Yelemiya 44 - Chiyawo Bible

Utenga wa AMBUJE kwa Aisalaeli ku Iguputo

¹ Awu uli utenga uŵapocele Yelemiya wakwamba ya Ayuda uŵatamaga ku cilambo ca Iguputo ku Migidoli, ku Tapanesi, ku Memfisi ni ku cilambo ca Patilosi.

² AMBUJE* Ŵamaciligosope Mlungu jwa Aisalaeli akuŵeceta kuti, “Myiweni yakogoya yinayiyikasisye pa Yelusalemu ni misinda josope ja ku Yuda. Sambano misinda josopeji jiŵele masame, mwakuti mwangali ŵandu ŵakutamamo.

³ Yosope yeneyi yatendekwece ligongo lya ulemwa* wa ŵandu uŵalutandite lutumbilo lwangu, pakujitutumicisya ubani* milungu jine ni kujitumicilaga, milungu jakuti jemanjajo nganajimanyilila, atamose jemanja kapena acinangolo ŵenu.

⁴ Nambope une naŵele ndili mkwatuma ŵakutumicila ŵangu ŵakulocesya kuti amsalile kuti mkatendaga yakusakala yingusaŵengana nayo.

⁵ Nambo acinangolo ŵenu nganapikanila, mwakuti nganasamala kose. Nganaleka kutenda yakusakala yawo, soni nganaleka kujitutumicisya ubani milungu jine.

⁶ Myoyo ukali walutumbilo lwangu wakolele mpela moto ku misinda ja ku Yuda ni ku misewu ja mu msinda wa Yelusalemu. Misindajo jaŵele masame gakulecedwa, mpela mujiŵelele lelo jinomu.

⁷ “Sambano AMBUJE Ŵamaciligosope, Mlungu jwa Aisalaeli akuwusya kuti, ana ligongo cici mkusaka kulijonanga mwamti myiyi? Ana ligongo cici mkusaka kwawulaga Ayuda ŵacalume ni ŵacakongwe, ŵanace ni makandi, kuti akasigala ni jumo jose pa mtundu wenu?

⁸ Ana ligongo cici mkulutanda lutumbilo lwangu pakutenda yindu yakusakala ni magasa genu nambo soni pakujitutumicisya ubani milungu jine mcilambo ca Iguputo mumkutama? Timlijonanje mwacimsyene nipo timŵe cindu cakusecesya ni cakunyosyeka m'meso mwa ŵandu ŵa mitundu josope ja pa cilambo capasi.

⁹ Ana mliŵalile yakusakala yosope yiŵatesile acinangolo ŵenu, ayimwene ŵa ku Yuda ni aciŵamkwawo, nambo soni jemanja ni aciŵamkwenu ku cilambo ca Yuda ni m'misewu ja ku Yelusalemu?

¹⁰ Nganimlinondiyepe mpaka sambano, nganimtenda woga, nganimkuya malamusi gangu ginamŵicile jemanja pamo ni acinangolo ŵenu.

¹¹ “Ali ni ligongo lyakwe AMBUJE Ŵamaciligosope, Mlungu jwa Aisalaeli, akuŵeceta kuti, Simicisye kuti mbelece cilango ni kwamala ŵandu ŵa ku Yuda.

¹² Tinjajigala ŵandu ŵakusigala ŵa ku Yuda uŵasimicisye yakwawula ku Iguputo kukutama kweleko, wosopewo tinjamala. Taciwulajidwa mcilambo ca Iguputo ŵane taciwa pa ngondo, ŵane taciwa ni sala. Ŵacanandi ni acakulungwakulungwa wakwe taciwa kusyesyene pa ngondo kapena kuwa ni sala. Jemanjajo tacisanduka kuŵa cindu cakunyalaya ni cakutesya woga, cindu cakuti ŵandu tacicisekaga ni kucinyosyaga.

¹³ Tinjapa cilango Ayuda ŵakutama ku Iguputo mpela yinatite pakwapa cilango ŵa ku Yelusalemu. Tinjapa cilango pakwikasya ngondo, sala ni yilwele.

¹⁴ Myoyo kwa ŵandu ŵakusigala ŵa ku Yuda, uŵapite ni kuja kukutama ku Iguputo, pangali jutacikulupuka, kapena kuŵa ni umi, kapena kuwujila ni kuja kukutama soni ku Yuda kuŵakusosaga, pangali jutaciwujila, kutyosyapo ŵane ŵakutila ngondo.”

¹⁵ Sambano acalume wosope uŵamanyililaga kuti aciŵamkwawo ŵatutumicisyaga ubani milungu jine, nambo soni acakongwe wosope uŵaliji pelepo, ŵandu ŵajinji nditu, kwisa soni ŵane uŵatamaga ku Patilosi mcilambo ca Iguputo, ŵamjanjile Yelemiya acitiji kuti,

¹⁶ “Uwe ngatupikanila yimtusalile mu lina lya AMBUJE.

