Yelemiya 43 - Chiyawo Bible

Yelemiya akujigalidwa kwawula ku Iguputo

¹ Yelemiya piŵamasile kwasalila ŵandu wosope yiŵamtumile jwalakwejo AMBUJE* Mlungu jwawo kuti akasalile jemanjajo.

² Asaliya mwanace jwa Hoshaya, Yohanani mwanace jwa Kaleya, nambo soni ŵandu ŵacipongwe, ŵamsalile Yelemiya kuti, “Mkulambusya. AMBUJE Mlungu jwetu nganamtuma m'mwejo kuti msale yeleyi yakuti, tukajawula ku Iguputo kukutama kweleko.

³ Baluki mwanace jwa Neliya ni jwamkanganicisye kuti mtulekasye, ni cakulinga cakuti tugwe myala mwa Ababiloni, ni cakulinga cakuti atuwulaje kapena kutujigala kwawula ku ukapolo ku Babiloniya.”

⁴ Sambano Yohanani mwanace jwa Kaleya ni acimlongola wosope ŵa ngondo, pamo ni ŵandu wosope ŵa ku Yuda, ŵakanile kwapikanila AMBUJE nipo nganatama ku Yuda.

⁵ Myoyo Yohanani, mwanace jwa Kaleya, pamo ni acimlongola ŵa ngondo, ŵajigele ŵandu wosope ŵakusigala ŵa ku Yuda uŵawujile kutyocela ku yilambo kuŵapwilinganile kuti akatame ku Yuda.

⁶ Ŵanduwo ŵaliji aŵa: acalume, acakongwe ni ŵanace, kupwatikapo ŵanace ŵa acakongwe ŵa mwenye, nambo soni ŵandu wosope ŵele Nebusaladani mlongola jwa ngondo uŵalesile kwa Gedaliya mwanace jwa Ahikamu, cisukulu ca Shafani. Ŵamjigele soni jwakulocesya* Yelemiya ni Baluki mwanace jwa Neliya.

⁷ Wosopewo ŵajile nawo ku Iguputo mwakuganyosya maloŵe ga AMBUJE, mpaka kuja kwika ku Tapenesi.

⁸ Kaneko AMBUJE ŵaŵecete ni Yelemiya ku Tapanesi. Ŵasalile kuti,

⁹ “Mjigale maganga gane gekulungwa, ni mgasilile mwitaka pakwinjilila ku nyumba ja Mwenye jwa ku Iguputo ku Tapanesi. Ayuda amwone mli mkutenda yeleyo.

¹⁰ Sambano mwasalile kuti AMBUJE Ŵamaciligosope, Mlungu jwa Aisalaeli akuŵeceta kuti, tinjimŵilanga jwakutumicila jwangu Nebukadinesa, mwenye jwa ku Babiloniya. Jwalakwejo taciŵika citengu cakwe pa maganga gasisile apogo, nipo tacitambasukulilanya tenti jakwe ja ucimwene pa magangago.

¹¹ Taciyika kukonanga Iguputo, tacitumisya yilwele pa ŵandu ŵakwenela kuwa ni yilwele, soni tacajigala ukapolo ŵandu ŵakwenela kujigalidwa kwawula ku ukapolo, soni tacawulaga ni upanga ŵandu ŵakwenela kuwulajidwa ni upanga.

¹² Tacikolesya moto m'majumba ga milungu ja ku Iguputo. Tacisijoca ni moto nyumbasyo, nipo milungujo tacijijigala kwawula najo ku ukapolo. Taciswejesya cilambo ca Iguputo mpela mwele mkucinga mwakusataŵila cakuwala cakwe mciwunu, m'momo soni ni mutacatendela Aiguputo nipo jemanjajo tacityoka ku Iguputo ngaciwona cakusawusya cine cilicose.

¹³ Tacikasanya yipilala ya dini ku nyumba jakumpopelelamo mlungu jwa lyuŵa ku Iguputo. Tacijoca soni nyumba sya milungu ja ku Iguputo.”