Yelemiya 49 - Chiyawo Bible

Ya cilango ca Aamoni

¹ Ya Aamoni, AMBUJE* akuwusya kuti, “Ana Isalaeli ŵangali ŵanace ŵacalume? Ana ŵangali ŵanace ŵakuti tajigale cilambo cawo? Sambano ana ligongo cici jemanja ŵandu ŵakumlambila mlungu jwakolanjidwa Moleki msumwile cilambo ca Gadi, soni kuti mkutama m'misinda jakwe?

² Ndaŵi jikwisa, pitinjitendekasya kulila kwa ngondo ku Laba, likulungwa lya ku Amoni. Msinda welewu tiwuciŵa masame, kwangatama ŵandu, nipo misi jakwe tijicipya. Kaneko Isalaeli tacisumula soni cilambo cawo kutyocela kwa uŵasumwile jemanjajo,” akuŵeceta myoyo AMBUJE.

³ “Mlile, jemanja ŵa ku Heshiboni, pakuti msinda wa Ai ujonasice. Mlile mwakukwesya maloŵe, jemanja ŵanace ŵacakongwe ŵa ku Laba. M'wale yisaka kulosya canasa, mlile, mtilile aku na kuku nambo litala lyenu tiliciŵa lili liwugalidwe. Mlungu jwenu Milikomu tacijigalidwa kuja ku ukapolo, pamo ni ŵakutaga mbopesi ŵakwe ni acakulungwakulungwa ŵa m'nyumba jakwe jakupopelelamo.

⁴ Ana ligongo cici mkulilapilila pa yiŵata yenu, jemanja ŵandu ŵangakulupicika, umwajegamilaga pa yipanje yenu ni kutiji kuti, ‘Ana ŵani mpaka alimbane ni uwe?’ ”

⁵ AMBUJE Ŵamaciligosope akuŵeceta kuti, “Mkalamuce, timciyiwona yakogoya kutyocela kwa wosope ŵamsyungulile jemanja. Tacimtoposya mwakuti ngasipasimanikwa soni jwalijose jwakumsonganya pampepe jemanja umwatisile.

⁶ Nambo panyuma pakwe tinjawucisya ukoto Aamoni, akuŵeceta myoyo AMBUJE.”

Cilango ca AMBUJE kwa ŵandu ŵa ku Edomu

⁷ Aga gali maloŵe giŵaŵecete AMBUJE Ŵamaciligosope kwamba ya Edomu: Ana lunda lwatisile ŵandu ŵa ku Edomu? Ana apungu ŵa jemanjajo ngaŵa mkwasalila yakwenela kutenda? Ana lunda lwawo lula lutisile?

⁸ Mwujile ŵandu ŵa ku Dedani, mtile ni mkajuŵe ku yiŵata. Kusyene, une tinjipeleka cilango kwa yisukulu ya Esawu pa lisiku lyakwe lya kulamula.

⁹ Naga ŵandu akukaŵa mipeleya akusaleka panandi mu nyambi, nambo naga ŵawiyi ayice ndaŵi ja cilo, akusamba kujigala ayo yakusakayo

¹⁰ Nambo une ndyosisye yipanje yosope ya yisukulu ya Esawu. Nigalosisye pakulanguka malo gawo gakuŵa, pangali soni pakuti mpaka ajuŵe. Ŵanace ŵawo, acalongo acimjawo ŵakwe ajonasice, pangali jwine jwasigele.

¹¹ Mwalece ŵanace ŵenu ŵamasijewo, tinalele une; soni mwalece acakongwe ŵenu ŵamasijewo angulupilileje une.

¹² AMBUJE akuŵeceta kuti, “Naga ŵele ŵiŵaliji ŵangaŵajilwa kumwela mgawo wa cilango ayice amwe nditu. Kuli uli jemanja, ana mkuganisya kuti timciŵa ŵangapegwa cilango? Pepani, timcipegwape cilango, nipo timcimwa kwene mgawowo.

¹³ Ngulumbila une namsyene, akuti myoyo AMBUJE. Msinda wa Bosila tiwuciŵa cindu cakunyalaya, citacicisekaga ŵandu, cangali kandu soni celwesece. Misi jakwe josope tijiciŵa masame mpaka kalakala.”

¹⁴ Mbikene utenga wakutyocela kwa AMBUJE jwa mtenga atumidwe kwa ŵandu ŵa mitundu jine.* Akugumila kuti, “Msongane pamo kuti m'menyane ni ŵandu ŵa ku Edomu, jimukani kuti mliŵicile cile kuputa ngondo!

¹⁵ Tinjimnondiya sikati ja mitundu josope, nipo ŵandu wosope tacimnyosya.

¹⁶ Kupoka kwenu kumlambwisye, kogoya kwenu kumsokonesye, m'mwe ŵakutama mu mbanga, m'malwala, ku matumbi. Atamose mtaŵe cisusi cenu penani mnope mpela cijuni ca ngwasi, tinjimtulusya pelepo.”

¹⁷ AMBUJE akuti, “Cilambo ca Edomu ticiciŵa cakutesya soni. Wosope ŵakupitamo tacitenda mselu, ni kusonyaga ligongo lyakonasika kwakwe kwakogoya.

¹⁸ Mpela muwajonasicile msinda wa Sodomu ni Gomola pamo ni misi jakwe jakusyungulila. Myoyo soni ngasimuŵamo mundu jwalijose. Pangali ni jumo jose jutacijendamo.

