Yelemiya 46 - Chiyawo Bible

Kupundidwa kwa Aiguputo ku Kakameshi

¹ AMBUJE* ŵamsalile jwakulocesya* Yelemiya maloŵe gakwamba ya ŵandu ŵa mitundu jine.*

² Kwamba ya Iguputo, ŵaŵecete ya likuga lya ngondo lya Mwenye jwa ku Iguputo Neko, Mwenye jwa ku Iguputo, liŵalipundile Nebukadinesa mwenye jwa ku Babiloniya ku Kakameshi ku Lusulo lwa Yufuleti pa caka ca mcece ca ucimwene wa Yehoiyakimu, mwanace jwa Yosiya mwenye jwa ku Yuda. Ŵatite kuti,

³ “Mlinganye yakulicinjilicisya, ni mwutande ulendo wa ku ngondo.

⁴ Mtaŵe mahaci, ŵele ŵakusakwela akwele. Mŵe pa msela mli mwete yisoti yenu, Mnole lipanga lyenu, ni m'wale malaja genu gacisyano.

⁵ “Nambi sambano nguciwona cici? Atesile woga nipo awujile. Ŵa ngondo ŵawo apundidwe. Akutila mwakwinama, ngalola soni munyuma. Akamwilwe ni woga palipose.” AMBUJE aŵecete myoyo.

⁶ “Ŵakuwutuka mnope ngaŵa mkulupuka. Atamose jwa ngondo jwamacili ngaŵa mkomboleka kulupuka. Akwawula ali mkukuŵala, ni kugwa kumpoto kwa Lusulo lwa Yufuleti.

⁷ Ana ŵani ŵakukwela mpela Lusulo lwa Nayilo, mpela sulo sya mesi ga cikumba?

⁸ Iguputo akukwela mpela Lusulo lwa Nayilo; mpela lusulo lwa mesi ga cikumba. Iguputo ŵatite kuti, ‘Tinjijimuka ni kuciwunicila cilambo capasi. Tinjonanje misinda ni ŵandu ŵakwe.

⁹ Mgalamule mahaci kuti gajawuleje soni mageleta kuti gawutuceje. Ŵa ngondo ajawuleje pasogolo, jemanja ŵandu ŵa ku Ifiyopiya ni ku Libiya ŵanyakwile yakulicinjilicisya nambo soni jemanja ŵandu ŵa ku Lidiya ŵakumanyilila cenene kukamula ukunje.’ ”

¹⁰ Nambo lisikulyo lili lisiku lya AMBUJE Ŵamaciligosope, lili lisiku lyakuwusya mbusyo, lyakuwusya mbusyo kwa amagongo ŵakwe. Upanga wakwe tiwucajonanga, tilicijikuta miasi, mpaka kukolelwa najo. AMBUJE Ŵamaciligosope akukolosya mbopesi ku cilambo cakumpoto, ciŵandika ni Lusulo lwa Yufuleti.

¹¹ Mjawule ku Giliyadi mkajigale mtela, jemanja ŵandu ŵa ku Iguputo, mlinjilile mitela jejinji nambo mlepele, mwakuti ulwele wenuwo ngasiwupola.

¹² Ŵandu ŵa mitundu jine apikene ya soni syenu, kulila kwenu kugumbele pa cilambo capasi. Ŵa ngondo akugwisyanagwisyana, wosope ŵene pasi ndu kugwa yalumo.

Yakwika kwa Nebukadinesa

¹³ Aga gali maloŵe giŵaŵecete AMBUJE ni jwakulocesya Yelemiya yakwika kwa Nebukadinesa, mwenye jwa ku Babiloniya, kuputa ngondo ni cilambo ca Iguputo.

¹⁴ “Mjenesye ku Iguputo, mlalicile ku Migidoli, ku Memfisi ni ku Tapenasi. ‘Mwasalile ŵandu ŵa kweleko kuti, Mjime pa malo penu, mŵe ŵacile ligongo lyakuti ngondo tijicijonanga yosope yiyimsyungulile.’

