Yelemiya 41 - Chiyawo Bible

¹ Pa mwesi wa msano ni jiŵili, Ishimaeli mwanace jwa Netaniya, cisukulu ca Elishama, ŵa mwiŵasa lya mwenye, jumo jwa acimlongola ŵacakulungwakulungwa ŵa mwenye, ŵayice ni ŵandu likumi ku Misipa kwa Gedaliya mwanace jwa Ahikamu. Pandaŵi jiŵaliji mkulya nawo kweleko,

² Ishimaeli pamo ni ŵandu likumi ŵala, ŵajimwice ni kumwulaga Gedaliya mwanace jwa Ahikamu cisukulu ca Shafani. Ŵamwuleje jwalakwejo ni mapanga gawo mundu juŵaŵicidwe ni mwenye jwa ku Babiloniya kuti aŵe bwanamkubwa jwa cilambo.

³ Ishimaeli ŵawuleje soni Ayuda wosope uŵaliji ni Gedaliya ku Misipa nambo soni ŵa ngondo ŵa ku Babiloniya uŵaliji kweleko.

⁴ Kundaŵi kwakwe, ŵandu mkinamanyilile kuti Gedaliya awulajidwe,

⁵ kwayice ŵandu makumi msano ni gatatu kutyocela ku Shekemu, ku Shilo ni ku Samaliya. Ŵaliji ali amyosile ndewu syawo, yakuwala yawo yaliji yepapucepapuce, soni yilu yawo yaliji yegaŵicegaŵice. Ŵajigele mbopesi sya utandi ni ubani,* ni kuja kukusipeleka ku Nyumba ja AMBUJE.*

⁶ Sambano Ishimaeli, ŵayice alimkulila kutyocela ku Misipa kukusimana nawo. Piŵasimene nawo ŵatite kuti, “Ajinjile kuti awonegane ni Gedaliya.”

⁷ Piŵagambile kwika sikati ja musi, Ishimaeli mwanace jwa Netaniya ni ŵandu ŵakwe, ŵawuleje wosope ŵenewo ni kwaponya mcisima.

⁸ Nambo pa likuga lyelelo ŵapali ŵandu likumi uŵasalile Ishimaeli kuti, “Uwe akatuwulaga, tukwete tiligu, mbeju ja balele,* mawuta, uci, yitwayisunjile m'migunda.” Myoyo ŵalesile ngawulaga pamo ni acimjawo ŵala.

⁹ Cisima ciŵajasilemo Ishimaeli muŵajasile ŵandu uŵawuleje ŵala caliji cisima cekulungwa ciŵasokwele Mwenye Asa, ali ajogoyidwe ni Basha mwenye jwa ku Isalaeli. Ishimaeli, mwanace jwa Netaniya ŵacigumbesye ni mitembo.

¹⁰ Panyuma pakwe Ishimaeli ŵajigele ŵandu wosope uŵasigele ku Misipa kuja ku ukapolo. Ŵanduwo ni aŵa: ŵanace ŵacakongwe ŵa mwenye, ni wosope ŵakusigala ku Misipa, ŵele Nebusaladani mlongola jwa asilikali ŵa ngondo juŵapele Gedaliya mwanace jwa Ahikamu kuti aŵe bwanamkubwa jwawo. Ŵandu ŵeleŵa ŵatyosile nawo ni cakulinga cakuti akajinjile nawo mcilambo ca Aamoni.

¹¹ Pandaŵi jele Yohanani, mwanace jwa Kaleya, ni acimlongola ŵa ngondo, ŵapikene yakusakala yiŵatesile Ishimaeli.

¹² Myoyo ŵasongenye ŵandu wosope uŵaliji nawo, ni kuja kukuputa nawo ngondo. Ŵajile kukumsimana ku litamanda lya ku Gibiyoni.

¹³ Ŵandu wosope uŵakamulidwe ni Ishimaeli, piŵam'weni Yohanani mwanace jwa Kaleya ni acimlongola ŵa makuga ga ngondo gala, ŵasengwile.

¹⁴ Ŵandu wosope uŵajigele Ishimaeli kuja nawo ku ukapolo kutyoka ku Misipa, ŵawujilile kuja kwa Yohanani mwanace jwa Kaleya.

¹⁵ Nambo Ishimaeli mwanace jwa Netaniya, pamo ni ŵandu ŵakwe msano ni ŵatatu, ŵamtisile Yohanani, kutilila kwa Aamoni.

¹⁶ Pelepo Yohanani mwanace jwa Kaleya pamo ni acimlongola ŵa makuga ga ngondo, ŵajigele ŵandu uŵasigele ku Misipa uŵajigalidwe ni Ishimaeli kuja ku ukapolo, panyuma pakumwulaga Gedaliya mwanace jwa Ahikamu. Ŵandu uŵajigelewo ŵaliji asilikali ŵa ngondo, acakongwe, ŵanace ni ŵakutumicila ku luŵala lwa mwenye ŵele Yohanani uŵayice nawo kutyocela ku Gibiyoni.

¹⁷ Ŵatyosile pa ulendo wawo ni kuja kwima ku Geluti Kimuhamu, ciŵandika ni ku Betelehemu.* Ŵasakaga kwawula ku Iguputo.

¹⁸ Ligongo lyakwajogopa Ababiloni. Ŵakwete woga ligongo lyakuti Ishimaeli mwanace jwa Netaya, ŵamwuleje Gedaliya mwanace jwa Ahikamu juŵaŵicidwe ni mwenye jwa ku Babiloniya kuti aŵe bwanamkubwa jwa cilambo.