Yelemiya 38 - Chiyawo Bible

Yelemiya akuponyedwa mu cisima ca matope

¹ Sambano Shefatiya mwanace jwa Matani, Gedaliya mwanace jwa Pasha, Yukala mwanace jwa Shelemiya, ni Pasha mwanace jwa Malikiya, ŵapikene yele Yelemiya yiŵaliji mkwasalila ŵandu yakuti,

² AMBUJE* akuŵeceta kuti, “Jwalijose jutasigalile mu msinda awuno taciwulajidwa ni ngondo, sala kapena yilwele. Nambo jwalijose jutakopoce ni kuja kukulipeleka kwa Ababiloni taciŵa cijumi, taciwukulupusya umi wakwe.

³ Msinda awuno taciwusumula nipo tiwucipelecedwa kwa asilikali ŵa ngondo ŵa ku Babiloniya.”

⁴ Sambano acakulungwakulungwa ŵamsalile mwenye kuti, “Munduju akuŵajilwa kuwulajidwa. Jwalakweju akwajasikasya mitima ŵandu ŵasigalile mu msinda, ligongo lya yakuŵeceta yakweyi. Jwalakweju ngakwasosela yambone ŵandu, agamba kusaka kuti jemanjajo ajonanjidwe.”

⁵ Mwenye Sedekiya ŵajanjile kuti, “Cambone, mtende yimkusaka kutenda najo; une mwenye ngaŵa kumlekasya jemanja.”

⁶ Myoyo wamjigele Yelemiya, ni kuja kumponya mcisima ciŵasosile Malakiya mwanace jwa mwenye, mu luŵala lwa acilonda ŵa mwenye. Ŵamtulucisye mwelemo ni lukonji, mu cisimamo mwaliji mwangali mesi akaŵe matopepe, mwakuti Yelemiya ŵamisilwe m'matopemo.

⁷ Sambano Ebedimeleki, juŵaliji jwamcele jwakukamula masengo ku nyumba ja mwenye, ŵapikene kuti Yelemiya amponyisye mcisima. Pandaŵijo ni kuti mwenye ŵaliji ali ku Cipata ca Benjamini.

⁸ Ebedimeleki ŵakopwece ni kuja kweleko kukumsalila mwenye kuti,

⁹ “Mwenye ambuje ŵangu, ŵanduŵatu amtendele yakusakala kwejinji jwakulocesya* Yelemiya. Amponyisye mcisima, nipo pakuti mkate wamasile mu msindamu, jwalakwejo tawe ni sala mwelemo.”

¹⁰ Sambano mwenye ŵamlamwile jwamcele Ebedimeleki kuti, mwajigale ŵandu ŵatatu ni mjawule mkamkoposye Yelemiya mkanawe.

¹¹ Apo Ebedimeleki ŵajile ku nyumba ja mwenye ni ŵanduwo, ni ŵajigele yiwisa mcipinda muyaliji yakuwala. Yiwisayo ŵayitulucisye mcisima mumwaliji Yelemiya mula.

¹² Kaneko Ebedimeleki ŵamsalile Yelemiya kuti, “Mŵice yiwisayi mu ngwapa kuti ngonji sikampweteka.” Yelemiya ŵatesile yeleyo.

¹³ Ŵamkopocesye kusa ni ngonji, nipo jwalakwejo jwatemi soni kulakula ku luŵala lwa acilonda.

Sedekiya akuŵenda lunda kwa Yelemiya

¹⁴ Lisiku line Mwenye Sedekiya ŵamwusisye jwakulocesya Yelemiya ni kumpocela pa cipata catatu ca ku Nyumba ja AMBUJE. Ŵamsalile kuti, “Ngusaka kumwusya kandu, myoyo mkasimusisila.”

¹⁵ Yelemiya ŵajanjile kuti, “Naga ngumsalila, mwangatyocesya kose timumbulaje. Naga ngumsalila lunda ngimumbikanila.”