¹⁵ Ana ligongo cici Mlungu jwenu Apisi amtisile? Ana ligongo cici ng'ombe jamkambako jakujilambila jila nganijilimbangana? Ligongo lyakuti AMBUJE ajigwisisye.

¹⁶ Ŵandu ŵenu adandawile, akukuŵala. Jwalijose akuŵeceta kuti, ‘Nyakukani, kwende tuwujile kumangwetu, ku cilambo citwapagwile, kuti tutile upanga wa amagongo ŵetu!’

¹⁷ “Mwenye jwa ku Iguputo, Mwenye jwa ku Iguputo mumpe lina lyakuti ‘Jwamasegwe, jwakwasa upile wakwe.’

¹⁸ Une, AMBUJE Ŵamaciligosope ndili mwenye. Une ndili Mlungu jwa cijumi. Taciyika jwine jwamacili jwamti mpela sanja sya ku Taboli, litumbi lyakupunda matumbi gane, lyamti mpela Litumbi lya Kalimeli lyakuti njoo mungulugulu nyasa.

¹⁹ Mkolosye katundu jwenu jwakwawula najo ku ukapolo, jemanja ŵandu ŵa ku Iguputo, pakuti Memfisi taciŵa cipululu, mpela masame gangali ŵandu.

²⁰ Iguputo ali mpela mwanace jwa ng'ombe jwakusalala, nambo liguŵaguŵa jakutyocela kumpoto.

²¹ Ŵa ngondo ŵaganyu ŵakwete ali mpela ŵanace ŵa ng'ombe ŵakwimbala. Nombe nawo awujile panyuma ni kutila pampepe, jwele jwali jwakulimbicila. Yisyene kuti ndaŵi ja likungu jiŵandicile, jili ndaŵi ja conasiko.

²² Liloŵe lya Iguputo lili mpela lijoka lyalikutila; ligongo lyakuti amagongo ŵakwe ayice ni yida yawo kwika ni liŵago, mpela ŵandu ŵakata yitela,

²³ tacikata kusyesyene ukweti wa ku Iguputo atamose kuti uli wewutale, ligongo lyakuti ŵanduwo atupile mpela sombe, ngaŵa mkomboleka kuŵalanjika.

²⁴ Ŵandu ŵa ku Iguputo tacitenda soni, tacijigalidwa kwawula ku ukapolo ni ŵandu ŵa ku mpoto. Une AMBUJE mbecete.”

²⁵ AMBUJE Ŵamaciligosope. Mlungu jwa Aisalaeli, aŵecete kuti, “Tinjipeleka cilango kwa Amoni, mlungu jwa Tebesi. Tinjipeleka soni cilango kwa Mwenye jwa ku Iguputo ni kwa wosope ŵakusamkulupilila jwalakwejo.

²⁶ Tinjapeleka kwa ŵele ŵakusaka kwajonanga, kwa Nebukadinesa, mwenye jwa ku Babiloniya, ni acimlongola ŵakwe ŵa ngondo. Nambo pali papite ndaŵi, Iguputo taciŵa soni ni ŵandu mpela kalakala,” akuŵeceta myoyo AMBUJE.

AMBUJE tacakulupusya ŵandu ŵakwe

²⁷ “Nambo jemanja ŵandu ŵangu, mkatenda woga. Ŵandu ŵa ku Isalaeli, mkajasa mtima, pakuti tinjimkulupusya kutyocela ku yilambo yakwakutalika. Tinjiyikulupusya soni yisukulu yenu kutyocela ku yilambo kuŵapite nayo ku ukapolo. Jemanja timciwujila, ni kupumula pambone, nipo timciŵa pa mtendele. Pangali soni jutacimjogoya jemanja.

²⁸ AMBUJE akumsalila Yakobo* kuti, m'mwe jwakutumicila jwangu, tinjiyika kukumkulupusya. Tinjijonaga mitundu josope ja ŵandu ja ku yilambo kunamtopocesye jemanja. Nambo une ngisinimjonanga jemanja, elo cilango tinjimpa mpela muyikuŵajila kuŵela, une ngaŵa kumlecelela ngampa cilango.”