Yelemiya 40 - Chiyawo Bible

Yelemiya akulonjela kwa Gedaliya

¹ AMBUJE* ŵaŵecete ni Yelemiya pa ndaŵi jele Nebusaladani mlongola jwa alonda ŵa ngondo piŵamgopwele ku Lama. Ŵamsimene ali jwamtaŵidwe ni unyolo pamo ni ŵane uŵaliji mu ukayidi ŵa ku Yelusalemu ni ŵa ku Yuda ŵakuja nawo ku Babiloniya.

² Mlongolajo ŵamjigele Yelemiya ni kumsalila kuti, “AMBUJE Mlungu jwenu, ŵaŵecete kuti tacijonanga malo agano.

³ Yeleyi ayitesile mpela muŵaŵecetele, pa ligongo lyakuti jemanja ŵandu mwalemwecesye AMBUJE, nginimwapikanila.

⁴ Nambo m'mwe Yelemiya, lelo jino ngumgopola ma unyolo m'myala mwenumu. Naga mkusaka kwende ku Babiloniya, nipo une tinjimsamalila cenene. Nambo naga ngimkusosa kwawula, pangali kandu. Cilambo ni celeci mumkuciwonelamu, mjawule kwele kumkukuwona kuti kuli kwambone.

⁵ Naga ngimkwawula, mwujile kwa Gedaliya mwanace jwa Ahikamu, cisukulu ca Shafani juŵasagulidwe ni mwenye jwa ku Babiloniya kuti aŵe bwanamkubwa jwa misinda ja ku Yuda. Mkatame ni jwalakwejo sikati ja ŵandu, kapena mjawule kulikose kumkukusaka.” Myoyo mlongola jwa ngondo jula ŵampele Yelemiya cakulya, ni kumpa soni mituka, ni ŵamsalile kuti, “Iyayi, jendani cenene!”

⁶ Yelemiya ŵapite kwa Gedaliya mwanace jwa Ahikamu ku Misipa ni ŵatemi nawo sikati ja ŵandu uŵasigele mu msindamo.

Gedaliya akuŵa bwanamkubwa jwa ku Yuda

⁷ Ŵapali acimlongola ŵane ŵa ngondo ŵele nganalipeleka nawo. Jemanjajo pamo ni ŵandu ŵawo ŵapikene kuti mwenye jwa ku Babiloniya jwamŵisile Gedaliya, mwanace jwa Ahikamu kuti aŵe bwanamkubwa jwa cilamboco, aloleleje ŵandu ŵakulaga mnope ŵala, acalume, acakongwe ni ŵanace, ŵele nginajigalidwa kwawula ku ukapolo ku Babiloniya, ŵandu ŵakulaga mnope mcilambomo.

⁸ Sambano ŵele uŵalongene ni jwalakwejo ku Misipa ni aŵa: Ishimaeli mwanace jwa Netaniya, Yohanani ni Yonatani ŵanace ŵa Kaleya, Selaya mwanace jwa Tanihumeti, ŵanace ŵacalume ŵa Efayi jwa ku Netofa, ni Yesaniya mwanace jwa Maaka, jemanjajo pamo ni ŵandu ŵawo.

⁹ Wosopewo, Gedaliya mwanace jwa Ahikamu, cisukulu ca Shafani, ŵasalile mwakulumbila kuti, “Mkasimjogopa kwakamulila masengo Ababiloniwo. Mtameje mcilambomu, mumtumicileje mwenye jwa ku Babiloniya, nipo yindu yosope tiyicimjendela cenene.

¹⁰ Une tisigalile ku Misipa kuti nimjimilileje kwa Ababiloni pa ndaŵi jitayiceje. Nambo jemanja mjigale yisogosi yenu, finyo jwenu, mawuta genu nambo soni myisunje cenene nditu. Mtameje m'misinda jimsumwilejo.”

¹¹ Nombe nawo Ayuda ŵa ku Mowabu, ku Amoni ni ku Edomu ku yilambo yine, ŵapikene kuti mwenye jwa ku Babiloniya ŵalesileko ŵandu ŵane ku Yuda, soni kuti ŵaŵicile Gedaliya, mwanace jwa Ahikamu, cisukulu ca Shafani kuti aŵe bwanamkubwa jwawo.

¹² Sambano Ayuda wosope ŵenewo ŵayice kutyocela ku yilambo yosope kuŵapwilinganile. Ŵawujile ku Yuda ni kuja kulilosya kwa Gedaliya ku Misipa, kweleko migunda jawo jasogwele yisogosi yejinji ni finyo jwejinji.

Gedaliya akuwulajidwa

¹³ Piyatendecekwe yeleyi Yohanani pamo ni acimlongola ŵa ngondo ŵimkinalipeleka ŵala, ŵajile kwa Gedaliya ku Misipa.

¹⁴ Ŵamwusiye kuti, “Ana mkumanyilila kuti Baalisi mwenye jwa Aamoni amtumile Ishimaeli mwanace jwa Netaniya kuti amwulaje?” Nambo Gedaliya mwanace jwa Ahikamu nginayikulupilila.

¹⁵ Sambano Yohanani, mwanace jwa Kaleya, ŵamsalile Gedaliya ku Misipa mwa asili kuti, “Mungunde kuti ngamwulaje Ishimaeli mwanace jwa Netaniyaju, nipo jwalijose ngisamanyilila kose. Nambi wawo ŵawulaje ligongo cici ni kukunda kuti Ayuda wosope ŵamsyungulileŵa apwilingane, nipo ŵakusigala ŵa ku Yuda tajonanjidwe?”

¹⁶ Nambo Gedaliya mwanace jwa Ahikamu ŵamjanjile Yohanani mwanace jwa Kaleya kuti, “Iyayi, mkatenda myoyo. Yimkuŵeceta yakwamba Ishimaeli yili ya unami.”