Yelemiya 47 - Chiyawo Bible

Utenga wa AMBUJE wakwamba Afilisiti

¹ Aga gali maloŵe ga AMBUJE* giŵaŵecete ni jwakulocesya* Yelemiya, gakwamba ya Afilisiti, Mwenye jwa ku Iguputo mkinajonanje Gasa.

² Jwalakwe jwatite kuti, “Mlole mugakuyicila mesi kutyocela kumpoto, tigaciŵa lusulo lwakusewucila ni lwa mkokomo. Tigacisewucila mcilambo ni kumisya yosope ya mwelemo, misinda josope, ni ŵandu wosope ŵakutamamo. Ŵandu ŵakutama mcilambomo tacilila.

³ Tacipikana masegwe gakuwutuka kwa mahaci, tacipikana masegwe ga mageleta gakwe, ni kulila kwa yitungulu yakwe. Acatati ngasaganicisya ya ŵanace ŵawo, tacigamba kuŵa makono sii!

⁴ Lisiku tiliciyika litacijonasika Afilisiti wosope, lisiku litaciwulajidwa ŵakusigala wosope utacikamucisya msinda wa Taya ni Sidoni. Pakuti AMBUJE tacajonanga Afilisiti, wosope ŵakusigala ŵa ku cilumba ca Kilete.

⁵ Ŵa ku Gasa tacimyola mipala jakutesya canasa, ŵa ku Ashikeloni tacigamba kuti pee. Jemanja ŵakusigala mwa Afilisiti, Ana mpaka cakaci timciŵa mli kulikatakata ligongo lyakulila?

⁶ Mkutiji kuti, ‘Ha! AMBUJE upanga uli m'myala! Ana tacipumula cakaci? Awujinjisye m'malo mwakwe, uŵe m'momo, upumule!’

⁷ Ana upangawo mpaka upumule camtuli citamileco AMBUJE awupele kala masengo gakuti umtendele? Awutumile kuti ukalimbane ni Ashikeloni, kuti ukapute ngondo ni ŵandu ŵa mungulugulu nyasa.”