Yelemiya 42 - Chiyawo Bible

Ŵandu akumŵenda Yelemiya kuti ŵapopelele jemanjajo

¹ Kaneko acimlongola wosope ŵa ngondo, pamo ni Yohanani mwanace jwa Kaleya, Asaliya mwanace jwa Hoshaya, kupwatikapo soni ŵandu wosope ŵacanandi ni ŵacakulungwa ŵakwe, ŵajile kwa jwakulocesya* Yelemiya. Ŵamsalile kuti

² “Uwe tuyice ni madandawulo getu. Conde mtupopelele kwa AMBUJE,* Mlungu jwenu, uweji ŵatusigele ŵapanandi. Tugambiletu kusigala panandipe pa ŵandu ŵajinji ŵala, mpela mumkutuwonelamu.

³ Mpopele kuti AMBUJE, Mlungu jwenu atusalile kwatukwenela kwawula ni yitutukatende kweleko.”

⁴ Papopo jwakulocesya Yelemiya jwajanjile kuti, “Mbikene yimŵeceteyi, tinjipopela kwa AMBUJE, Mlungu jwenu mpela mumkusacila. Yosope yene yitaŵecete AMBUJE Mlungu jwenu, tinjimsalila, ngasinamsisa kandu kalikose.”

⁵ Jemanjajo ŵamsalile Yelemiya kuti, “AMBUJE aŵe mboni jakuwona kusyesyene ni jakulupicika jele tijicitusisya uwe naga ngitukutenda yele AMBUJE Mlungu jwenu yamtumile kuti mtusalile uwe.

⁶ Kanga yili yambone, kanga yakusakala, tucigapikanila maloŵe ga AMBUJE Mlungu jwetu, tumtumile kuti mkaŵende kandu mu lina lyetu. Tucapikanila AMBUJE Mlungu jwetu, kuti yindu yitujendele cenene.”

AMBUJE akwanga lipopelo lya Yelemiya

⁷ Gali gamasile masiku likumi, AMBUJE ŵaŵecete ni Yelemiya.

⁸ Sambano Yelemiya ŵamŵilasile Yohanani mwanace jwa Kaleya, pamo ni acimlongola wosope ŵa ngondo uŵaliji nawo, nambo soni ŵandu wosope, ŵacanandi ni acakulungwakulungwa ŵakwe.

⁹ Ŵasalile kuti, “AMBUJE, Mlungu jwa Aisalaeli, jwele juŵandumile une kuti ngaŵende kandu mu lina lya jemanja, akuŵeceta kuti,

¹⁰ ‘Naga mkusaka kupitilisya kutama mcilambo muno, ni kuti timcitamilicika, ngisinimtyosya. Yakuwona kuti tinjimtamilisya, ngamtyosya kose. Ngutenda canasa mtande wa yisawusyo yinagwisisye pa jemanja.

¹¹ Mkasimumjogopa mwenye jwa ku Babiloniya jumkumjogopa sambano jinoju. Mkasimumjogopa mwenyejo, ligongo lyakuti une ndili ni jemanja, kuti nimkulupusye ni kumtyosya m'magasa mwakwe.

¹² Tinjimtendela canasa, mwakuti jwalakwejo soni tacimtendela canasa ni kumkunda kuti mtame mcilambo mwenu muno. Mbecete myoyo une AMBUJE.’

^13-15 “Nambo mwine ngimpikanila maloŵe ga AMBUJE, jemanja ŵakusigala ku Yuda ni timŵeceteje kuti, ‘Iyayi, tujawulepe ku Iguputoko, kwele kukuli kwangali ngondo, kwele uwe ngasitupikana kulila kwa lipenga, kwangasoŵa yakulya, ni tucitama kweleko. Naga mkuŵeceta yeleyi, ni kuti AMBUJE Ŵamaciligosope, Mlungu jwa Aisalaeli akuti naga msimicisye kwawula kukutama ku Iguputo, ni kwawula kukutama kweleko,

¹⁶ ni kuti ngondo jimkujijogopajo tijikampunde ku Iguputo kukoko. Sala jimkujijogopajo tijikamsawusye atamose ku Iguputo kukoko, nipo timciwila kukoko.

¹⁷ Ŵandu wosope ŵakusimicisya kwawula ku Iguputo, ni kutama kweleko, taciwa ni ngondo, sala ni yilwele. Pangali jutacisigala kapena kulupuka ku yakogoya yinjiyikasya pa jemanjajo.’

¹⁸ “AMBUJE Ŵamaciligosope, Mlungu jwa Aisalaeli, akuŵeceta soni kuti, ‘Mpela ŵandu ŵakutama ku Yelusalemu natumbililile mwa ukali, myoyo soni tinjimtumbilila jemanja naga timcijawula ku Iguputo. Timciŵa cindu cakunyalaya ni cakutesya woga, cakusecesya ni cakunyosyeka. Soni malo agano ngisimgawona soni.’ ”

¹⁹ Kaneko napitilisye, “AMBUJE amsalile jemanja ŵimsigele ŵa ku Yuda, mkajawula ku Iguputo. Ngumkalamusya jemanja lelo, kusokonecela kwenu komboleka kumjasisya umi.

²⁰ Paja ŵalakwe ŵandumile kwa AMBUJE Mlungu jwawo ni kuŵeceta kuti, atupopelele kwa AMBUJE Mlungu jwetu, soni atusalile cilicose cele AMBUJE Mlungu jwetu citaŵecete, nipo uwe tucicitenda cele cinduco.

²¹ Nimsalile yosope yene lelo, nambo nginimwapikanila AMBUJE Mlungu jwenu pa yosope yiŵandumile kuti nimsalile jemanja.

²² Sambano m'manyilile kuti timciwadi ku ngondo, sala nambo soni yilwele, ku malo kumkusaka kwawula kuti mkatameko.”