Yelemiya 33 - Chiyawo Bible

Cilanga cine ca cembeceyo

¹ AMBUJE* ŵaŵecete soni ni une pa ndaŵi jinaliji mu ukayidi ku luŵala lwa acilonda ŵa mwenye, ni ŵatite kuti,

² Aga gali maloŵe ga AMBUJE uŵapanganyisye kwinani ni cilambo capasi, uŵacigumbile ni kucitamilisya. Jwalakwejo lina lyakwe lili AMBUJE.

³ Jwalakwejo akuŵeceta kuti, “Mumbilanje nipo tinjimjanga, tinjimsalila ya asili yejinji yele ngimkuyimanyilila.

⁴ Une AMBUJE, Mlungu jwa Aisalaeli nguŵeceta pa ya nyumba sya mu msinda awuno ni pa nyumba ja ayimwene ŵa ku Yuda, siŵasigwisisye kuti ataŵe yakucinjilicisya msindawo, pa ndaŵi ja ngondo.

⁵ Ababiloni akwisa kuputa ngondo ni ŵandu ŵa mu msinda welewu, nipo nyumba syawo tisicigumbala ni mitembo ja ŵandu jitinjawulaga mwalutumbilo ni mwakupya mtima. Msinda welewu niwutumbilile ligongo lya ndamo sya ŵandu ŵakwe ŵakutama mwelemo.

⁶ Nambo msogolo mwakwe tinjiwupa umi msindawo ni kuwuposya. Tinjaposya ŵandu ŵakwe ni kwapa yambone yejinji ni mtendele usyesyene.

⁷ Tinjatamika soni pambone ŵandu ŵa ku Yuda ni Isalaeli, ni kwawucisya soni muŵaŵelele pandanda.

⁸ Tinjaswejesya pakwatyocesya ulemwa* wawo wosope uŵandemwecesye une. Tinjakululucila yakusakala yawo yosope yiŵatesile pakunjimucila une.

⁹ Msinda welewu tiwucijenesya mbili jangu jambone, nipo tiwucimba lukondwa, matogolelo ni ucimbicimbi. Ŵandu ŵa mitundu josope pa cilambo capasi pano tacindogolela ni kunjimbicisya pakupikana ya yindu yambone yosope yiniwutendele msinda welewu. Tacitenda soni ni kutetemela pakuwuwona kuti msindawo niwupele upile ni yambone yangaŵalanjika.”

¹⁰ AMBUJE akuŵeceta kuti, “Ŵandu akusaŵeceta kuti malo agano gali masame, mwele mwamuli mwangali mundu kapena nyama. Nambo m'misinda ja ku Yuda ni m'misewu ja Yelusalemu mwamuli sii, mwangali mundu soni atamose nyama, timucipikanika

¹¹ masegwe gakusangalala ni ga lukondwa, maloŵe ga lukondwa ga mlombela jwamlume ni jwamkongwe. M'Nyumba jangu soni timucipikanika nyimbo ja ŵandu wakuja kupeleka mbopesi syakutogolela Mlungu. Nyimbo jakwe tacitiji kuti, ‘Mwatogolele AMBUJE Ŵamaciligosope pakuti jwalakwejo ali jwambone soni cinonyelo cakwe cili ca mpaka kalakala.’ Tinjaŵika pambone jemanjaji mpela muŵaŵelele, AMBUJE akuti myoyo.”

¹² AMBUJE Ŵamaciligosope akuŵeceta kuti, “Ku malo agano gagali mpela cipululu kwakuli kwangali mundu kapena yinyama, ni ku misinda jakwe josope tikuciŵa malo gakulicisya yilangwa kutacilanjilanga ŵakucinga ngondolo syawo.

¹³ Ku misinda ja ku matumbi, ku ciŵata, kum'mwela ku Negebu, ku upande wa Benjamini, ku yilambo yakuŵandikana ni Yelusalemu nambo soni ku misinda ja Yuda, ngondolo tisicijawula pameso pa mundu jwakusiŵalanga, AMBUJE akuti myoyo.”

¹⁴ AMBUJE akuŵeceta soni kuti, “Gakwisa soni masiku gele gitinjitenda yinatesile cilanga* ni ŵandu ŵa ku Isalaeli ni Yuda.

¹⁵ Pa masiku gelego nambo soni pa ndaŵi jelejo, tinjisipusya nyambi jakulungama kutyocela ku liŵasa lya Daudi.* Mundujo tacitenda yambone ni yakulungamika pa cilambo cosope.

¹⁶ Pandaŵi jelejo ŵandu ŵa ku Yuda tacikulupuka, nambo soni ŵa ku Yelusalemu taciŵa pa mtendele. Myoyo msindawu tiwucikolanjidwa ni lina lyakuti, ‘AMBUJE ali cikulupusyo cetu.’

¹⁷ Une AMBUJE ngutenda cilanga kuti Daudi ngisasoŵa mundu jwakuti ajinjile m'malo mwakwe pa citengu ca ucimwene wa Isalaeli.

¹⁸ Ŵakutaga mbopesi ŵa ci Lefi, ngisasoŵa mundu jwakwika kwa une ndaŵi syosope kukupeleka mbopesi syakutinisya, sya utandi ni sine, mpaka kalakala.”

¹⁹ AMBUJE ŵamsalile une kuti,

²⁰ “Maloŵe gangu ni aga: Une natesile cilanga ni cilo kwisa soni musi kwakuti yiŵiliyi yikusayika pa ndaŵi jakwe. Cilangaco ngaŵa mkasika kose.

²¹ Yalumo soni natesile cilanga ni Daudi, jwakutumicila jwangu, kuti ndaŵi syosope taciŵa ni cisukulu cakuti citame pa citengu cakwe ca ucimwene. Natesile soni cilanga cine ni ŵakutaga mbopesi ŵa ci Lefi kuti jemanjajo tacindumicila ndaŵi syosope. Yilanga yeleyi ngaŵa mkupwanyika soni.

²² Tinjiculuya yisukulu ya jwakutumicila jwangu Daudi ni ŵakutumicila ŵangu ŵakutaga mbopesi ŵa ci Lefi, winji wakwe mpela wa ndondwa kwinani kapena mcenga mungulugulu nyasa.”

²³ AMBUJE ŵamwusisye Yelemiya kuti,

²⁴ “Ana ngimkupikana yakuŵeceta ŵanduyi. AMBUJE agakanile maŵasa gaŵili giŵagasagwile? Anyosisye ŵandu ŵangu mwakuti pameso pa jemanjajo nginaŵa soni mtundu wa ŵandu.

²⁵ Une natesile cilanga ni musi ni cilo, nambo soni mbanganyisye malamusi gakwendecesya cilambo capasi ni cakwinani.

²⁶ Sambano mpela mundendele yeleyi mwakusimicisya, myoyo soni tinjicisunga cilanga cinatesile ni cisukulu ca Yakobo,* nambo soni Daudi kuti alamulileje yisukulu ya Abulahamu,* Isaki ni Yakobo. Nambo sambano tinjatendela canasa ni kwaŵika soni pambone.”