¹⁹ Mpela mulikusajogoyecesya lisimba lyakopoka mu ukweti wa Yolodani, likusajogoya ngondolo syasili syecinjilicisidwe cenene, Une soni mwacisisimucisya tinjatopocesya Aedomu kwakutalikangana ni kumangwawo. Kaneko tinjaŵicila jwakulamulila jwele jutinjimsosa une. Ana ŵani ŵampaka alandane ni une? Ana ŵani ŵampaka anjawusye ku nganya ja magambo? Ana mlongola jwakwe jwapi jwampaka asisyane ni une.

²⁰ Mpikane ku yele yindesile yakwasisya ŵandu ŵa ku Edomu, ni yele yingusaka kutenda kwa ŵandu ŵa mu msinda wa Temani. Ŵanace ŵawo tacijigalidwa, nipo ŵandu wosope taciŵa ŵakudandawula mnope ni likungu lyawo.

²¹ Cilambo capasi ticicitetemela ligongo lya kugwa kwawo. Kulila kwawo tikucipikanika mpaka ku Nyasa Jecejewu.*

²² Mtundu wine tiwucitenda kuguluka ni kuja kukugwila ku Bosila mpela ngwasi ja mapapiko getambasukuce. Pa lisiku lyelelo mitima ja ŵandu ŵa ngondo ŵa ku Edomu tijiciŵa mwinani ligongo lya woga, mpela jwamkongwe pa ndaŵi jakwe jakuŵeleka.”

Cilango ca AMBUJE pa msinda wa Damasiko

²³ Ayi ni yakuŵeceta AMBUJE yakwamba Damasiko, “Ŵandu ŵa ku Hamati ni ku Alipadi ali ŵakudandawula mnope ligongo ŵapikene utenga wakusakala. Mtima wawo usitopelwe ni woga, soni uli wangatamilicika mpela nyasa jangatama bata.

²⁴ Ŵandu ŵa mu msinda wa Damasiko ajasile mtima, akusosa kutila ligongo lyakukamulwa ni woga wekulungwa. Ali pa yipwetesi ni ululu yamti mpela ya jwamkongwe jwakuŵeleka mwanace.

²⁵ Msinda wakupikanika ula ulecedwe, wele uwaliji mkusangalala pa ndaŵi jelejo.

²⁶ Ali ni ligongo lyakwe acacanda ŵakwe tacigwa m'maluŵala gakwe, nipo asilikali ŵakwe wosope tacijonanjidwa lisiku lyelelo

²⁷ Tinjijoca mapupa gosope ga msinda wa Damasiko, moto wakwe tiwucitinisya nyumba sya macili Beni Hadadi.”

Ya cilango ku lukosyo lwa Kedala ni msinda wa Hasoli

²⁸ Kwamba ya lukosyo lwa Kedala ni ya ma ucimwene ga ku Hasoli gele Nebukadinesa mwenye jwa ku Babiloniya giŵagapundile, AMBUJE akuŵeceta kuti, “Nyakukani mkamenyane ni ŵandu ŵa ku Kedala ni kwajonanga ŵandu ŵa kungopoko lyuŵa!

²⁹ Mgwisye matenti gawo ni msumule ngondolo syawo. Mjigale nguwo ni katundu jwawo josope m'matentimo. Msumule soni ngamila* syawo. Ŵandu tacigumilila jemanjajo acitiji kuti, ‘Yakogoya yimsyungulile!’

³⁰ “Jemanja ŵandu ŵa ku Hasoli, mtile, mjanguye, mkajuŵe kwakutalicila. Nebukadinesa, mwenye jwa ku Babiloniya, ali cile kuti amenyane ni jemanja, akuti myoyo AMBUJE,

³¹ ‘Nyakukani! Mkapute ngondo ni mtundu wa ŵanduwo wawuli pa mtendele, ŵandu ŵakuganisya kuti ali pambone. Msinda wawo uli wangali yipata kapena maloko mwakuti ugambile kuŵa ŵangali citetelo.’

³² “Mjigale ngamila ni yilangwa yawo yosope. Tinjapwilinganya ŵandu ŵakusasenga umbo syawo mu mbali, tinjiyika ni yakogoya pa jemanjajo kutyocela mbali syosope.

³³ Hasoli taciŵa masame, malo gakutama masogo mpaka kalakala. Mwelemo ngisimutama soni mundu, akuti myoyo AMBUJE.”

Ya cilango ca Edomu

³⁴ Sedekiya mwenye jwa ku Yuda, pa ndaŵi jiŵatandite kwene kulamulila, AMBUJE ŵaŵecete ni jwakulocesya* Yelemiya yakwamba Elamu. Ŵatite kuti,

³⁵ Ŵatite kuti, “Tinjiwulaga wosope ŵakamulisya masengo mipamba ja ŵandu ŵa ku Elamu uŵatendesyaga jemanjajo kuti aŵe ŵamacili.

³⁶ Tinjiyikasya mbungo pa ŵandu ŵa ku Elamu kutyocela ku mbali syosope, ni kwapwilinganya ŵandu, nipo ngasipasimanikwa cilambo cele ngasajawulako ŵandu.

³⁷ Ŵandu ŵa ku Elamuwo tinjatesya woga pameso pa amagongo ŵawo nambo soni pameso pa ŵele ŵakusaka konanga ma umi gawo. Tinjatumbilila jemanjajo. Tinjawutusya ni lipanga mpaka kwawulaga.

³⁸ Tinjajonanga ayimwene ni acimlongola ŵawo, nipo tinjiŵika citengu cangu ca ucimwene ku Elamuko.

³⁹ Nambope, pasogolo pakwe tinjipeleka ukoto kwa ŵandu ŵa ku Elamu.”