Yelemiya 37 - Chiyawo Bible

Sedekiya akuŵalanga buku ja Mlungu

¹ Nebukadinesa, mwenye jwa ku Babiloniya, ŵamtesile Sedekiya mwanace jwa Yosiya kuŵa mwenye jwa ku Yuda, m'malo mwa Yehoiyakini mwanace jwa Yehoiyakimu.

² Nambo Sedekiya ni nduna syakwe, pamo ni ŵandu wosope ŵa mcilambomo nganagapikanila maloŵe gosope giŵaŵecete kupitila mwa jwakulocesya* Yelemiya.

³ Sambano Mwenye Sedekiya ŵamtumile Yehuka mwanace jwa Shelemiya ni Sefaniya mwanace jwa Maaseya, kwa jwakulocesya Yelemiya kukumsalila kuti, “Mtupopelele kwa AMBUJE,* Mlungu jwetu.”

⁴ Pa ndaŵi jelejo ni kuti Yelemiya ŵaliji mkinaŵicidwe mu ukayidi, myoyo ŵakwete ukombosi wakwenda sikati ja ŵandu.

⁵ Pandaŵi jelejo ni kuti likuga lya ngondo lya Mwenye jwa ku Iguputo lyaliji lili likopwece ku Iguputo. Sambano Ababiloni uŵawusyungulile msinda wa Yelusalemu ni malo gakutama ŵa ngondo piŵapikene yeleyo, ŵatyosile ku Yelusalemuko.

⁶ Kaneko AMBUJE ŵamsalile Yelemiya

⁷ kuti amsalile Sedekiya kuti, “Une AMBUJE, Mlungu jwa Aisalaeli, nguŵeceta kuti mwenye jwa ku Yuda juŵamtumile m'mwejo kuti mŵende lunda kwa une, mumsalile kuti, likuga lya ngondo lya Mwenye jwa ku Iguputo lilyayice kuti limkamusye, pangakaŵapa tiliwujile kumangwakwe ku Iguputo.

⁸ Myoyo Ababiloni taciyika kukuputa ngondo ni ŵandu ŵa mu msinda awuno. Tacapunda nipo kaneko taciwujoca moto msindawu.

⁹ AMBUJE akuŵeceta kuti jemanja mkalilambusya ni kuganisya kuti Ababiloni tacityoka ni kumleka jemanja, ngasatyoka jemanjajo.

¹⁰ Pakuti atamose mlipundile likuga lyosope lya Ababiloni limkumenyana nalyo ngondo, atamose sikati ja jemanjajo muli musigele ŵawulalepe m'malo mwawo mwakutama asilikali ŵa ngondo, jemanja pewo tacijimuka ni kuwujoca msindawu.”

Yelemiya akutaŵidwa ni kuŵicidwa mu ukayidi

¹¹ Pandaŵi jele likuga lya asilikali ŵa ngondo ŵa ku Babiloniya jiŵalesile kutenda ngondo ni ŵandu ŵa mu msinda wa Yelusalemu, ligongo lyakogopa likuga lya ngondo lya Mwenye jwa ku Iguputo,

¹² Yelemiya ŵanyakwice kutyoka ku Yelusalemu kuja ku upande wa Benjamini kuti akapocele mbuwa jakwe ja migunda ja acinangolo ŵakwe.

¹³ Pandaŵi jiŵayice pa Cipata ca Benjamini, mlonda jwine jwa pelepo, jwakolanjidwa Iliya, mwanace jwa Shelemiya, mwanace jwa Hananiya, ŵamkamwile Yelemiya ni jwatite kuti, “Ana mkutilila kwa Ababiloni, ngaŵa myoyo?”

¹⁴ Yelemiya jwatite kuti, “Iyayi, yeleyo ngaŵa yakuwona. Une ngingutilila kwa Ababiloni.” Nambo Iliyawo nginampikanila jwalakwejo mwakuti ŵamkamwile ni kuja najo kwa acakulungwakulungwa.

¹⁵ Acakulungwakulungwa ŵala ŵamtumbilile Yelemiya. Ŵamkwapwile ni kumwugalila m'nyumba ja mlembela Yonatani jiŵajisyusisye kuŵa nyumba ja akayidi.

¹⁶ Yelemiya ŵamŵisile mu ukayidi wa m'nyumba ja pasi pa litaka, ni ŵatemi mwelemo kwa ndaŵi jelewu.

¹⁷ Lisiku line mwenye ŵatumile ŵandu kuti akamŵilanje Yelemiya, ni ŵampocele ni magasa gaŵili. Myoyo pacisyepela m'nyumba ja mwenyejo ŵamwusisye Yelemiya kuti, “Ana pana maloŵe gamsalile AMBUJE?” Yelemiya jwajanjile kuti, “Elo, gapali. Ŵalakwe mwenye tacipelecedwa m'myala mwa mwenye jwa Babiloniya.”

¹⁸ Kaneko Yelemiya ŵamwusisye Mwenye Sedekiya kuti, “Ana une nimlemwecesye cici, ni nduna syenu kapena ŵandu ŵenu kuti mpaka mumbice mu ukayidi?

¹⁹ Ana ŵakulocesya ŵenu ŵala ali kwapi uŵalocesyaga kuti mwenye jwa Babiloniya ngasaputa ngondo ni ŵalakwe ni ŵandu ŵa mcilambo muno?

²⁰ Sambano ngwaŵenda ŵalakwe mwenye ambuje ŵangu, kuti apikane kuŵenda kwangu. Akasambucisya soni ku nyumba ja mlembela Yonatani, kogopela kuti mwine komboleka une kuja kuwila kukoko.”

²¹ Pelepo Mwenye Sedekiya ŵalamwile kuti Yelemiya asunjidwe ku luŵala lwa acilonda. Myoyo ŵampaga yakulya lisiku ni lisiku, mtanda umpepe wa mkate. Ŵasumaga kwa ŵandu ŵakupanganya mkate, mpaka pa ndaŵi jakuti mkate wosope wamasile mu msindamo. Myoyo Yelemiya ŵasigelepe mu luŵala lwa acilonda.