela mugakusatendela mahaci gakwimbala pa ndaŵi jakusaka kumemesya.

⁹ Ana ni mpaka ndepele kwapa cilango ligongo lya yeleyi? Yisyene kuti ngawucisya yakupweteka mtundu wakutenda yeleyiwu?

¹⁰ Sambano tinjatuma amagongo kuti ajawule akajonanje misela ja yisogosi ya mipeleya jawo, nambo ngaŵaga kuti akajimalisye josope kujijonaga. Akasandulanye nyambi syakwe, pakuti ŵandu ŵeleŵa nginaŵa ŵakwe ŵa AMBUJE.

¹¹ Ŵandu ŵa ku Isalaeli ni ŵa ku Yuda wosope ŵene aŵele ŵangakulupicika kwa une.” AMBUJE akuti myoyo.

AMBUJE akwakana ŵandu ŵa ku Isalaeli

¹² Ŵandu ŵa AMBUJE ŵamkanile jwalakwejo nipo ŵatite kuti, “Mlungu ngaŵa mkomboleka kutenda kandu. Cakusakala ngisicitugwila uwe, ngisitujiwona ngondo kapena sala.”

^13-14 Maloŵe ga ŵakulocesya tigaciŵa mpela mbungo, soni utenga wawo nganiwuŵa wakutyocela kwa Mlungu. Yakusaŵecetayo tiyicagwila acimsyenewo. Ali ni ligongo lyakwe sambano AMBUJE, Mlungu Jwamaciligosope ŵatite kwa une kuti, “Yelemiya, pakuti jemanjajo atesile myoyo, maloŵe gangu tinjigasyusya mpela moto mkamwa mwenu, nipo ŵanduwo tinjasyusya mpela sasu, nipo sasusyo tisicatinisya jemanjajo.”

¹⁵ Jemanja ŵandu ŵa ku Isalaeli, nguyikasya kwa jemanja mtundu ŵa ŵandu kuti apute ngondo ni jemanja, mtunduwo uli wakutyocela kwakutalika. Mtundu welewu wangalepela kaŵilikaŵili, mtundu wakalakala, wele mtunduwo mtundu atamose ciŵeceto cakwe ngimkucimanyilila, soni yakuŵeceta yakwe jemanja ngaŵa mkuyipikanicisya.

¹⁶ Mipamba ja ŵa ngondowo jikusawulaga ŵandu ŵajinji, wosope ŵenewo ali asilikali ŵakulimbangana ŵa ngondo.

¹⁷ Tacim'malila yagowola ni yakulya yenu. Taciwulaga ŵanace ŵenu ŵacalume ni ŵacakongwe, tacimwulajila soni ngondolo ni ng'ombe syenu, tacijonaga mipeleya ni nguju syenu. Tacigwisya mwa ngondo misinda jenu jijisyungulilidwe ni lipupa limkusalikulupilila.

¹⁸ AMBUJE akuŵeceta kuti, “Atamose pa masiku gelego ngisinajonanga kwakumalilatu ŵandu ŵangu.

¹⁹ Pitawusyeje kuti, ana ligongo cici AMBUJE Mlungu jwetu atutesile yeleyi? M'mwe Yelemiya timwajanjeje jemanjajo kuti, mpela mumwalecele jemanja AMBUJE, ni kujitumicilaga milungu jine ja cilendo mcilambo mwenu, m'momo soni ni mwele mutimcatumicilaga jemanja ŵandu ŵa mcilambo ca cilendo.”

Mlungu akwakalamusya ŵandu ŵakwe

²⁰ Mlalice kwa ŵanace ŵa Yakobo,* ni mjenesye kwa ŵandu ŵa ku Yuda kuti,

²¹ Mpikane ayi, jemanja ŵandu ŵakuloŵela, ŵangali ni lunda lose, jemanja ŵimkwete meso, nambo ngimkulola, jemanja ŵimkwete mapikanilo, nambo ngimkupikana.

²² Une ndili AMBUJE, ana ngamkutenda woga ni Une? Ana ngamtetemela pameso pangu? Une ni junaŵisile mcenga kuti uŵe malile ga nyasa, gele nyasajo ngaŵamkomboleka kugapunda. Atamose matumbela gakukume camtuli ngaŵa mkomboleka kupelenganyapo. Atamose matumbela gakukume camtuli, ngaŵa mkomboleka kupelenganyapo.

²³ Nambo ŵandu ŵeleŵa ali ŵakanika nambo soni ŵa mtima wa upandu nipo agalawucile kumbali ni kundeka une.

²⁴ Nganaŵecetejepo m'mitima mwawo kuti, kwende twapikanileje AMBUJE Mlungu jwetu, jwakusatupa ula mu ndaŵi jakwe, ula ja cisima upya ni ja mu ndaŵi ja masika ni kutupa uwe yakugowola yambone.

²⁵ Nambo ulemwa wenu ulekasisye yosope yeneyi, soni ulemwa wenu ukumjimikasya yamboneyi.

²⁶ Sikati ja ŵandu ŵangu mwana ŵane ŵakusakala wakusajembecela mpela mwakusatendela ŵakutega yijuni. Akusatega ma lwawu ni kutanjisyaga ŵandu.

²⁷ Nyumba syawo sili syegumbale ni yipanje yakuyipata mwawiyi mpela citundu cegumbale ni yijuni. Ali ni ligongo lyakwe ŵaŵele ŵakupikanika ni ŵakusicila.

²⁸ Ŵajimbele ni kola yilu yakusangalasya, Masengo gali gangali mbesi, jemanjajo ŵangalamula cenene ngani syakwamba ŵanace ŵamasije, kuti gajende cenene, soni ŵangacenjela ŵakulaga.

²⁹ AMBUJE akuwusya kuti, “Ana ni mpaka ndece kwapa cilango ligongo lya yeleyi? Ana ngawuwucisya mtundu wakutenda yeleyiwu?”

³⁰ Mcilambo muno mutendecekwe cindu cakumasya lunda ni cakogoya.

³¹ Ŵakulocesya ŵa unami soni ŵakutaga mbopesi akukamulana nawo. Nambope ŵandu ŵangu akunonyela iyoyo. Ana timcitenda cici pitijiciyika ndaŵi jakumalisya?