¹⁶ Pelepo Mwenye Sedekiya ŵalumbile mwa asili pameso pa Yelemiya kuti, “Ngulumbila mu lina lya Mlungu jwacijumi, Mlungu juŵatupele uwe umi kuti une nginimwulaga, soni nginimpeleka myala mwa ŵandu ŵakusaka kumwulaga m'mwejo.”

¹⁷ Kaneko Yelemiya ŵamsalile Sedekiya kuti, “AMBUJE Ŵamaciligosope, Mlungu jwa Aisalaeli akuti, ‘Naga mkukopoka ni kuja kukulipeleka kwa acakulungwakulungwa ŵa mwenye jwa ku Babiloniya, timciŵa ni umi soni msinda awuno ngasawujoca ni moto. Wawo pamo ni liŵasa lyawo taciŵa cijumi.

¹⁸ Nambo naga ngimlipeleka kwa acakulungwakulungwa ŵeleŵa, msindawu tiwucipelecedwa myala mwa Ababiloni ni taciwujoca ni moto mwakuti jemanja ngisimkulupuka myala mwa jemanjajo.’ ”

¹⁹ Nambo Mwenye Sedekiya ŵajanjile kuti, “Ngwajogopa Ayuda uŵatilile kala kwa Ababiloni. Ngogopa kuti Ababiloniwo tacimbeleka kwa Ayudawo, nipo jemanjajo tacindagasya une.”

²⁰ Yelemiya ŵajanjile kuti, “Iyayi, jemanjajo ngisampeleka m'mwejo, pakuti AMBUJE anjuwulile kuti, naga mkwapikanila AMBUJE mu yosope, une ngumsalila kuti yindu tiyicimjendela cenene nipo timcikola umi.

²¹ Nambo naga mkukana kukopoka ni kuja kukulipeleka, AMBUJE anjuwulile kuti

²² acakongwe wosope ŵakusigala m'nyumba ja ucimwene ja ku Yuda, tacipelecedwa kwa acakulungwakulungwa ŵa mwenye jwa ku Babiloniya. Pa ulendo wakuja ku Babiloniko, acakongwewo tacijimbaga kuti, ‘Acimjenu ŵakulupicika ŵala amlambwisye, nipo ŵampundile. Nambo sambano pakuti ngongolo syenu sikanilile m'matope, acimjenuwo amlesile.’ ”

²³ “Acakongwe ŵenu wosope pampepe ni ŵanace tacipelecedwa m'myala mwa Ababiloni. Soni ŵalakwe ŵene ngasapakombola kutila m'myala mwa jemanjajo. Timcikamulwa ni mwenye jwa ku Babiloniya, kaneko msindawuno tiwucijocedwa ni moto.”

²⁴ Pelepo Sedekiya ŵamsalile Yelemiya kuti, “Mkasimumsalila mundu jwalijose ya yeleyi, kogopela kuti mtakuwulajidwa.

²⁵ Acakulungwakulungwa pitapikane kuti mbele ndili mkuŵeceta ni m'mwejo, tayice kwa m'mwejo kukuŵeceta kuti, ‘Mtusalile yimwasalile mwenye, kwisa soni yamsalile mwenyejo, mkatusisa, nipo uwe ngitumwulaga.’

²⁶ Sambano, m'mwejo timwajanje kuti, ‘Naliji mkwaŵenda mwenye kuti akambucisya soni ku nyumba ja Yonatani, kuti ngawe kweleko.’ ”

²⁷ Kaneko acakulungwakulungwa wosope ŵayice kwa Yelemiya kukumwusya. Jwalakwejo ŵajanjile jemanjajo mwakulingana ni muŵamsalilile mwenye. Myoyo ngani syawo syamalile papopo, ligongo lyakuti maloŵe gala galiji mkanigapikanice kwa mundu jwalijose.

²⁸ Myoyo Yelemiya ŵapitilisye kutama ku luŵala lwa acilonda, mpaka pa lisiku liŵapundidwe msinda wa Yelusalemu.