Yelemiya 34 - Chiyawo Bible

Utenga wa Sedekiya

¹ Japali ndaŵi jele Nebukadinesa mwenye jwa ku Babiloniya ni likuga lyakwe lya ngondo, pamo ni ayimwene wosope ŵa pa cilambo capasi uŵalamulilaga jemanjajo, kwisa soni ŵandu ŵa mitundu josope, ŵapundile ngondo ni msinda wa Yelusalemu ni misinda jine jakusyungulila. Pa ndaŵi jelejo AMBUJE* ŵasalile Yelemiya kuti,

² Mjawule mkasalile Sedekiya mwenye jwa ku Yuda kuti, “AMBUJE akuŵeceta kuti, msinda awu tinjiwupeleka kwa mwenye jwa ku Babiloniya, nipo jwalakwejo taciwucoma moto.

³ M'mwejo ngisimkulupuka m'myala mwawo. Tacimkamula nikumpeleka m'myala mwakwe. Timcawona meso ni meso, nipo timciŵeceta nawo pakamwa ni pakamwa, myoyo tacimjigala m'mwejo kwawula namwe ku Babiloniya.

⁴ Nambo pikanani maloŵe ga AMBUJE, m'mwe Sedekiya mwenye jwa ku Yuda, AMBUJE akuti, m'mwejo ngisim'wila ku ngondo,

⁵ m'malo mwakwe timciwila pa mtendele. Ŵandu piŵapelekaga mbopesi pa ndaŵi jiŵasikaga acinangolo ŵenu mwilembe, ŵele uŵaliji ayimwene jemanja mkinimpagwe, mwa litala lilyolyo tacimtutumicisya soni ubani.* Tacimlilila jemanja ni kuŵeceta kuti, ‘Mwenye jwetu awile!’ Une AMBUJE mbecete myoyo.”

⁶ Kaneko jwakulocesya* Yelemiya jwajile kukumsalila Mwenye Sedekiya jwa ku Yuda ku Yelusalemu,

⁷ pa ndaŵi jele asilikali ŵa mwenye jwa ku Babiloniya jiŵaliji mkumenyana ni ŵandu ŵa ku Yelusalemu ni ŵa ku misinda jakusigala ja Lakishi ni Aseka. Jelejipe ni jijaliji misinda jakusigala jesyungulilidwe ni mapupa ga ku Yuda.

Ya kwalagasya acikapolo

⁸ Maloŵe ga AMBUJE gayice soni kwa Yelemiya. Pandaŵijo ni kuti Mwenye Sedekiya ŵaliji ali apangene nawo ŵandu wosope ŵa ku Yelusalemu kuti ajenesye kuti acikapolo ŵawo wosope akwenela kwagopola.

⁹ Wosope uŵakwete acikapolo ŵa Cihebeli, ŵacalume ni ŵacakongwe, ŵagopole kwene. Nginaŵajilwaga kumsunga mu ukapolo Myuda mjawo.

¹⁰ Acakulungwa wosope pamo ni ŵandu wamba, piŵatesile cilanga* kuti acikapolo wosope ŵagopole, nipo kuti akasiŵasunga soni mu ukapolo, yeleyi yatendekwe nipo ŵagopwele.

¹¹ Panyuma pakwe ŵacenjile nganisyo syawo, mwakuti acakongwe ni acalume uŵagopwele ŵala, ŵakamwile soni kuja nawo ku ukapolo.

¹² Sambano AMBUJE ŵamsalile Yelemiya kuti

¹³ ajawule kwa ŵandu ni akajenesye maloŵe ga AMBUJE gakuti, “Natesile cilanga ni acinangolo ŵenu pa ndaŵi jinakopwesye ku cilambo ca Iguputo ku nyumba ja ukapolo jila. Cilangaco caliji cakuti:

¹⁴ Pitiyimale yaka msano ni yiŵili, jwalijose jwa jemanja amgopole mu ukapolo Mhebeli jwalijose juŵalisumisye kwa jemanja ni kukamula masengo yaka msano ni cimo. Nambo m'malo mwakwe acinangolo ŵenu nganasamala kose ni kumbikanila une.

¹⁵ Nambo pa masiku gapite mwapitikwice mtima ni kutanda kutenda yinasakaga une. Jemanja wosope mwalangene yakwapa ukoto Aisalaeli acimjenu. Jemanja mwatesile cilangaci m'Nyumba jijikusapikanika ni lina lyangu kuti yeleyi timciyitenda.

¹⁶ Nambo sambano mwagalawisye nganisyo syenu, mwakuti msakesye lina lyangu. Jemanja mwakamwile soni ŵandu umwagopwele ŵala ni kwakamula soni kuŵa acikapolo ŵenu.”

¹⁷ Ali ni ligongo lyakwe AMBUJE akuŵeceta kuti: nginimumbikanila, nganimjenesya ya ukoto kuti mwagopole acanasi ni acalongo acimjenu. Cambone! Une tinjijenesya ya ukoto wine kwa jemanja, ukoto wakwe uli wakuti timciwa ku ngondo, ni sala kapena yilwele yakulekanganalekangana. Tinjimtendekasya kuŵa cakutesya soni sikati ja ayimwene ŵa pa cilambo capasi.

^18-19 Nginimsamalila cilanga cimwatesile ni une, soni nganimsunga cilanga cimwatesile pameso pangu. Sambano une tinjimsandusya kuŵa mpela mwanace jwangondolo jula juŵamkataga mapisi gaŵili ni kupitaga pa mapisigo. Ŵele uŵapitaga sikati ja mapisigo gaŵiligo ŵaliji acakulungwa ŵa ku Yelusalemu ni ku Yuda, acimlongola ŵa boma, ŵakutaga mbopesi ni ŵandu ŵa mcilambomo.

²⁰ Wosopewo tinjapeleka kwa amagongo ŵawo ni kwa ŵele ŵasakaga kwawulaga mwakuti mitembo jawo tijiciŵa yakulya ya yijuni ni yinyama ya mwitinji.

²¹ Tinjimpeleka Sedekiya, mwenye jwa ku Yuda, pamo ni nduna syakwe, kwa amagongo ŵawo uŵasakaga kwawulaga, ni kuti ku likuga lya ngondo lya ku Babiloniya lyele ndaŵi ajino litandite kuwujilila munyuma.

²² Nambo tinjalamula, tinjawucisya soni ku msinda awuno. Taciputa nawo ngondo ni kuwusumula, nipo taciwucoma moto. Myoyo misinda ja Ayuda tinjijisandusya kuŵa cipululu, mwangali ŵandu.