¹⁷ M'malo mwakwe tucitenda yitwalumbile. Tucitutumisya ubani kwa Mwenye Jwamkongwe Jwakwinani ni kumpelecela mbopesi ja yakumwa mpela mutwatendelaga uwe ni acinangolo ŵetu, ayimwene ŵetu ni nduna syetu, m'misinda ja ku Yuda ni m'misewu ja ku Yelusalemu. Pandaŵi jelejo twakwete yakulya yejinji, nipo twajikutaga, ngasimana soni ni yisawusyo yine yiliyose.

¹⁸ Nambo kutyocela pa ndaŵi jitwalesile kumtumicisya ubani Mwenye Jwamkongwe Jwakwinani, ni kumpelecelaga mbopesi ja yakumwa, tuŵele tuli mkusoŵa yosope nipo tujonasice ni ngondo nambo soni sala.”

¹⁹ Acakongwewo ŵapitilisye kuŵeceta kuti, “Pandaŵi jitwatutumisyaga ubani kwa Mwenye Jwamkongwe Jwakwinani ni kumpelecelaga mbopesi ja yakumwa, ana ngaŵaga kuti aciŵamkwetu ŵajiticisyaga mutwampanganyicisyaga mwenye jwamkongwejo makeke gambone gejambule ciwaniwani cakwe, nambo soni mutwapelecelaga mbopesi ja yakumwa?”

²⁰ Piŵapikene kwanga kwa ŵandu wosopewo, acalume ni acakongwe ŵakwe, Yelemiya ŵatite kuti,

²¹ “Kwamba ya ubani umwatutumicisyaga jemanja, acinangolo ŵenu, ayimwene ŵenu, nduna ni ŵandu ŵa mcilambomo, m'misinda ja ku Yuda ni m'misewu ja mu Yelusalemu, ana mkuganisya kuti AMBUJE taciliŵalila? Ana mpaka alepele kuyikumbucila mu mtima mwawo?

²² Ali ni ligongo lyakwe AMBUJE nganapakombola soni kuti apilile pa yitendo yenu yakusakala yimwatendaga. Myoyo cilambo cenu ticisanduce cipululu, cindu cakogoya ni celwesece, cilambo cangali ŵandu, mpela muciŵelele lelo jinomu.

²³ Likungu lyeleli liyice ligongo lyakuti mwatutumisyaga ubani, soni mwalemwecesyaga AMBUJE pakukana kugapikanila maloŵe gakwe nambo soni pangakuya malamusi ni maloŵe gakwe gakupeleka lunda.”

²⁴ Yelemiya ŵasalile soni ŵandu wosope mnopemnope acakongwe kuti, “Mpikane maloŵe ga AMBUJE jemanja wosope umkutyocela ku Yuda nambo mkutama ku Iguputo.

²⁵ AMBUJE Ŵamaciligosope, Mlungu jwa Aisalaeli akuti, jemanja ni aciŵamkwenu mwasasile ni pakamwa penupa nipo mwayitesile ni makono genu. Jemanja mwaŵecete kuti, ‘Tucitenda yituŵecete. Tucitutumisya ubani kwa Mwenye Jwamkongwe Jwakwinani ni kumpelecela mbopesi ja yakumwa.’ Sambano simicisyani ya cilanga* cenuci, ni kutenda yele yimwalumbileyo.

²⁶ Sambano mpikane maloŵe ga AMBUJE, jemanja wosope ŵakutyocela ku Yuda nambo mkutama ku Iguputo. AMBUJE akuti mlumbile mu lina lyangu lyakupunda kuti mwa ŵandu ŵa ku Yuda pangali ni jumo jose jutacikolanga soni lina lyeleli mcilambo acino ca Iguputo kuti, ‘Pali AMBUJE ŵacijumi.’

²⁷ Pandaŵi ajino ngwasonda kuti natendele yakusakala ngaŵaga yambone. Ŵandu wosope ŵa ku Yuda uŵaliji ku Iguputo taciwulajidwa pa ngondo, ŵane taciwa ni sala, mpaka ndili namasile wosope.

²⁸ Ŵakulupuka ku ngondo, ŵele utaciwujila ku Yelusalemu kutyocela ku Iguputo, ali ŵapanandi. Myoyo ŵakusigala wosope ŵa ku Yuda uŵajile kukutama ku Iguputo tacimanyilila kuti yakuwona yili yapi, yawoyo kapena yanguyi.

²⁹ Ngumpa cimanyisyo cakuti tinjimpa cilango ku malo agano, kuti myoyo m'manyilile kuti maloŵe gangu gakuti tinjimpa cilango gali gakuwona.

³⁰ Cimanyisyo cakwe ni aci: Mwenye jwa ku Iguputo Hofila, mwenye jwa Iguputo, tinjimpeleka kwa amagongo ŵakwe, ni kwa ŵandu ŵakusaka kumwulaga, mpela munamtendele Sedekiya mwenye jwa ku Yuda. Jwalakwejo soni nampelece m'myala mwa amagongo ŵakwe, ni kwa ŵandu ŵakusaka kumwulaga, mpela munamtendele Sedekiya mwenye jwa ku Yuda: jwalakwejo soni nampelece myala mwa m'magongo jwakwe Nebukadinesa mwenye jwa ku Babiloniya, juŵasakaga kumwulaga jwalakwejo.”